PSLV-C50 rocket : అంతరిక్ష ప్రయోగాల్లో మరో మైలురాయిని అందుకునేందుకు ఇస్రో రెడీ అయింది.. తనకు అచ్చొచ్చిన రాకెట్‌ PSLV ద్వారా మరో కమ్యూనికేషన్ శాటిలైట్‌ను నింగిలోకి పంపనుంది.. మరి ఈ సారి పంపే శాటిలైట్‌ ప్రత్యేకతలేంటీ? అంతరిక్ష ప్రయోగాల్లో దూసుకుపోతున్న భారత అంతరిక్ష పరిశోధన సంస్థ… మరో ప్రయోగానికి సిద్ధమైంది.. ఇప్పటి వరకూ నమ్మకమైన పీఎస్‌ఎల్వీ రాకెట్ల ద్వారా ఎన్నో శాటిలైట్లను రోదసిలోకి పంపిన ఇస్రో.. ఇప్పుడు PSLV -C50 రాకెట్‌తో CMS-01 శాటిలైట్‌ను అంతరిక్షంలోకి పంపనుంది.
1410 కిలోల బరువున్న ఈ ఉపగ్రహం.. 2011లో ప్రారంభించిన జీశాట్‌-12 కమ్యూనికేషన్ శాటిలైట్‌ను రిప్లేస్‌ చేయనుంది. ఈ ఉపగ్రహంలో ఎక్సెంటెడ్‌ -సీ బాండ్‌ ఫ్రీక్వెన్సీ స్పెక్ట్రం ఉపకరణాలను అమర్చి పంపుతున్నారు.. దీంతో ఈ శాటిలైట్‌ ఇండియాతో పాటు అండమాన్‌, నికోబార్‌ దీవులు, లక్షద్వీప్‌ లాంటి దీవులకు కమ్యూనికేషన్ సేవలను అందించనుంది.. ఏడేళ్ల పాటు ఈ ఉపగ్రహం తన సేవలను అందించనుంది.
సతీష్‌ ధావన్‌ స్పేస్‌ సెంటర్‌ లోని రెండో లాంచ్ ప్యాడ్‌ నుంచి ఈ ప్రయోగాన్ని చేపట్టనున్నారు.. ఈ ప్రయోగాన్ని డిసెంబర్‌ 7నే చేపట్టాలని మొదట ప్లాన్ చేశారు.. కానీ వాతావరణం అనుకూలించక డిసెంబర్‌ 8కు వాయిదా వేశారు.. అప్పుడు కూడా వాతావరణం అనుకూలించకపోవడంతో డిసెంబర్‌ 14కు లాంచ్ డేట్‌ను మార్చారు.. కానీ చివరికి గురువారం మధ్యాహ్నం 3 గంటల 41 నిమిషాలకు రాకెట్‌ ను నింగిలోకి పంపడానికి అన్ని ఏర్పాట్లు చేశారు ఇస్రో శాస్త్రవేత్తలు.
ఇస్రోకు ఇది 42వ కమ్యూనికేషన్ శాటిలైట్‌ లాంచ్ ప్రయోగం.. CMS-01 శాటిలైట్‌ 42 వేల 164 కిలోమీటర్ల ఎత్తులో భూమి చుట్టూ తిరగనుంది.. భూమి ఎంత వేగంతో తిరుగుతుందో.. ఈ ఉపగ్రహం కూడా అంతే వేగంగా భూమి చుట్టు తిరుగుతుందని శాస్త్రవేత్తలు తెలిపారు… దీనిని నింగిలోకి చేర్చడానికి ఇస్రో శాస్త్రవేత్తలు PSLV -XL రాకెట్‌ను ఉపయోగిస్తున్నారు. PSLV కేటగిరిలో ఇది 52వ ప్రయోగం కాగా.. XL కేటగిరిలో ఇది 22వది.. ఇక మొత్తంగా ఇస్రోకు ఇది 77వ రాకెట్‌ ప్రయోగం. ఇప్పటి వరకూ 104 దేశీయ, 32 దేశాలకు చెందిన 234 ఉపగ్రహాలు, 10 స్టూడెంట్‌ శాటిలైట్‌ను ఇస్రో అంతరిక్షానికి చేర్చింది.. ఈ ప్రయోగాన్ని కూడా విజయవంతం చేసి.. మరోసారి సత్తా చాటుతామంటున్నారు ఇస్రో శాస్త్రవేత్తలు.
