టోక్యో : భారత్ లో లైంగిక వేధింపులకు గురైన మహిళలంతా ‘మీటూ‘ ఉద్యమం ద్వారా గళమెత్తారు. ఈ వేధింపులకు పరిష్కారం దొరకకపోయినా..తమకు జరిగిన అన్యాయాన్ని తెలియజేశారు మహిళలు. దీంతో బడా బడా వ్యక్తుల గుట్టు బైటపడింది. పెద్ద మనుషులుగా చెలామణి అయిన కొందరి ప్రముఖులను ‘మీటూ’ ఓ కుదుపు కుదిపింది. దేశం ఏదైనా మహిళలపై మాత్రం ఏదో విధమైన వేధింపులు జరుగుతునే ఉన్నాయి. దీనికి ధనిక దేశం..పేద దేశం అనే తేడా లేదు. ఈ క్రమంలో టాప్ ఆఫ్ ది ఎర్త్ గా పేరొందిన జపాన్ దేశంలో మహిళా ఉద్యోగినులపై ఓ విచిత్రమైన వేధింపులకు ఫలితంగా ‘కూటూ’ ఉద్యమం తెరపైకి వచ్చింది.
‘మీటూ’ ఉద్యమంలాగానే జపాన్ లో అదే తరహాలో సామాజిక వేదికల అండగా ‘కూటూ’ ఉద్యమం తెరపైకి వచ్చింది. జపాన్ ఆఫీసుల్లో మహిళా ఉద్యోగినులకు సూట్ తో పాటు హైహీల్స్ ను తప్పనిసరి చేశారు. దీంతో మహిళలు హైహీల్ తప్పని చేయటాన్ని ప్రశ్నిస్తున్నారు. ఆఫీసుల్లో పనిచేస్తున్నంత సేపు హైహీల్స్ వేసుకోవటంతో కాళ్లలో బ్లడ్ సర్య్కులేషన్ తగ్గిపోవటంతో పాటు కాలు స్లిప్ అయితే గాయాలపాలయ్యే అవకాశముందని జపనీస్ మహిళలు ఆందోళన వ్యక్తం చేస్తున్నారు. అందుకే ‘కూటూ’ పేరుతో ఆన్ లైన్ ఉద్యమానికి తెరలేపారు. పురుషులతో సమానంగా మహిళలు కూడా పనిచేస్తున్నారనీ..అలాంటప్పుడు ఇద్దరినీ వేర్వేరుగా ఎందుకు చూస్తున్నారనీ..వేర్వేరుగా చూడడం ఎందుకని జపాన్ ఉద్యోగినులు ప్రశ్నిస్తున్నారు. జపనీస్ భాషలో ‘కూట్సు’ అంటూ బూట్లు అనే అర్థం వస్తుంది. అందులోంచి మొదటి అక్షరాన్ని తీసుకుని ‘కూటూ’ పేరుతో ఉద్యమం లేవనెత్తారు.
