CM Vijay: విజయవాడలో తమిళనాడు సీఎం విజయ్.. ఇంద్రకీలాద్రిపై కనకదుర్గమ్మ దర్శనం.. పూర్ణకుంభంతో స్వాగతం పలికిన అర్చకులు!
తమిళనాడు ముఖ్యమంత్రి విజయ్ (CM Vijay)విజయవాడ ఇంద్రకీలాద్రిపై కనకదుర్గమ్మను దర్శించుకుని, సీఎం చంద్రబాబుతో భేటీకి సిద్ధమయ్యారు.
- Published By: V Santhosh Kumar , Published On : October 13, 2026 / 05:19 PM IST
tamil nadu cm vijay visits vijayawada kanaka durga temple meets cm chandrababu
CM Vijay: తమిళనాడు ముఖ్యమంత్రి విజయ్ ఆంధ్రప్రదేశ్‌లోని ప్రముఖ ఆధ్యాత్మిక క్షేత్రమైన విజయవాడ ఇంద్రకీలాద్రిని సందర్శించి, అక్కడ కొలువైన శ్రీ కనకదుర్గ అమ్మవారిని అత్యంత భక్తిశ్రద్ధలతో దర్శించుకున్నారు. చెన్నై నుంచి ప్రత్యేక విమానంలో విజయవాడ విమానాశ్రయానికి చేరుకున్న ఆయనకు స్థానిక అధికారులు, ఆలయ వర్గాలు ఘన స్వాగతం పలికాయి. ముఖ్యమంత్రి హోదాలో తొలిసారిగా ఆంధ్రప్రదేశ్‌కు విచ్చేసిన సీఎం విజయ్‌కు ఆలయ సంప్రదాయం ప్రకారం పండితులు, అర్చకులు పూర్ణకుంభంతో స్వాగతం పలికి అమ్మవారి సన్నిధికి తీసుకెళ్లారు.
Vizianagaram Politics: విజయనగరంలో వైకాపాకు మరో షాక్.. టీడీపీలో చేరిన 3,500 మందికిపైగా నేతలు..
వేదాశీర్వచనం, తీర్థప్రసాదాలు.. సీఎం చంద్రబాబుతో భేటీకి సిద్ధం:
దుర్గమ్మ దర్శనం అనంతరం వేదపండితులు సీఎం విజయ్‌కు(CM Vijay) ప్రత్యేక వేదాశీర్వచనం అందించి, అమ్మవారి శేషవస్త్రాలు, తీర్థప్రసాదాలను అందజేశారు. దైవ దర్శనం ముగించుకున్న తర్వాత ఆయన నేరుగా ఆంధ్రప్రదేశ్ ముఖ్యమంత్రి నారా చంద్రబాబు నాయుడిని కలవడానికి బయలుదేరారు. రాత్రి విజయవాడలో ఘనంగా నిర్వహించనున్న ‘విజయవాడ ఉత్సవ్’ కార్యక్రమంలో కూడా ఆయన పాల్గొననున్నారు. ఉభయ రాష్ట్రాల సంబంధాలు, పలు కీలక అంశాలపై ఇరు రాష్ట్రాల ముఖ్యమంత్రులు చర్చించే అవకాశం ఉంది.
అభిమానుల కోలాహలం.. బెజవాడలో పండుగ వాతావరణం:
తమిళనాడు సీఎంగా బాధ్యతలు చేపట్టిన తర్వాత తొలిసారిగా విజయవాడకు విచ్చేసిన తమ అభిమాన నాయకుడిని చూడటానికి అభిమానులు, ప్రజలు విమానాశ్రయం నుంచి ఇంద్రకీలాద్రి వరకు భారీగా తరలివచ్చారు. సీఎం ప్రయాణించిన వాహనం వెంట అభిమానులు ఉత్సాహంగా పరుగులు తీస్తూ స్వాగతం పలకడంతో విజయవాడ నగరం పండుగ వాతావరణాన్ని తలపించింది. ఈ పర్యటన నేపథ్యంలో అధికారులు నగరంలో కట్టుదిట్టమైన భద్రతా ఏర్పాట్లు పూర్తి చేశారు.
