MM Keeravani : ‘ఆస్కార్’ వచ్చిన తర్వాత కీరవాణి మొదటి సినిమా ప్రమోషనల్ ఇంటర్వ్యూ.. ‘నా సామిరంగ’ ప్రమోషన్స్ లో..

ఆస్కార్ అందుకున్న అనంతరం కీరవాణి పలు సినిమా ఈవెంట్స్ లో మాట్లాడినా తాజాగా మొదటిసారి మీడియాతో ముఖాముఖీ మాట్లాడారు. నా సామిరంగ ప్రమోషన్స్ లో భాగంగా కీరవాణి మీడియాతో ముచ్చటించి సినిమా గురించి, సంగీతం గురించి పలు ఆసక్తికర విషయాలు తెలిపారు.

MM Keeravani Exclusive Interview on Nagarjuna Naa Saam Ranga Movie Promotions

MM Keeravani : నాగార్జున (Nagarjuna) ఈ సంక్రాంతికి జనవరి 14న ‘నా సామిరంగ’ సినిమాతో రాబోతున్నాడు. ఈ సినిమాలో అల్లరి నరేష్, రాజ్ తరుణ్ కూడా ముఖ్య పాత్రలు పోషిస్తున్నారు. హీరోయిన్స్ గా ఆషికా రంగనాథ్ (Ashika Ranganath), మిర్నా మీనన్, రుక్సార్ థిల్లాన్ నటిస్తున్నారు. డ్యాన్స్ మాస్టర్ విజయ్ బిన్నీ దర్శకత్వంలో ఈ సినిమా తెరకెక్కుతుండగా ఇప్పటికే వచ్చిన సాంగ్స్, గ్లింప్స్, టీజర్ తో సినిమాపై అంచనాలు నెలకొన్నాయి. ఇక ఈ సినిమాకి ఆస్కార్ విజేత MM కీరవాణి సంగీతం అందిస్తున్నారు.

RRR సినిమాలో నాటు నాటు పాటకు ఆస్కార్ అందుకొని మొదటి తెలుగువారిగా కీరవాణి, చంద్రబోస్ సరికొత్త చరిత్ర సృష్టించిన సంగతి తెలిసిందే. ఆస్కార్ అందుకున్న అనంతరం కీరవాణి పలు సినిమా ఈవెంట్స్ లో మాట్లాడినా తాజాగా మొదటిసారి మీడియాతో ముఖాముఖీ మాట్లాడారు. నా సామిరంగ ప్రమోషన్స్ లో భాగంగా కీరవాణి మీడియాతో ముచ్చటించి సినిమా గురించి, సంగీతం గురించి పలు ఆసక్తికర విషయాలు తెలిపారు.

Also Read : Guntur Kaaram : సూపర్ స్టార్ లాగే సూపర్ స్టార్.. ఈ వీడియో చూశారా?

#మీరు చాలా సెలక్టివ్ గా సినిమాలు చేస్తుంటారు.. ఆస్కార్ తో వచ్చిన హైప్ వల్ల ‘నా సామిరంగా’ పై దాని ప్రభావం ఎలా ఉంటుంది?

నేను మొదటి నుంచి సెలక్టివ్ గానే చేస్తున్నాను. ఒక సినిమాకి హైప్ అనేది రిలీజ్ అయ్యే పాటల ద్వారా వస్తుంది. ఆస్కార్ అనేది ఒక సినిమా సక్సెస్ కి కొంచెం కూడా పని చేయదని భావిస్తాను. నా వరకూ నేను బాగా వర్క్ చేయాలి. డైరెక్టర్ బాగా తీయాలి. అది జనాలకి కనెక్ట్ కావాలి.

#నా సామిరంగకి పని చేయడానికి ఆసక్తి కనబరిచిన అంశాలు ఏమిటి?

నాగార్జున గారితో పని చేయడం నాకు అలవాటైన విద్య. మా కాంబినేషన్ ఎప్పుడూ విజయం సాధిస్తూ వచ్చింది. ఈ సినిమా కూడా మంచి విజయం సాధిస్తుందనే నమ్మకం వుంది. కొత్త దర్శకుడు బిన్నీ ఈ సినిమాతో పరిచయం అవుతున్నాడు. కొత్త దర్శకులు ఎలాగైనా నిరూపించుకోవాలనే కసితో పని చేస్తారు. అలాంటి కొత్త దర్శకులతో పని చేయడం ఆసక్తిగా ఉంటుంది.

#నాగార్జున గారితో ప్రెసిడెంట్ గారి పెళ్ళాం, అల్లరి అల్లుడు నుంచి అన్నమ్మయ్య, శ్రీరామ దాసు.. ఇలా అన్ని వైవిధ్యమైన చిత్రాలు చేశారు.. నా సామిరంగ ఎలాంటి కొత్త అనుభూతిని ఇచ్చింది?

