ISRO NVS-03 Satellite Launch : ఇస్రో మరో విజయం.. నింగిలోకి దూసుకెళ్లిన NVS-03 ఉపగ్రహం.. దీనివల్ల అద్భుత ఉపయోగాలు ఇవే..
ISRO NVS-03 Satellite Launch : భారతదేశ సొంత ఉపగ్రహ నావిగేషన్ వ్యవస్థ ‘నావిక్’ను మరింత బలోపేతం చేసే NVS-03 ఉపగ్రహాన్ని ఇస్రో విజయవంతంగా కక్ష్యలోకి ప్రవేశపెట్టింది.
- Published By: Harish Thanniru , Updated On : October 31, 2026 / 7:31 AM IST
ISRO Successfully Launches NVS-03 Satellite
ISRO Successfully Launches NVS-03 Satellite : భారత అంతరిక్ష పరిశోధనా సంస్థ (ఇస్రో) మరో అద్భుత విజయాన్ని అందుకుంది. భారతదేశ సొంత ఉపగ్రహ నావిగేషన్ వ్యవస్థ ‘నావిక్’ను మరింత బలోపేతం చేసే NVS-03 ఉపగ్రహాన్ని ఇస్రో విజయవంతంగా కక్ష్యలోకి ప్రవేశపెట్టింది. జీఎస్ఎల్వీ-ఎఫ్18 (GSLV-F18) రాకెట్ ద్వారా ఈ ప్రయోగాన్ని చేపట్టింది. శుక్రవారం రాత్రి 11.51 గంటలకు ఆంధ్రప్రదేశ్‌లోని శ్రీహరికోట సతీష్ ధావన్ అంతరిక్ష కేంద్రం నుంచి రాకెట్ నింగిలోకి దూసుకెళ్లింది.
సుమారు 20 నిమిషాల ప్రయాణం తరువాత NVS-03 ఉపగ్రహాన్ని నిర్దేశిత జియోసింక్రోనస్ ట్రాన్స్‌ఫర్ ఆర్బిట్‌ (GTO)లోకి ప్రవేశపెట్టింది. ఈ ప్రయోగంతో ఇండియా తన సొంత నావిగేషన్ వ్యవస్థను మరింత పటిష్ఠం చేసుకునే దిశగా కీలక ముందడుగు పడింది. ఉపగ్రహాన్ని నిర్దేశిత భూస్థిర కక్ష్యలోకి చేర్చడంతో శాస్త్రవేత్తలు హర్షం వ్యక్తం చేశారు.
NVS-03 ఉపగ్రహం ఇస్రో రూపొందిస్తున్న రెండో తరం నావిగేషన్ ఉపగ్రహాల శ్రేణిలో మూడోది. భారతదేశానికి స్వతంత్ర నావిగేషన్ సేవలను అందించే నావిక్ వ్యవస్థలో ఇది కీలక పాత్ర పోషించనుంది. ప్రస్తుతం అమెరికాకు చెందిన జీపీఎస్ తరహాలో భారత్ కూడా సొంతంగా నావిగేషన్ సేవలను అందించేందుకు ఈ వ్యవస్థను అభివృద్ధి చేసింది. ఈ వ్యవస్థ ద్వారా భారత భూభాగంతో పాటు దేశ సరిహద్దుల నుంచి సుమారు 1,500 కిలోమీటర్ల పరిధి వరకు స్థాన నిర్ధారణ, దిశానిర్దేశం, సమయ సమాచార సేవలు అందుతాయి. రవాణా, నౌకాయానం, వాహనాల ట్రాకింగ్, రైల్వేలు, వ్యూహాత్మక కార్యకలాపాలకు ఇవి ఉపయోగపడతాయి.
