Bharathanatyam : ‘భరతనాట్యం’ మూవీ రివ్యూ.. క్రైం కామెడీతో వచ్చిన ‘దొరసాని’ డైరెక్టర్..

‘దొరసాని’ లాంటి పీరియాడికల్ లవ్ స్టోరీ సినిమాతో మంచి విజయం సాధించిన డైరెక్టర్ కెవిఆర్ మహేంద్ర తాజాగా తన రెండో సినిమా 'భరతనాట్యం'తో నేడు ప్రేక్షకుల ముందుకు వచ్చాడు.

Director KVR Mahendra Bharathanatyam Movie Review

Bharathanatyam : విజయ్ దేవరకొండ తమ్ముడు ఆనంద్ దేవరకొండ, రాజశేఖర్ కూతురు శివాత్మికలను పరిచయం చేస్తూ ‘దొరసాని’ లాంటి పీరియాడికల్ లవ్ స్టోరీ సినిమాతో మంచి విజయం సాధించిన డైరెక్టర్ కెవిఆర్ మహేంద్ర తాజాగా తన రెండో సినిమా ‘భరతనాట్యం’తో నేడు ఏప్రిల్ 5న ప్రేక్షకుల ముందుకు వచ్చాడు. కొత్త వాళ్ళు సూర్య తేజ ఏలే, మీనాక్షి గోస్వామి జంటగా లేడీ నిర్మాత పాయల్ సరాఫ్ నిర్మాణంలో తెరకెక్కిన సినిమా భరతనాట్యం. వైవా హర్ష, హర్షవర్ధన్, అజయ్ ఘోష్.. పలువురు ముఖ్య పాత్రలు పోషించారు.

కథ విషయానికొస్తే.. రాజు సుందరం(సూర్యతేజ) సినిమా ఫీల్డ్ లో ఓ అసిస్టెంట్ డైరెక్టర్ గా వర్క్ చేస్తూ ఉంటాడు. అతనికి ఇంట్లో కష్టాలు, తన గర్ల్ ఫ్రెండ్(మీనాక్షి గోస్వామి) ఇంట్లో ఒప్పించడానికి.. వీటన్నిటికీ డబ్బులు కావాలి. మరోపక్క దిల్ షుఖ్ నగర్ దివాకర్(హర్షవర్ధన్) ఆ ఏరియాలో పెద్ద రౌడీ షీటర్. దందాలు, డ్రగ్స్ డీలింగ్స్ చేస్తూ ఉంటాడు. రాజు సుందరం డైరెక్టర్ గా అవ్వాలని కథలు చెప్తూ ఉంటాడు. కొత్త కథల కోసం మన్మధుడు సినిమాలో నాగార్జున టేబుల్ కింద మైక్స్ పెట్టి విన్నట్టు అలాంటివి తెప్పించి పబ్లిక్ ప్లేసుల్లో పెట్టి అందరూ మాట్లాడేవి విని కథలు రాసుకుంటూ ఉంటాడు.

అలా ఓ రోజు రెండు కోట్ల డీల్ అని వినడంతో తన కష్టాలు తీరడానికి బెస్ట్ అవకాశం అని ఆ మైక్ లో వినిపించిన అడ్రెస్ కి వెళ్తాడు. అక్కడ భగతనాట్యం అనే ఓ డ్రగ్ చేతులు మారడానికి డీల్ జరుగుతుండగా డబ్బుల బ్యాగ్ అనుకోని డ్రగ్స్ బ్యాగ్ కొట్టుకొచ్చేస్తాడు రాజు సుందరం. ఆ డ్రగ్స్ ని డబ్బులు చేసుకుందాం అనుకునే క్రమంలో పోలీసాఫీసర్ శకుని(అజయ్ ఘోష్)కి దొరుకుతాడు. ఆ డ్రగ్స్ రాజు ఏం చేసాడు? డ్రగ్స్ కొట్టేసినందుకు రాజుని దివాకర్ గ్యాంగ్ ఏం చేశారు? మధ్యలో హీరో అవుదామని ఇండస్ట్రీకి వచ్చిన భుషే(వైవాహర్ష) కథేంటి? పోలీసుల నుంచి రాజు ఎలా తప్పించుకున్నాడు.. ఇవన్నీ తెలియాలంటే తెరపై చూడాల్సిందే.

సినిమా విశ్లేషణ.. టైటిల్ భరతనాట్యం అని పెట్టి క్రైం కామెడీ తీశారు. పోనీ కథలో టైటిల్ కి ఏమన్నా కనెక్టివిటీ ఉంటుందా అంటే ఓ డ్రగ్ కి ఈ పేరు పెట్టారు. కానీ సినిమాలో అన్ని చోట్ల భరతనాట్యం బదులు భగతనాట్యం అనే వినిపిస్తుంది. సెన్సార్ వాళ్ళు ఓ డ్రగ్ కి భరతనాట్యం అనే పేరు పెడితే అభ్యంతరం తెలిపితే భగతనాట్యం అని మళ్ళీ మార్చినట్టు అనిపిస్తుంది. సినిమా చూస్తున్నంతసేపు అసలు ఇది దొరసాని డైరెక్టర్ చేసిన సినిమానేనా అనిపిస్తుంది. ఫస్ట్ హాఫ్ అంతా క్యారెక్టర్స్ పరిచయంతోనే సాగుతుంది, అసలు కథేంటి అనేది ఇంటర్వెల్ వరకు కూడా అర్ధం కాదు. దానికి తోడు స్లో నేరేషన్. ఫస్ట్ హాఫ్ అంతా బోర్ కొడుతుంది. డార్క్ కామెడీ ట్రై చేసినా అస్సలు వర్కౌట్ అవ్వలేదు. ఫస్ట్ హాఫ్ అంతా రాజు సుందరం, దిల్ షుఖ్ నగర్ దివాకర్ గురించి మిగిలిన పాత్రల గురించి చూపించి డబ్బుల కోసం దొంగతనానికి సిద్దపడి డ్రగ్స్ దొరకడంతో ఇంటర్వెల్ మాత్రం ఆసక్తిగా ఇస్తారు.