ప్రెసిడెంటు గారి పెళ్ళాం ఎంతటి ఘన విజయం సాధించిందో నా సామిరంగ కూడా అలాంటి విజయం అందుకుంటుంది. ప్రెసిడెంటు గారి పెళ్ళాం విలేజ్ నేపధ్యం వున్న సినిమా. ఇది కూడా అంతే. అందులో ఎన్ని రకాల వినోదాత్మకమైన అంశాలు ఉంటాయో ఇందులో కూడా అన్నీ ఉన్నాయి. ఇది మరో ప్రెసిడెంటు గారి పెళ్ళాం అవుతుందని ఆశిస్తున్నాను. ‘నా సామిరంగ’ నాగార్జున గారికి యాప్ట్ టైటిల్. తెలుగు సాంప్రదాయం, మన కట్టుబాట్లు, నేటివిటీ, సంక్రాంతి పండగ కళ ఉట్టిపడేలా ఈ చిత్రాన్ని రూపొందించారు. సంగీతం కూడా ఫ్రెష్ గా ఉంటుంది.

#ఇందులో మీరు సంగీతమే కాకుండా ఒక పాట రాశారు కదా ?

ఈ చిత్రానికి సింగిల్ కార్డ్ చంద్రబోస్ గారే. అయితే అన్నం తిన్నప్పుడు కొంచెం పచ్చడి నంచుకుంటాం. అలా అని పచ్చడి తిన్నామని ప్రత్యేకంగా చెప్పం కదా ఇదీ అంతే. నేను లిరిక్ రైటర్ ని కాదు. ఎవరైన వచ్చి రాయమని అడిగినా రాయను. కానీ రిరీకార్డింగ్ చేసినప్పుడు ఒక సందర్భం వస్తుంది. అలాంటి సందర్భంలో నుంచి ఆలోచన వస్తుంది. సందర్భం వచ్చింది కాబట్టి రాశాను. అవసరమైతేనే రాస్తాను.

#కొత్త దర్శకుడు విజయ్ బిన్నీలో మీరు గమనించిన అంశాలు ఏమిటి ?

చాలా త్వరగా నిర్ణయాలు తీసుకుంటారు. దాని వలనే ఎక్కడా క్వాలిటీ తగ్గకుండా త్వరగా ఈ సినిమా తీయగలిగాడు. క్వాలిటీ తగ్గకుండా తొందరగా సినిమా తీయడం తన ప్రధాన బలం అని భావిస్తున్నాను. తను డ్యాన్స్ మాస్టర్ కాబట్టి ప్రతి పాట డ్యాన్స్ కోణంలో అలోచించడం సహజం. కానీ దానికి భిన్నంగా ఇందులో చాలా మంచి మూడు మెలోడీస్ చేయించారు. తను పరిపక్వత వున్న దర్శకుడనిపించింది.

#ఇప్పుడు పాట ఎంతలా వైరల్ అయ్యిందనేది పాట విజయానికి కొలమానం అయింది.. కొన్ని మంచి పాటలు కొన్ని సార్లు వైరల్ కావు.. దీన్ని ఎలా చూస్తారు?

పాట వైరల్ అవ్వడం అనేది మన చేతిలో లేదు. ఒకప్పుడు పాట హిట్ అయ్యిందా లేదా తెలుసుకోవాలంటే ఏదైనా పెళ్లికి వెళ్లి.. అక్కడ బ్యాండ్ లో ఆ పాట ప్లే చేస్తున్నారా లేదా అనే దాని బట్టి తెలుసుకునే వాళ్ళం. ఇప్పుడు వ్యూస్ ని బట్టి తెలుస్తోంది. నిజాయితీగా పని చేయడం మాత్రమే మన చేతిలో వుంది. వైరల్ అనేది మన చేతిలో లేదు.

Also Read : Guntur Kaaram : గుంటూరు కారం రన్ టైం ఎంతో తెలుసా..? సెన్సార్ సర్టిఫికెట్ ఏంటి..?

#ఈ మధ్య కాలంలో మ్యూజిక్ పరంగా మీకు నచ్చిన చిత్రాలు ?

యానిమల్ బావుంది. జైలర్ నేపధ్య సంగీతం నచ్చింది. ఆ మ్యూజిక్ డైరెక్టర్ కి మెసేజ్ కూడా పెట్టాను.

#మీరు చేసిన పాటల్లో మిమ్మల్ని వెంటాడే పాటలు?

ఒక యాభై, వంద వరకూ వుంటాయి.

#రాజమౌళి గారితో చేయబోయే కొత్త సినిమా వర్క్ ఎప్పుడు నుంచి మొదలవుతుంది?

దాని గురించి తెలుసుకోవాలంటే రాజమౌళి కి ఫోన్ చేసి కనుక్కోవాలి. ఫోన్ చేస్తే అది ఆఫ్ లో ఉంటుంది. అంటే ఇంకా వర్క్ నా వరకూ రాలేదని అర్ధం.

#హరిహరవీరమల్లు పాటలు గురించి ?

ప్రస్తుతానికి మూడు పాటలు రికార్డ్ చేశాం. క్రిష్ గారు, కళ్యాణ్ గారు అందుబాటులోకి వచ్చాక మిగిలిన వర్క్ ఉంటుంది.

#చిరంజీవి గారి సినిమా వర్క్ ఎంతదాక వచ్చింది ?

ప్రస్తుతం చిరంజీవి లేని పోర్షన్ షూటింగ్ జరుగుతోంది. మ్యూజిక్ సిట్టింగ్స్ స్టార్ట్ అయ్యాయి.