ఈ ఉపగ్రహంలో స్వదేశీ పరిజ్ఞానంతో తయారు చేసిన అటామిక్ క్లాక్‌ను అమర్చడం మరో విశేషం. దీనితో పాటు విదేశాల నుంచి సేకరించిన అటామిక్ క్లాక్‌లను కూడా ఉపయోగించారు. ఉపగ్రహ నావిగేషన్ వ్యవస్థల్లో అత్యంత కచ్చితమైన సమయ సమాచారం చాలా ముఖ్యం. అటామిక్ క్లాక్ సాయంతో సమయ నిర్ధారణ మరింత ఖచ్చితంగా జరిగే అవకాశం ఉంటుంది. అలాగే ఇప్పటివరకు ఉన్న L5, S బ్యాండ్ సిగ్నల్స్‌కు అదనంగా కొత్తగా L1 సిగ్నల్‌ను కూడా NVS-03లో చేర్చారు. దీనివల్ల నావిక్ వ్యవస్థ సామర్థ్యం పెరగడంతో పాటు వివిధ నావిగేషన్ పరికరాలకు అనుకూలత మెరుగుపడనుంది.
మళ్లీ అందుబాటులోకి నావిక్..
ఎన్వీఎస్-03 ప్రయోగం ద్వారా భారత నావిక్ వ్యవస్థ కనీస కార్యాచరణ స్థాయికి తిరిగి చేరుకుంది. గతంలో కొన్ని ఉపగ్రహాల సేవలు, సాంకేతిక సమస్యల కారణంగా ఈ వ్యవస్థకు ఇబ్బందులు ఎదురయ్యాయి. ఇప్పుడు ఎన్వీఎస్-03 విజయవంతంగా కక్ష్యలోకి చేరడంతో మొత్తం నాలుగు ఉపగ్రహాలతో కనీస కార్యాచరణ సామర్థ్యం పునరుద్ధరించబడిందని ఇస్రో ఛైర్మన్ వి. నారాయణన్ వెల్లడించారు. భారతదేశానికి స్వతంత్రంగా స్థాన నిర్ధారణ, నావిగేషన్, సమయ సేవలు అందించడంలో నావిక్ కీలకమైన జాతీయ ఆస్తి అని ఆయన పేర్కొన్నారు. రైళ్లు, వాహనాలు, నౌకల రియల్ టైమ్ ట్రాకింగ్ వంటి పౌర అవసరాలకు కూడా ఈ వ్యవస్థ ఉపయోగపడుతుందని వివరించారు.
ఇస్రోకు మరో రికార్డు..
జీఎస్ఎల్వీ-ఎఫ్18 ప్రయోగం భారత జియోసింక్రోనస్ శాటిలైట్ లాంచ్ వెహికల్ చరిత్రలో 20వ ప్రయోగం. సుమారు 50 మీటర్ల ఎత్తు, 420 టన్నుల ప్రయోగ బరువు కలిగిన ఈ మూడు దశల రాకెట్ 2,232 కిలోల బరువున్న ఎన్వీఎస్-03 ఉపగ్రహాన్ని మోసుకెళ్లింది. మరో విశేషం ఏమిటంటే.. గత జీఎస్ఎల్వీ ప్రయోగం తర్వాత కేవలం 56 రోజుల్లోనే ఇస్రో మరో ప్రయోగాన్ని విజయవంతంగా నిర్వహించింది. ఇది ఇప్పటివరకు రెండు జీఎస్ఎల్వీ ప్రయోగాల మధ్య నమోదైన అతి తక్కువ వ్యవధి అని ఇస్రో ఛైర్మన్ తెలిపారు. ఈ విజయంతో భారత అంతరిక్ష రంగంలో దేశీయ సాంకేతిక పరిజ్ఞానం, స్వయం సమృద్ధి దిశగా మరో కీలక ముందడుగు పడింది.
Mission Success!
GSLV-F18 has successfully placed NVS-03 in the intended orbit.
Congratulations!Watch live: https://t.co/6X42ANRnTC
Mission details:
https://t.co/wtZ6TmjUhc#GSLVF18 #NVS03 #ISRO #NavIC
— ISRO (@isro) October 30, 2026
@isro Congratulations 🥳 https://t.co/ccxhDvKOD1
— बैरागी (@VairagiUvaaCH) October 30, 2026
