Rain Alert: ఏపీ ప్రజలకు అలెర్ట్: రాబోయే 3 రోజులు వర్షాలు.. 30-40 కిమీ వేగంతో ఈదురుగాలులు.. IMD కీలక బులెటిన్ విడుదల!
ఆంధ్రప్రదేశ్, యానాం పరిసర ప్రాంతాలలో రాబోయే మూడు రోజుల వాతావరణానికి సంబంధించి వాతావరణ(Rain Alert) శాఖ కీలక బులెటిన్‌ను విడుదల చేశాయి.
- Published By: V Santhosh Kumar , Published On : October 10, 2026 / 05:35 PM IST
IMD warned possibility of heavy rain in Andhra Pradesh for next three days.
Rain Alert: ఆంధ్రప్రదేశ్, యానాం పరిసర ప్రాంతాలలో రాబోయే మూడు రోజుల వాతావరణానికి సంబంధించి భారత వాతావరణ శాఖ, రాష్ట్ర విపత్తుల నిర్వహణ సంస్థ కీలక బులెటిన్‌ను విడుదల చేశాయి. దిగువ ట్రోపో ఆవరణంలో ఈశాన్య దిశగా వీస్తున్న వీచే గాలుల ప్రభావంతో ఆంధ్రప్రదేశ్‌లోని పలు జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని అధికారులు వెల్లడించారు. ఇదే సమయంలో తెలంగాణలో రుతుపవనాలు నిష్క్రమించడంతో సాధారణ వాతావరణం నెలకొంటుందని స్పష్టం చేశారు.
కోస్తాంధ్ర, రాయలసీమల్లో ఈదురుగాలులతో కూడిన జల్లులు:
ఏపీ విపత్తుల నిర్వహణ సంస్థ తెలిపిన వివరాల ప్రకారం, శనివారం కోస్తాంధ్ర, రాయలసీమ ప్రాంతాల్లో ఒకటి లేదా రెండు చోట్ల తేలికపాటి జల్లులు(Rain Alert) పడే అవకాశం ఉంది. అలాగే ఆది, సోమవారాల్లో రాష్ట్రంలోని పలు చోట్ల ఉరుములు, మెరుపులతో పాటు గంటకు 30 నుంచి 40 కిలోమీటర్ల వేగంతో బలమైన ఈదురుగాలులు వీచే అవకాశముందని వాతావరణ శాఖ హెచ్చరించింది. తీర ప్రాంత ప్రజలు, రైతులు అప్రమత్తంగా ఉండాలని అధికారులు సూచించారు.
తెలంగాణలో ఆహ్లాదకరమైన వాతావరణం.. మధ్యాహ్నం వేడి:
మరోవైపు తెలంగాణలో నైరుతి రుతుపవనాలు పూర్తిగా నిష్క్రమించడంతో భారీ వర్ష సూచన ఏమీ లేదని వాతావరణ శాఖ పేర్కొంది. రాబోయే మూడు రోజుల పాటు రాష్ట్రంలో ఒకటి రెండు చోట్ల తేలికపాటి చినుకులు తప్ప పెద్దగా వర్షాలు ఉండకపోవచ్చని స్పష్టం చేసింది. ఫలితంగా ఉదయం, సాయంత్రం వేళల్లో వాతావరణం ఆహ్లాదకరంగా చల్లగా ఉంటుందని, అయితే మధ్యాహ్నం వేళల్లో కొద్దిపాటి ఎండ మరియు ఉక్కపోత ప్రభావం కొనసాగుతుందని వాతావరణ శాఖ వివరించింది.
