Digital life certificate
Pension : ప్రభుత్వ రంగ పింఛనుదారులకు బిగ్ అలర్ట్. తమ లైఫ్ సర్టిఫికెట్ (జీవన్ ప్రమాణ పత్రం) సమర్పించారా..? లేదంటే మీకు డిసెంబర్ నెల నుంచి పెన్షన్ రావడంలో అనేక సమస్యలు ఎదురవుతాయి. ఎవరైనా నవంబర్ 30వ తేదీలోపు జీవన్ ప్రమాణ పత్రం ఇవ్వకపోతే పెన్షన్ జారీలో జాప్యం లేదా తాత్కాలికంగా నిలిపివేసే అవకాశాలు ఉన్నాయి. దీంతో పెన్షనర్లపై అనవసరమైన ఒత్తిడి ఆర్థిక ఇబ్బందులు వచ్చే అవకాశం ఉంటుంది.
భారతదేశంలోని అన్ని పెన్షనర్లు ప్రతి సంవత్సరం తమ లైఫ్ సర్టిఫికేట్ (జీవన్ ప్రమాణ్ పత్రం) సమర్పించడం తప్పనిసరి. ఈ పత్రాన్ని సమర్పించడం ద్వారా పెన్షనర్ జీవించి ఉన్నారని ప్రభుత్వం నిర్ధారిస్తుంది. దీని వల్ల పెన్షన్ పొందే హక్కును తిరిగి ధ్రువీకరిస్తారు. ఇది కేంద్ర ప్రభుత్వం, రాష్ట్ర ప్రభుత్వం, వివిధ ప్రభుత్వ సంస్థలు లేదా పబ్లిక్ రంగ సంస్థల నుండి పెన్షన్ పొందుతున్న వారందరికీ వర్తిస్తుంది.
లైఫ్ సర్టిఫికేట్ సమర్పించేందుకు నవంబర్ 30వ తేదీ వరకు ప్రభుత్వం గడువు ఇచ్చింది. ఈ గడువులోగా మీరు మీ జీవన్ ప్రమాణ్ పత్రం సమర్పించాలి. లేదంటే మీకు పెన్షన్ తీసుకొనే విషయంలో అనేక సమస్యలు ఎదురవుతాయి. నవంబర్ 30తో గడువు ముగస్తుంది. గడువు ముగిసిన తరువాత ప్రభుత్వం పొడిగింపు ఇచ్చే అవకాశం తక్కువగా కనిపిస్తోంది.
గడువులోగా మీరు సర్టిఫికెట్లు జత చేయకుంటే.. డిసెంబర్ నెల నుంచి మీ పెన్షన్ ఆగిపోతుంది. మళ్లీ సెంట్రల్ పెన్షన్ ప్రాసెసింగ్ సెంటర్‌కు సర్టిఫికేట్ చేరుకున్న తరువాత.. వాటిని ధ్రువీకరించి అప్పుడు పెన్షన్ ను పునరుద్దరిస్తారు. ఆ తరువాత నిలిచిపోయిన నెలలకు సంబంధించిన పెన్షన్ మొత్తాన్ని కూడా అందిస్తారు.
సులభమైన ప్రక్రియ..
జీవన్ ప్రమాణ్ పత్రం సమర్పించడం చాలా సులభమైన ప్రక్రియ. పెన్షనర్లు తమ బయోమెట్రిక్ అథెంటికేషన్ ప్రాసెస్ ద్వారా ఈ లైఫ్ సర్టిఫికెట్‌ను జనరేట్ చేసి సబ్మిట్ చేయొచ్చు. ఈ సర్టిఫికెట్ ఆటోమేటిక్ గా పెన్షన్ జారీ అధికారులకు చేరుతుంది. నేరుగా ఎలాంటి డాక్యుమెంట్లు ఇవ్వాల్సిన అవసరం లేదు. ఇవాళే చివరి రోజు కావడంతో పెన్షనర్లు తమకు అనువైన మార్గం ద్వారా సర్టిఫికెట్ జనరేట్ చేసుకోవాల్సి ఉంటుంది.
మీ సర్టిఫికెట్ స్థితిని ఎలా తనిఖీ చేయాలి..
మీరు సర్టిఫికెట్‌ను సమర్పించిన తర్వాత పెన్షనర్లు SMS ద్వారా లావాదేవీ IDని అందుకుంటారు. డిజిటల్ లైఫ్ సర్టిఫికేట్‌ను అధికారిక పోర్టల్ నుండి డౌన్‌లోడ్ చేసుకోవచ్చు. అక్కడ మీ సర్టిపికెట్ ఏ స్టేజ్‌లో ఉందోకూడా తెలుసుకోవచ్చు. సర్టిఫికేట్ తిరస్కరించబడి, తిరిగి సమర్పించాల్సిన సందర్భంలో మీరు తనిఖీ చేయడం ముఖ్యం.
