Texas Hanuman Statue: అమెరికా ఎన్నికల్లో ‘హనుమాన్ విగ్రహ’ వివాదం.. గెలిచాక కూల్చేస్తామన్న యూట్యూబర్.. హిందూ సంఘాల ఆగ్రహం!
అమెరికా మధ్యంతర ఎన్నికల వేడి నడుమ శ్రీరామాంజనేయస్వామి (Texas Hanuman Statue)విగ్రహం రాజకీయ వివాదానికి కేంద్రబిందువుగా మారింది.
- Published By: V Santhosh Kumar , Updated On : September 22, 2026 / 11:35 AM IST
90-foot Hanuman statue Controversy over in Texas during the US elections.
Texas Hanuman Statue: అమెరికా మధ్యంతర ఎన్నికల వేడి నడుమ టెక్సాస్ రాష్ట్రంలో వెలిసిన 90 అడుగుల ఎత్తయిన శ్రీరామాంజనేయస్వామి (Texas Hanuman Statue)విగ్రహం అనూహ్యంగా రాజకీయ వివాదానికి కేంద్రబిందువుగా మారింది. టెక్సాస్లోని షుగర్లాండ్లో ఉన్న ప్రసిద్ధ అష్టలక్ష్మి దేవాలయ ప్రాంగణంలో 2024లో ఈ భారీ హనుమాన్ విగ్రహాన్ని అత్యంత వైభవంగా ప్రతిష్ఠించారు. అయితే, ప్రతిష్ఠాపన జరిగిన సమయం నుంచి స్థానిక కొందరు తీవ్రవాద వర్గాలు, వ్యతిరేకులు ఈ విగ్రహ ఏర్పాటును బహిరంగంగానే వ్యతిరేకిస్తూ తరచూ వ్యాఖ్యలు చేస్తున్నారు. ఎన్నికల ప్రచారం ముమ్మరమవుతున్న తరుణంలో ఈ అంశం అమెరికా రాజకీయాల్లో తీవ్ర చర్చనీయాంశంగా మారింది.
“మేం గెలిచాక కూల్చేస్తాం”.. యూట్యూబర్ వివాదాస్పద పోస్ట్:
తాజాగా జెస్సీ హూజెస్ అనే ప్రముఖ యూట్యూబర్ సోషల్ మీడియాలో ఈ హనుమాన్ విగ్రహం చిత్రాన్ని షేర్ చేస్తూ అత్యంత వివాదాస్పద వ్యాఖ్యలు చేశారు. “రాబోయే ఎన్నికల్లో మేం గెలిచిన వెంటనే ఈ విగ్రహాన్ని నేలమట్టం చేస్తాం” అంటూ పోస్ట్ చేయడంతో ఈ వివాదం ఒక్కసారిగా రాజుకుంది. ఈ వ్యాఖ్యలపై అమెరికాలోని హిందూ సమాజం, ఆధ్యాత్మిక సంఘాలు, వారి మద్దతుదారులు తీవ్ర ఆగ్రహం వ్యక్తం చేస్తున్నారు.
హిందూ సంఘాల ఆగ్రహం.. లౌకికవాదుల మద్దతు:
మత స్వేచ్ఛను హరించేలా ఒక నిర్దిష్ట మతాన్ని లక్ష్యంగా చేసుకుని ఇలాంటి బెదిరింపులకు దిగడం అమెరికా రాజ్యాంగ స్ఫూర్తికి విరుద్ధమని హిందూ ప్రతినిధులు ఆక్షేపించారు. ఈ క్రమంలో పలువురు స్థానిక లౌకికవాదులు, పౌర హక్కుల సంఘాలు కూడా హిందువులకు మద్దతుగా నిలుస్తున్నాయి. ఎన్నికల ప్రచారంలో భాగంగా ఈ అంశాన్ని వివిధ రాజకీయ పార్టీలు తమ ప్రయోజనాలకు వాడుకుంటుండటంతో టెక్సాస్లో రాజకీయ వాతావరణం మరింత వేడెక్కింది.
