Save Tax Money
Save Tax Money : పన్నుచెల్లింపుదారులకు బిగ్ అలర్ట్.. మీరు మీ డబ్బులు లేదా ఆస్తులను మీ భార్య పేరుతో ట్రాన్స్‌ఫర్ చేస్తున్నారా? లేదంటే.. మీ భార్యనే మీ అకౌంట్లోకి డబ్బులు ట్రాన్స్‌ఫర్ చేస్తున్నారా? అసలు ఇలా చేయడం లీగల్‌గా కరెక్టేనా? ఇలా భార్యకు గిఫ్ట్ రూపంలో నగదు లేదా ఆస్తిని ట్రాన్స్ ఫర్ చేస్తే ఎలాంటి టాక్స్ ఉండదని అంటుంటారు. చాలామంది పన్నుచెల్లింపుదారులు టాక్స్ సేవింగ్ కోసం ఇలా చేస్తుంటారు.
నిజంగా టాక్స్ సేవ్ అవుతుందా? వాస్తవానికి, లీగల్‌గా (Save Tax Money) టాక్స్ ఎలా వర్తిసుందో పట్టించుకోరు. మీ భార్యకు మీరు డబ్బు గిఫ్ట్‌గా ఇవ్వొచ్చు. అది పూర్తిగా లీగల్. ఎలాంటి సందేహం లేదు. పైగా పన్ను చెల్లించాల్సి పనిలేదు. అయినప్పటికీ, గిఫ్ట్ ఇచ్చిన తర్వాతే అసలు సమస్య మొదలవుతుందని నిపుణులు అంటున్నారు. అదేంటో ఇప్పుడు వివరంగా తెలుసుకుందాం..
ఆదాయపు పన్ను చట్టం, 1961లోని సెక్షన్ 56(2)(x) ప్రకారం.. మీ భార్య లేదా భర్త నుంచి స్వీకరించే గిఫ్ట్‌కు పన్ను మినహాయింపు ఉంటుంది. అంటే.. మీ భార్య అకౌంటులో ‘గిఫ్ట్’గా డబ్బును డిపాజిట్ చేయడం వల్ల ఎలాంటి పన్ను పడదు. ఈ మినహాయింపు కింద గిఫ్ట్ ఇచ్చే మొత్తానికి గరిష్ట పరిమితి లేదు. మీ భార్యకు గిఫ్ట్ ఇవ్వడంపై ఎలాంటి పన్ను ఉండదని టాక్స్ ఎక్స్‌పర్ట్ సీఏ షెఫాలి ముంద్రా వివరించారు.
డబ్బు గిఫ్ట్‌గా ఇచ్చినప్పటికీ క్లబ్బింగ్ నిబంధన వల్ల మీ పన్ను భారాన్ని నేరుగా తగ్గించదని నిపుణులు అంటున్నారు. మీ భార్యకు డబ్బును ట్రాన్స్‌ఫర్ చేయడం లేదా గిఫ్ట్‌గా ఇవ్వడం చట్టబద్ధమే. కానీ, అలా చేయడం వల్ల మీ పన్ను బాధ్యత ఆటోమాటిక్‌గా తగ్గదు.
ఎందుకంటే క్లబ్బింగ్ నిబంధనలు మీ చేతుల్లోని ఆదాయంపై పన్ను విధింపు ఉంటుందని బాసిజ్ ఫండ్ సర్వీసెస్ వ్యవస్థాపకుడు, మేనేజింగ్ డైరెక్టర్ సీఏ ఆదిత్య శేష్ అన్నారు. క్లబ్బింగ్ నిబంధన కారణంగా మీరు మీ భార్యకు డబ్బు లేదా ఆస్తిని ట్రాన్స్‌ఫర్ చేసినప్పటికీ ఆ ఆస్తులు లేదా డబ్బు నుంచి వచ్చే ఆదాయంపై పన్ను విధిస్తారు.
సెక్షన్ 64(1)(iv) ప్రకారం.. మీరు మీ భార్యకు ఎలాంటి ప్రతిఫలం పొందకుండా క్యాష్ లేదా ఆస్తులను గిఫ్ట్‌గా ఇస్తే ఆ డబ్బు నుంచి ఆమె సంపాదించే ఏదైనా ఆదాయం మీ ఆదాయానికి తిరిగి యాడ్ అవుతుంది. కేవలం డబ్బును ట్రాన్స్‌ఫర్ చేయడం వల్ల పన్ను భారం మారదు. ఆ డబ్బు నుంచి వచ్చే ఆదాయానికి మీరు బాధ్యత వహించాల్సి ఉంటుందని ముంద్రా అన్నారు.
ఉదాహరణకు.. మీరు మీ భార్యకు రూ. 10 లక్షలు గిఫ్ట్ ఇచ్చారని అనుకుందాం. ఆ గిఫ్ట్ పరంగా పన్ను ఉండదు. కానీ, ఆమె ఆ మొత్తాన్ని ఫిక్స్‌డ్ డిపాజిట్‌లో పెట్టుబడి పెట్టి రూ. లక్ష వడ్డీని సంపాదిస్తే ఆ రూ. 1 లక్షకు మీ పన్ను ఆదాయానికి యాడ్ అవుతుంది. ఆమె షేర్లు లేదా మ్యూచువల్ ఫండ్లలో పెట్టుబడి పెడితే ఆ పెట్టుబడుల నుంచి వచ్చే డివిడెండ్లు, క్యాపిటల్ గెయిన్స్ కూడా మీకు తిరిగి అందుతాయి. గిఫ్ట్ (తిరిగి పెట్టుబడి పెట్టిన ఆదాయం) ఉపయోగించి కొనుగోలు చేసిన ఏదైనా ఆస్తి అమ్మకంపై వచ్చే మూలధన లాభాలు కూడా పన్ను పరిధిలోకి వస్తాయి. జీవిత భాగస్వామి ట్రాన్స్‌ఫర్ చేసిన ఆస్తుల నుంచి ప్రత్యక్షంగా లేదా పరోక్షంగా వచ్చే ఏదైనా ఆదాయం జీవిత భాగస్వామి చేతుల్లో క్లబ్ అవుతుంది.
టాక్స్ సేవింగ్స్ కోసం ఏం చేయొచ్చంటే? :
ముందుగా మీ ఆదాయంపై పన్ను చెల్లించాలి. ఆపై మీ భార్యకు డబ్బు గిఫ్ట్‌గా ఇవ్వడం లీగల్ పరంగా సరైన మార్గమని శేష్ వివరించారు, ముఖ్యంగా మీ భార్య తక్కువ పన్ను స్లాబ్‌లో ఉన్నా లేదా రూ. 12 లక్షల పరిధిలో ఉంటే ఆమె తర్వాతి ఆదాయం లేదా పెట్టుబడులు పన్ను రహితంగా ఉండవచ్చు. గిఫ్ట్‌గా ఇచ్చిన డబ్బుపై పన్ను చెల్లించకుండా ఉండాలంటే పన్ను మినహాయింపు (PPF) లేదా పిన్ మనీలో పెట్టుబడి పెట్టాలని ముంద్రా పన్ను చెల్లింపుదారులకు సూచించారు.
