Daiet Plan
Diet Plan : మనిషి తన జీవన విధానంలో బ్రతకటం కోసం ఆహారం తీసుకుంటాడు. తీసుకుంటున్న ఆహారం వల్ల ఏమేరకు ఆరోగ్యవంతం అన్న ఆలోచనను ఏమాత్రం చేయలేకపోతున్నాడు. ఉరుకుల పరుగుల జీవితంలో కనీసం తీసుకునే ఆహారంపైన దృష్టి సారించలేకపోతున్నాడు. క్రమపద్దతిలో తన రోజు వారి డైట్ ప్లాన్ ను ముందుగా నిర్ధేశించుకుని దానిని ఆచరిస్తే తప్పకుండా ఆరోగ్యం సమకూరుతుందని న్యూట్రిషియన్ నిపుణులు సైతం సూచిస్తున్నారు. తీసుకునే ఆహారం శరీరానికి అవసరమైన విటమిన్లు, పోషకాలు అందించేదిగా ఉండాలని చెప్తున్నారు. రోజు వారిగా అనుసరించాల్సిన డైట్ ప్లాన్ గురించి నిపుణుల సూచన ప్రకారం…
ఉదయం నిద్ర లేవగానే గోరు వెచ్చని నీళ్లలో నిమ్మరసం, తేనె కలిపి తాగాలి. తర్వాత నానబెట్టిన బాదం పప్పులు 5 లేదా 6, రెండు నల్ల ఖర్జూరాలు తీసుకోవాలి. దాని తర్వాత నడక లాంటి వ్యాయామం చేయాలి. సూర్యరశ్మి తగిలేలా చేస్తే విటమిన్‌ డి లభిస్తుంది. అల్పాహారంగా పెసరట్టు తీసుకోవచ్చు. ఇది మంచి ప్రొటీన్‌ కలిగిన ఆహారం. ఇందులో కాస్త పచ్చిమిర్చి, అల్లం వంటివి వినియోగిస్తే యాంటీ ఇన్‌ఫ్లమేటరీగా పనిచేస్తాయి. పెసరట్టుకు పల్లీ చట్నీ జతచేస్తే దీని ద్వారా యాంటీ ఆక్సిడెంట్స్, ఫ్యాటీ యాసిడ్స్‌ అందుతాయి. కాబట్టి రెండు పెసరట్లు చట్నీతో కలిపితినాలి. టిఫిన్ పూర్తయ్యాక బొప్పాయి, జామకాయ, పుచ్చకాయ, మామిడి రెండేసి ముక్కలు తీసుకోవచ్చు.
బ్రేక్‌ఫాస్ట్‌కి లంచ్‌ చేసే సమయానికి మధ్యస్త సమయంలో సుమారుగా 11 గంటల ప్రాంతంలో అల్లం, పచ్చిమిర్చి, కరివేపాకు, కీరా ముక్కలు కలిపిన మజ్జిగ లేదా కొబ్బరి నీళ్లు తాగడం మంచిది. మధ్యాహ్న భోజనంలో పచ్చి లేదా ఉడికించిన క్యారెట్ , బీట్ రూట్ ముక్కలు ఉండేలా చూసుకోవాలి. నేరుగా తినలేకపోతే పెరుగు చట్నీలా మిక్స్‌ చేసుకుని తినొచ్చు. బ్రౌన్‌ రైస్, బ్లాక్‌ రైస్ లేదా కొర్రలతో అన్నం, పప్పు, ఆకుకూర తీసుకోవాలి. నాన్ తినే అలవాటు ఉన్నవారు ఫిష్ తీసుకోవచ్చు. మొలకెత్తిన గింజల్ని కాయగూరలతో కలిపి కూరలా చేసుకుని తినొచ్చు.
సాయంత్రం 5గంటల సమయంలో గ్రీన్‌ లేదా బ్లాక్‌ టీ మంచిది. పొద్దుతిరుగుడు, గుమ్మడి గింజలు, నువ్వులు, ఫ్లాక్స్‌ సీడ్స్‌ వంటి వాటికి డ్రై ఫ్రూట్స్‌ కలిపి ఒకట్రెండు గుప్పెళ్లు స్నాక్స్‌ కింద తీసుకోవచ్చు. నేరుగా తీసుకోలేకపోతే చిన్నమంట మీద కొద్దిగా వేపి కాస్త మిరియాల పొడి, ఉప్పు కలిపి తీసుకోవచ్చు. రాత్రికి రాగిముద్ద, లేదంటే జావగానైనా తింటే మంచిది. 8గంటల లోపుగానే డిన్నర్ పూర్తిచేసుకోవాలి. డిన్నర్ గా ఓట్స్ తీసుకోవచ్చు. దానికి తోడుగా కూరను యాడ్ చేసుకోవచ్చు. ఉడికించిన గుడ్డు, చీజ్, పన్నీర్‌ జత చేసి తీసుకోవచ్చు.ఇక ప్రోబయాటిక్స్‌ కోసం పెరుగు, మజ్జిగ వంటివి రెగ్యులర్‌గా తీసుకోవాలి. ప్రీ బయాటిక్స్‌ కోసం బ్రెడ్, ఇడ్లీ వంటివి తీసుకోవచ్చు.
ప్రతిరోజు ఇలాంటి మెనును ప్రతి ఒక్కరు తమ డైట్ ప్లాన్ గా అనుసరిస్తే ఆరోగ్యంగా వ్యాధులు దరిచేరకుండా చూసుకోవచ్చు. అంతే కాదు చేసే పనిలో సైతం ఉత్సాహంగా, ఉల్లాసంగా గడిపేందుకు అవకాశం ఉంటుంది.
