ఢిల్లీ: వచ్చే సార్వత్రిక ఎన్నికల్లో ఉత్తరప్రదేశ్ లో స్వీప్ చేస్తామని, ఎస్పీ, బీఎస్పీకి పరాభవం తప్పదని కేంద్ర హోంమంత్రి రాజ్ నాధ్ సింగ్ అన్నారు. గతంలో గెలిచిన 72 స్ధానాలను తిరిగి గెలుచుకుంటామని ఆయన ధీమా వ్యక్తం చేశారు. విపక్షాలు ఎన్ని కూటములు కట్టినా 72స్ధానాల్లో గెలిచి తీరుతామని ఆయన అన్నారు.
ఉత్తరప్రదేశ్ లో మొత్తం 80 పార్లమెంట్ స్దానాలున్నాయి. 2014లో జరిగిన ఎన్నికల్లో బీజేపీ 71 స్ధానాలు కైవసం చేసుకుంది. ఈ ఎన్నికల్లో బీజేపీ మిత్రపక్షం అప్నాదళ్ రెండు సీట్లు గెలవగా సమాజ్‌వాదీ పార్టీ 5, కాంగ్రెస్ 2 సీట్లు గెలుచుకోగా, బీఎస్పీ ఒక్క స్థానంలో కూడా గెలుచుకోలేకపోయింది.
యూపీలో బీజేపీ హావాకు అడ్డుకట్ట వేసేందుకు దశాబ్దాల తరబడి బధ్ధ శత్రువులుగా ఉన్న ఎస్పీ, బీఎస్పీ పార్టీలు తమ మధ్య వైరాన్ని పక్కన పెట్టి వచ్చే లోక్ సభ ఎన్నికల్లో చెరి 38 స్ధానాల్లో పోటీ చేయాలని నిర్ణయానికి వచ్చాయి. మిగిలిన నాలుగు స్ధానాల్లో రాయబరేలి, అమేధి కాంగ్రెస్ పార్టీకి ఇవ్వగా మిగిలిన రెండింటిలో ఆర్ఎల్డీ వంటి పార్టీలకు ఇవ్వాలని అనుకున్నారు. కాగా యూపీలో ఒంటరిగానే పోటీ చేస్తామని కాంగ్రెస్ నాయకులు ప్రకటనలు ఇస్తున్నారు.
