Hurricane Ida (1)
Hurricane Ida: ‘ఐదా’ తుపాను లూసియానా తీర ప్రాంతాన్ని వణికిస్తోంది. ప్రమాదకరమైన 4వ కేటగిరీకి చెందిన తుపానుగా చెబుతున్నారు. ఆదివారం తెల్లవారు జాము నుండి క్రమేపీ బలపడుతూ వస్తోంది ఐదా. లూసియానా వద్ద తీరం దాటే అవకాశముందని భావిస్తున్నారు. కరోనా మహమ్మారి ముప్పు పొంచి ఉన్నప్పటికీ నిర్వాసితుల కోసం అధికారులు అత్యవసర ప్రాతిపదికన షెల్టర్లు ప్రారంభించారు.
జాతీయ తుపాను హెచ్చరికల కేంద్రం గంటకు 209 కిలోమీటర్ల వేగంతో భారీ గాలులు వీస్తాయని ప్రకటించింది. లూసియానా, మిస్సిసిపి ప్రాంతాల్లో అత్యవసర పరిస్థితి ప్రకటించారు. 16 ఏళ్ళ క్రితం ఇదే తేదీన సంభవించిన కత్రినా తుపాను ధాటికి లూసియానా, మిస్సిసిపిలను తీవ్రంగా నష్టపోయాయి. మళ్ళీ ఇప్పుడు ఐదా తుపాను అదే రీతిలో వణికిస్తోంది.
కోవిడ్‌ ఇన్ఫెక్షన్లు నెమ్మదిగా పెరుగుతున్న నేపథ్యంలో వ్యాక్సినేషన్ రేటు తక్కువగా ఉండటం, డెల్టా వేరియంట్‌ విస్తృతంగా వ్యాపించడంతో తాజాగా రాబోయే తుపాను ఏ మేర నష్టం చేకూరుస్తుందోనని ఈ ప్రాంతం వణికిపోతోంది. మిస్సిసిపి తీరంలోని గల్ఫ్‌పోర్ట్‌లో తరలింపుదారుల కోసం గైడ్‌లైన్స్, వార్నింగులు ఇస్తూ రెడ్‌క్రాస్‌ షెల్టర్‌ బోర్డు పెట్టారు. వ్యాక్సినేషన్ చేయించుకున్నారా.. లేదా అనేది పరిశీలించడం లేదని అందరినీ మాస్క్‌లు పెట్టుకోవాల్సిందిగా కోరుతున్నామని, రోజుకు 3సార్లు టెంపరేచర్ చెక్‌ చేస్తున్నామని షెల్టర్ల నిర్వాహకులు తెలిపారు.