ఇక సెకండ్ హాఫ్ ఆ డ్రగ్స్, డబ్బుల కోసం అందరూ తిరగడం, నిఖిల్ స్వామిరారా సినిమా ఫార్మేట్ స్క్రీన్ ప్లే ట్రై చేసినా అంతగా వర్కౌట్ అవ్వలేదు. కానీ ఫస్ట్ హాఫ్ కంటే సెకండ్ హాఫ్ కొంచెం బెటర్ అనిపిస్తుంది. చివర్లో విలన్ తమ్ముడ్ని నేనే చంపాను అని హీరో ఒప్పుకొని, మళ్ళీ ఎలా చనిపోయాడో తెలుసా, వేరే పాలీసాఫీసర్ చంపాడు అంటూ విలన్ ని కమెడియన్ ని చేసి సోది చెప్పి ఎస్కెప్ అవ్వడం ఎక్కడా లాజిక్ లేకుండా ఉంటుంది. చివర్లో ప్రేక్షకుల ఓపికకి పరీక్ష అన్నట్టు క్లైమాక్స్ ఉంటుంది. దానికి తోడు చివర్లో పార్ట్ 2 ప్రకటించడం గమనార్హం.

Also Read : Krishnamma : ‘సింహాద్రి’ రిఫరెన్స్‌తో సత్యదేవ్ ‘కృష్ణమ్మ’.. రిలీజ్ ఎప్పుడంటే..

నటీనటుల విషయానికొస్తే.. కొత్తవాడైనా సూర్యతేజ బాగానే యాక్ట్ చేసాడు. మీనాక్షి గోస్వామి మాత్రం గెస్ట్ పాత్రలా అప్పుడప్పుడు వచ్చి మెరిపించి హిందీ, తెలుగు మిక్సింగ్ భాషలో మాట్లాడి వెళ్ళిపోతుంది. ఈ సినిమాలో హీరో అవ్వాలనే పాత్రలో ఇండస్ట్రీకి వచ్చిన వ్యక్తిగా వైవా హర్ష మాత్రం బాగా మెప్పిస్తాడు. అతని వల్లే కాసేపైనా నవ్వుకుంటాము. ఓ రకంగా చెప్పాలంటే వైవా హర్షనే సెకండ్ హాఫ్ ఎక్కువగా నడిపిస్తాడు. పోలీసాఫీసర్ గా అజయ్ ఘోష్, దిల్‌షుఖ్ నగర్ దివాకర్ గా హర్షవర్ధన్, అతని తమ్ముడిగా టెంపర్ వంశీ.. మిగిలిన పాత్రలు ఓకే అనిపిస్తాయి.

సాంకేతిక అంశాలు.. సినిమాటోగ్రఫీ పర్వాలేదు. కాకపోతే కొన్ని సీన్స్ మాత్రం మాములు కెమెరాతో తీసినట్టు ఉంటాయి విజువల్స్. మాములు క్రైం కథే ఏవైనా దానికి డార్క్ కామెడీ ట్రై చేస్తూ రాసుకున్న స్క్రీన్ ప్లే చాలా ల్యాగ్ అనిపిస్తుంది. దొరసాని లాంటి బ్యూటిఫుల్ సినిమా తీసిన దర్శకుడు మహేంద్ర ఈ భరతనాట్యం సినిమా తీశారంటే మాత్రం నమ్మలేము. ప్రమోషన్స్ లో సూర్య ఈ కథ రాసుకొని, ప్రొడ్యూసర్ తెచ్చుకొని చివరగా దర్శకుడు ఎంటర్ అయినట్టు చెప్పారు. దీంతో సినిమా వాళ్ళు తీసి మహేంద్ర పేరు వేసుకున్నారేమో అని కూడా అనిపిస్తుంది. నిర్మాణ విలువలు కొత్త ప్రొడ్యూసర్స్, చిన్న బడ్జెట్ కాబట్టి పర్లేదు. ఇక సాంగ్స్ ఒక్కటి కూడా కనెక్ట్ అవ్వవు. కొన్ని చోట్ల బ్యాక్ గ్రౌండ్ మ్యూజిక్ మాత్రం పర్లేదు అనిపిస్తుంది.

మొత్తంగా భరతనాట్యం క్రైం కామెడీ అని చెప్పి ప్రేక్షకులు సినిమాలో కామెడీ, క్రైం వెతుక్కునేలా చేసిన సినిమా.

గమనిక : ఈ సినిమా రివ్యూ & రేటింగ్ కేవలం విశ్లేషకుడి వ్యక్తిగత అభిప్రాయం మాత్రమే.