PNS Hangor Submarine: సముద్రంలో పాకిస్తాన్ సైనిక శక్తి పెంపు.. చైనా సబ్‌మెరైన్ ‘హంగోర్’ క్షిపణి ప్రయోగం.. భారత్‌కు సవాలు!

పాకిస్తాన్ నావికాదళం ‘పిఎన్‌ఎస్ హంగోర్(PNS Hangor Submarine)’ జలఅంతర్గామి అరేబియా సముద్రంలో తొలిసారిగా సజీవ క్షిపణి ప్రయోగాన్ని విజయవంతంగా నిర్వహించింది.

Pakistan navy pns hangor submarine conducts maiden live missile firing in arabian sea

PNS Hangor Submarine: పాకిస్తాన్ నావికాదళం ఇటీవల చైనా నుంచి కొనుగోలు చేసిన నూతన ‘పిఎన్‌ఎస్ హంగోర్(PNS Hangor)’ జలఅంతర్గామి అరేబియా సముద్రంలో తొలిసారిగా సజీవ క్షిపణి ప్రయోగాన్ని విజయవంతంగా నిర్వహించింది. సెప్టెంబర్ 27న జరిగిన ఈ సైనిక విన్యాసాల్లో సుదూర లక్ష్యాన్ని యాంటీ-షిప్ క్రూయిజ్ మిస్సైల్‌తో ఖచ్చితంగా ఛేదించినట్లు పాకిస్తాన్ నేవీ ప్రకటించింది. నావికాదళాధిపతి అడ్మిరల్ నవీద్ అష్రఫ్ ఈ ప్రయోగాన్ని ప్రత్యక్షంగా పర్యవేక్షించగా, ఈ జలఅంతర్గామి యుద్ధ సన్నద్ధతకు మరియు దాడి సామర్థ్యానికి ఇది నిదర్శనమని పాక్ పేర్కొంది.

Read Also – AP Heavy Rains: బంగాళాఖాతంలో మరో తీవ్ర వాయుగుండం.. ఆంధ్రప్రదేశ్‌కు భారీ వర్ష సూచన.. తీర ప్రాంతాలకు హై అలర్ట్

చైనా సాంకేతికతతో నిర్మాణం – హంగోర్ సబ్‌మెరైన్ ప్రత్యేకతలు:

పాకిస్తాన్ చైనాతో చేసుకున్న ఒప్పందంలో భాగంగా మొత్తం 8 హంగోర్-క్లాస్ జలఅంతర్గాములను పొందుతోంది. అందులో 4 చైనాలో, మిగిలిన 4 కరాచీ షిప్‌యార్డ్‌లో నిర్మించనున్నారు. టైప్ 039A/B యువాన్ క్లాస్ ఆధారంగా రూపొందించిన మొదటి సబ్‌మెరైన్ ‘పిఎన్‌ఎస్ హంగోర్’ ఈ ఏడాదే పాక్ నేవీలో చేరింది. 2,800 టన్నుల బరువు, 76 మీటర్ల పొడవు ఉండే ఈ సబ్‌మెరైన్ డీజిల్-ఎలక్ట్రిక్ విధానంతో పాటు అధునాతన ‘ఎయిర్-ఇండిపెండెంట్ ప్రొపల్షన్’ సాంకేతికత కలిగి ఉంది.

ఎఐపి సాంకేతికత ప్రాముఖ్యత – సుదీర్ఘకాలం నీటి అడుగున ఉనికి:

సాధారణ డీజిల్-ఎలక్ట్రిక్ జలఅంతర్గాములు బ్యాటరీలను ఛార్జ్ చేసుకోవడానికి తరచూ నీటి ఉపరితలానికి రావలసి వస్తుంది, దీనివల్ల శత్రువుల కంటపడే ప్రమాదం ఎక్కువ. కానీ ఏఐపి వ్యవస్థ ఉన్న సబ్‌మెరైన్లు వాతావరణ ఆక్సిజన్‌పై ఆధారపడకుండా సుదీర్ఘకాలం నీటి అడుగునే దాగి ఉండగలవు. దీనివల్ల శత్రు నావికాదళ కదలికలపై నిఘా పెట్టడం, రహస్యంగా దాడులు చేయడం, శత్రువుల కంటికి చిక్కకుండా తప్పించుకోవడం ఈ జలఅంతర్గామికి ఎంతో సులువవుతుంది.

Also Read – Hyderabad Metro: హైదరాబాద్ మెట్రోపై తెలంగాణ ప్రభుత్వం కీలక నిర్ణయం.. దసరా నాటికి ఫేజ్-1 స్వాధీనం.. డెడ్‌లైన్ ఫిక్స్

భారత్‌కు వ్యూహాత్మక సవాలు – అరేబియా సముద్రంలో మారనున్న సమీకరణాలు:

అరేబియా సముద్రంలో సుదూర శ్రేణి క్రూయిజ్ క్షిపణులను ప్రయోగించగల హంగోర్ సబ్‌మెరైన్ల రాక భారత నావికాదళ భద్రతా వ్యూహాలకు సవాలుగా మారనుంది. ముఖ్యంగా ఐఎన్‌ఎస్ విక్రాంత్, ఐఎన్‌ఎస్ విక్రమాదిత్య వంటి భారత యుద్ధనౌకలకు ఇవి ముప్పుగా పరిణమించే అవకాశముంది. అంతేకాకుండా భవిష్యత్తులో ఈ జలఅంతర్గాముల నుంచి అణు సామర్థ్యం ఉన్న ‘బాబర్-3’ క్షిపణులను ప్రయోగించేందుకు వీలుగా పాకిస్తాన్ తమ రెండో దాడి సామర్థ్యాన్ని బలోపేతం చేసుకుంటోంది.