తెలంగాణ సోలార్ ప్రాజెక్ట్ అదానీ చేతుల్లోకి!

Adani Green Buys 50 Mw Solar Project

తెలంగాణలోని 50 మెగావాట్ల సోలార్‌ ప్రాజెక్టును అదానీ గ్రూప్‌ అనుబంధ సంస్థ అదానీ గ్రీన్‌ ఎనర్జీ లిమిటెడ్‌ (ఏజీఈఎల్‌) దక్కించుకుంది. కెనడాకు చెందిన స్కైపవర్‌ గ్లోబల్‌తో ఈ మేరకు ఒప్పందం చేసుకున్నట్లు ఏజీఈఎల్‌ వెల్లడించింది. తెలంగాణలో 50 మెగావాట్ల సోలార్‌ ప్రాజెక్టును ఓ స్పెషల్‌ పర్పస్‌ వెహికిల్‌(NPV) ద్వారా టోరంటో కేంద్రంగా నడుస్తున్న స్కైపవర్‌ గ్లోబల్‌ నిర్వహిస్తోంది.

2017వ సంవత్సరంలో అక్టోబర్‌ నెలలో ఇది ఏర్పాటు కాగా.. తెలంగాణ సదరన్‌ పవర్‌ డిస్ట్రిబ్యూషన్‌ కంపెనీతో దీర్ఘకాల విద్యుత్తు కొనుగోలు ఒప్పందం చేసుకున్నది. ఈ క్రమంలో ఇప్పుడు ఈ ప్రాజెక్టును అదానీ గ్రూప్‌ దక్కించుకుంటున్నది. కాగా, ఈ ప్రాజెక్టుతో తమ రెన్యువబుల్‌ ఎనర్జీ విభాగం మరింత బలోపేతం అయ్యిందని ఏజీఈఎల్‌ ప్రకటనలో తెలిపింది.

2025 నాటికి 25 గిగావాట్ల ఉత్పాదక సామర్థ్యాన్ని చేరుకోవాలని కంపెనీ లక్ష్యంగా పెట్టుకుంది. ప్రస్తుతం సంస్థ 14.86 గిగావాట్ల రెన్యువబుల్‌ ఎనర్జీని ఉత్పత్తి చేస్తుంది.