Ram Gopal Varma : బెట్టింగ్ యాప్స్ ప్రమోషన్స్ పై రాంగోపాల్ వర్మ కీలక వ్యాఖ్యలు..

బాలీవుడ్ లో చాలామంది నటులు గుట్కా యాడ్స్ చేశారని వర్మ గుర్తు చేశారు.

Ram Gopal Varma : బెట్టింగ్ యాప్స్ ప్రమోషన్స్ కు తాను వ్యతిరేకం అన్నారు డైరెక్టర్ రాంగోపాల్ వర్మ. అలాంటి యాప్స్ ను ప్రమోట్ చేయడం ఏ మాత్రం మంచిది కాదన్నారు. నటీనటులను బెట్టింగ్ యాప్స్ ప్రమోషన్ కోసం అడిగితే ఏది మంచో ఏది చెడో తెలుసుకోవడం కష్టమన్నారు. సంబంధిత అధికారులు వీటిపై ముందే నటీనటులకు అవగాహన కల్పించాలన్నారు వర్మ. బాలీవుడ్ లో చాలామంది నటులు గుట్కా యాడ్స్ చేశారని వర్మ గుర్తు చేశారు.

బెట్టింగ్ యాప్స్ తో చాలామంది సాధారణ ప్రజలు, యువత ఆస్తులు, ప్రాణాలు పోగొట్టుకుంటుండటంతో పోలీసులు దీనిపై ఫోకస్ చేశారు. బెట్టింగ్ యాప్స్ ప్రమోషన్ వ్యవహారాన్ని సీరియస్ గా తీసుకున్నారు. బెట్టింగ్ యాప్ లను ప్రమోట్ చేసిన టీవీ, సినీ సెలబ్రిటీలపై కొరడా ఝళిపిస్తున్నారు. ఆ యాప్స్ ను ప్రమోట్ చేసి ఇన్ ఫ్లుయన్సర్లు, యూట్యూబర్లపై కేసులు నమోదు చేస్తున్నారు. కేసులు నమోదు చేసి విచారణకు పిలుస్తున్నారు.

ఇప్పటికే ఈ వ్యవహారంలో టేస్టీ తేజ, కానిస్టేబుల్ కిరణ్, విష్ణుప్రియ, రీతూ చౌదరిలను పోలీసులు ప్రశ్నించారు. ఇవాళ విష్ణుప్రియ, రీతూ చౌదరిలు వేర్వేరుగా పంజాగుట్ట పోలీసుల ఎదుట విచారణకు హాజరయ్యారు. వారి స్టేట్ మెంట్లను నమోదు చేసుకున్నారు.

విష్ణుప్రియ స్టేట్ మెంట్ ను నమోదు చేసిన పోలీసులు సంచలన విషయాలను రాబట్టారు. మొత్తం 15 బెట్టింగ్ యాప్స్ ను ఆమె ప్రమోట్ చేసినట్లుగా గుర్తించారు. ఒక్కొ ప్రమోషన్ కు 90వేల రూపాయలు తీసుకున్నట్లు పోలీసుల విచారణలో విష్ణుప్రియ అంగీకరించినట్లు సమాచారం.

Also Read : పంజాగుట్ట పోలీస్ స్టేషన్ లో రీతూ చౌదరి.. బెట్టింగ్ యాప్స్ ప్రమోషన్ కేసులో విచారణ

ప్రముఖ సోషల్ మీడియా ప్లాట్ ఫామ్ ఇన్ స్టాగ్రామ్ వేదికగా విష్ణుప్రియ బెట్టింగ్ ప్రమోషన్ చేసినట్లుగా గుర్తించారు. ఎంత డబ్బు తీసుకున్నారు? ఏ ఖాతాకు ఆ నగదును బదిలీ చేశారు? అనేదానిపై ఆమె బ్యాంక్ స్టేట్ మెంట్ ను తీసుకున్నారు. విచారణ తర్వాత విష్ణుప్రియ పర్సనల్ మొబైల్ ఫోన్ ను పోలీసులు సీజ్ చేశారు.