Pakistan Emergency : పాకిస్థాన్‌లో ఎమర్జెన్సీ ప్రకంపనలు.. ఇమ్రాన్ ఖాన్ పార్టీ ప్రభుత్వంపై వేటు!

Imran Khan's provincial government suspended

• పాకిస్థాన్‌లో పెను రాజకీయ ప్రకంపనలు..
• ఇమ్రాన్ ఖాన్ పార్టీ ప్రభుత్వానికి ప్రెసిడెంట్ షాక్
• ఉగ్రవాదం పేరుతో సంచలన నిర్ణయం..
• ప్రావిన్షియల్ ప్రభుత్వాన్ని సస్పెండ్ చేసిన అధ్యక్షుడు

Pakistan Emergency : పాకిస్థాన్ రాజకీయాల్లో మరోసారి తీవ్ర కలకలం రేగింది. జైల్లో ఉన్న మాజీ ప్రధాని ఇమ్రాన్ ఖాన్‌కు చెందిన పాకిస్థాన్ తెహ్రీక్-ఇ-ఇన్సాఫ్ (పీటీఐ) పార్టీ అధికారంలో ఉన్న ఖైబర్ పఖ్తుంఖ్వా ప్రావిన్స్ ప్రభుత్వాన్ని అధ్యక్షుడు ఆసిఫ్ అలీ జర్దారీ సస్పెండ్ చేశారు. రాష్ట్రంలో ఉగ్రవాద దాడులను అడ్డుకోవడంలో ప్రభుత్వం విఫలమైందన్న ఆరోపణల నేపథ్యంలో అత్యవసర పరిస్థితిని ప్రకటించినట్లు అధ్యక్ష కార్యాలయం వెల్లడించింది.

6 నెలల పాటు కొత్త పాలన :
ప్రధాని షెహబాజ్ షరీఫ్ సిఫార్సు, కేంద్ర మంత్రివర్గ నిర్ణయం మేరకు ఈ చర్య తీసుకున్నట్లు సమాచారం. అత్యవసర పరిస్థితి అమల్లో ఉండే సమయంలో ప్రావిన్స్ పాలనా బాధ్యతలను గవర్నర్ చేపడతారని న్యాయశాఖ మంత్రి ఆజమ్ నజీర్ తరార్ తెలిపారు. గవర్నర్‌కు సలహా మండలి సహకరిస్తుందని, ప్రస్తుతానికి ఈ ఏర్పాటు 6 నెలల పాటు కొనసాగుతుందని స్పష్టం చేశారు.

పాకిస్థాన్‌లోని ఆఫ్ఘనిస్థాన్ సరిహద్దు ప్రాంతమైన ఖైబర్ పఖ్తుంఖ్వాలో ఇటీవలి కాలంలో ఉగ్రవాద దాడులు పెరిగాయి. ఈ దాడులను నియంత్రించడంలో ప్రావిన్స్ ప్రభుత్వం విఫలమైందని కేంద్ర ప్రభుత్వం, పాక్ సైన్యం ఆరోపిస్తున్నాయి. అయితే, ఈ వాదనలను పీటీఐ పార్టీ ఖండిస్తోంది. ఉగ్రవాదాన్ని ఎదుర్కొనేందుకు అవసరమైన నిధులు, పరికరాలను కేంద్రం అందించడం లేదని ఎదురుదాడి చేస్తోంది.

కేంద్రం నిర్ణయంపై పీటీఐ ఆగ్రహం :

తాజా పరిణామంపై ఇమ్రాన్ ఖాన్ పార్టీ తీవ్రంగా స్పందించింది. అత్యవసర పరిస్థితి పేరుతో ప్రజాస్వామ్య ప్రభుత్వాన్ని కూల్చే ప్రయత్నం జరుగుతోందని పార్టీ నేత జుల్ఫికర్ బుఖారీ ఆరోపించారు. ఈ నిర్ణయం వల్ల సమస్యలు తగ్గకపోగా, హింస, రాజకీయ అస్థిరత మరింత పెరిగే ప్రమాదం ఉందని హెచ్చరించారు.

Read Also : PM Kisan – Annadata Sukhibhava : ఏపీ రైతులకు భారీ గుడ్ న్యూస్.. దసరా ముందే ఖాతాల్లో ఒకేసారి రూ.6వేలు..?

మరోవైపు, ఇమ్రాన్ ఖాన్ విడుదల కోసం పీటీఐ కార్యకర్తలు ఆందోళనలు చేపడుతున్నారు. ఇస్లామాబాద్‌కు భారీ ర్యాలీగా వెళ్లేందుకు పార్టీ సిద్ధమవుతున్న నేపథ్యంలో అధికారులు భద్రతను కట్టుదిట్టం చేశారు. ఇమ్రాన్ ఖాన్ సోదరీమణులు సహా పలువురు పార్టీ కార్యకర్తలను అదుపులోకి తీసుకున్నట్లు సమాచారం. ప్రావిన్స్ ముఖ్యమంత్రి సోహైల్ అఫ్రిదీ కార్యాలయానికి వెళ్లే మార్గాలను కూడా పోలీసులు దిగ్బంధించినట్లు స్థానికులు తెలిపారు.

ఇమ్రాన్ ఖాన్ ఆరోగ్యంపై వివాదం :
ఇమ్రాన్ ఖాన్ ఆరోగ్య పరిస్థితి, ఆయనకు మెరుగైన వైద్యం అందించాలన్న డిమాండ్ల నేపథ్యంలో కూడా ఉద్రిక్తతలు కొనసాగుతున్నాయి. ద్రవ్యోల్బణం, పెరుగుతున్న ఇంధన ధరలతో ప్రజల్లో అసంతృప్తి నెలకొంది.

2024 ఎన్నికల్లో తన పార్టీకి అన్యాయం జరిగిందని ఇమ్రాన్ ఖాన్ మద్దతుదారులు ఆరోపిస్తున్నారు. అయితే, ఎన్నికల్లో అక్రమాలకు పాల్పడినట్లు వచ్చిన ఆరోపణలను సైన్యం ఖండిస్తోంది. ఇమ్రాన్ ఖాన్‌పై పలు కేసులు ఉండగా, ఆయన మాత్రం తనపై రాజకీయ కక్షతోనే చర్యలు తీసుకుంటున్నారని చెబుతున్నారు.

అత్యవసర పరిస్థితి ప్రకటనతో పాకిస్థాన్‌లో కేంద్ర ప్రభుత్వం, పీటీఐ మధ్య పోరు మరింత ముదిరే సూచనలు కనిపిస్తున్నాయి. భద్రతా సమస్యలు, రాజకీయ వివాదాలు కలిసి దేశంలో పరిస్థితిని మరింత సంక్లిష్టంగా మార్చనున్నాయి.