Bank Unions Strike : ఖాతాదారులకు బిగ్ అలర్ట్.. సెప్టెంబర్ 11న బ్యాంకులు బంద్! ఉద్యోగుల భారీ సమ్మె!

Bank Unions Strike 2026

• సమ్మెకు యూనియన్ల పిలుపు.. కీలక తేదీలు ఇవే
• సెప్టెంబర్‌లో వరుసగా 5 రోజులు సేవలకు బ్రేక్
• 5 రోజుల బ్యాంకింగ్ కోసం ఉద్యోగుల సమ్మెబాట

Bank Unions Strike : సెప్టెంబర్‌లో బ్యాంకులో ఏదైనా పని ఉందా? అయితే, ముందుగానే ప్లాన్ చేసుకోవడం బెటర్. ఎందుకంటే బ్యాంకు ఉద్యోగుల యూనియన్లు దేశవ్యాప్త సమ్మెకు పిలుపునిచ్చాయి. యునైటెడ్ ఫోరం ఆఫ్ బ్యాంక్ యూనియన్స్ (UFBU) ప్రకటించిన షెడ్యూల్ ప్రకారం.. సెప్టెంబర్‌లో రెండు విడతల్లో బ్యాంకు ఉద్యోగులు సమ్మెకు దిగనున్నారు. తమ డిమాండ్లపై ప్రభుత్వం, బ్యాంకు యాజమాన్యాల నుంచి సానుకూల నిర్ణయం రాకపోతే ఉద్యమాన్ని మరింత ఉధృతం చేస్తామని యూనియన్లు హెచ్చరించాయి.

మొదటి విడతగా సెప్టెంబర్ 11, 2026న ఒకరోజు దేశవ్యాప్త సమ్మె జరగనుంది. అనంతరం సెప్టెంబర్ 28 నుంచి 30 వరకు 3 రోజుల సమ్మె కొనసాగనుంది. అప్పటికీ డిమాండ్లు పరిష్కారం కాకపోతే అక్టోబర్ 26 నుంచి నిరవధిక సమ్మె చేపట్టే అవకాశం ఉందని యూఎఫ్‌బీయూ తెలిపింది.

Read Also : Xiaomi 17 Ultra Price : వారెవ్వా.. అమెజాన్ ఆఫర్ అదిరింది.. ఈ షావోమీ అల్ట్రా ఫోన్‌పై రూ. 10వేలు డిస్కౌంట్..!

5 రోజుల బ్యాంకింగ్ డిమాండ్ :
బ్యాంకు ఉద్యోగులు 5 రోజుల బ్యాంకింగ్ వ్యవస్థ అమలు చేయాలని ప్రధానంగా డిమాండ్ చేస్తున్నారు. మార్చి 8, 2024న కుదిరిన 12వ ద్వైపాక్షిక ఒప్పందం, 9వ జాయింట్ నోట్‌లో దీనికి అంగీకారం జరిగినప్పటికీ, రెండేళ్లకు పైగా నిర్ణయం పెండింగ్‌లో ఉందని యూనియన్లు చెబుతున్నాయి. శనివారం సెలవుకు బదులుగా సోమవారం నుంచి శుక్రవారం వరకు రోజువారీ పని సమయాన్ని సుమారు 40 నిమిషాలు పెంచే ప్రతిపాదన ఉంది.

పీఎల్‌ఐపై అభ్యంతరం :
ప్రభుత్వం సవరించిన పనితీరు ఆధారిత ప్రోత్సాహక (PLI) విధానాన్ని ఉపసంహరించాలని కూడా యూనియన్ డిమాండ్ చేస్తోంది. సీనియర్ అధికారులకు, ఇతర ఉద్యోగులకు ప్రోత్సాహకాలలో వ్యత్యాసం ఉందని, తగినంత సంప్రదింపులు లేకుండానే విధానాన్ని అమలు చేశారని యూనియన్లు ఆరోపిస్తున్నాయి.

ఖాతాదారులపై ప్రభావం :
సమ్మె సమయంలో చెక్కుల ప్రాసెసింగ్, శాఖల సేవలు, ఇతర ఆఫ్‌లైన్ బ్యాంకింగ్ పనులు ప్రభావితమయ్యే అవకాశం ఉంది. సెప్టెంబర్ 26, 27 వారాంతపు సెలవులు కాగా నెలాఖరులో కొన్ని ప్రాంతాల్లో శాఖలు వరుసగా 5 రోజులు బ్యాంకు సేవలకు అంతరాయం కలగనుంది. అయితే యూపీఐ, మొబైల్ బ్యాంకింగ్, ఇంటర్నెట్ బ్యాంకింగ్, ఏటీఎం సర్వీసులు సాధారణంగా అందుబాటులో ఉంటాయి.