cm revanth reddy
Revanth Reddy : మాజీ ముఖ్యమంత్రి, బీఆర్ఎస్ అధినేత కేసీఆర్ తెలంగాణ ఆత్మను చంపేశారని సీఎం రేవంత్ రెడ్డి విమర్శించారు. ఆదివారం హైదరాబాద్ ప్రెస్‌క్లబ్ ఆధ్వర్యంలో నిర్వహించిన మీట్ ది ప్రెస్ కార్యక్రమంలో రేవంత్ పాల్గొని మాట్లాడారు. ఈ సంరద్భంగా కేసీఆర్‌తోపాటు మాజీ మంత్రులు కేటీఆర్, హరీశ్ రావులపై సంచలన కామెంట్స్ చేశారు.
పదేళ్లలో 20లక్షల కోట్లు కేసీఆర్ బడ్జెట్‌కు వచ్చాయి.. వీటితో నికరంగా చేసింది ఏమిటి అంటూ రేవంత్ రెడ్డి ప్రశ్నించారు. కేసీఆర్ తెలంగాణ ఆత్మను చంపేశారు. ఇరిగేషన్ కోసం ఖర్చు చేసిన.. లక్ష ఎనభై ఆరు వేలకోట్లతో ఒక్క ప్రాజెక్ట్ నిర్మించారా..? ఎకరాకైనా నీళ్లు ఇచ్చారా అంటూ రేవంత్ రెడ్డి ప్రశ్నించారు.
కేటీఆర్ జీవితంలో సీఎం అయ్యే రేఖనే లేదని రేవంత్ రెడ్డి జోస్యం చెప్పారు. కాంగ్రెస్ ప్రభుత్వం హయాంలో మూడు కోట్ల పది లక్షల మందికి సన్న బియ్యం ఇస్తున్నాం. కేసీఆర్ అమల్లోకి తెచ్చిన పథకాలను రద్దు చేయలేదు.. అదనంగా కొత్త పథకాలను అందుబాటులోకి తెచ్చామని రేవంత్ రెడ్డి తెలిపారు.
ఎస్సీ వర్గీకరణకు శాశ్వత పరిష్కారం చేసిది మా కాంగ్రెస్ ప్రభుత్వం. స్వాతంత్ర్యం తరువాత తొలిసారి కులగణను చేశామని రేవంత్ రెడ్డి అన్నారు. పదేళ్లు పట్టించుకోని తెలంగాణ గీతం, తెలంగాణ తల్లి విగ్రహంను ఏర్పాటు చేశాం. నాడు కాంగ్రెస్ తెచ్చిన గోదావరి నీళ్లను కేసీఆర్ నెత్తిన జల్లుకున్నారు. డేటా సెంటర్లు డెబ్బై శాతం హైదరాబాద్‌కు తీసుకొచ్చామని రేవంత్ రెడ్డి పేర్కొన్నారు.
మూసీ నది ప్రక్షాళనకు మోదీ తాబేదార్లు అడ్డుకుంటున్నారు. మొన్న వరదలు వచ్చినప్పుడు కిషన్ రెడ్డి ఆ ప్రాంతానికి ఎందుకు వెళ్లలేదు..? గుజరాత్‌కు కిషన్ రెడ్డి గులాం గిరి చేస్తున్నారు. పీఎం కార్యాలయం నుంచి బెదిరించి హైదరాబాద్ కంపెనీలను గుజరాత్ తీసుకెళ్తున్నారంటూ రేవంత్ రెడ్డి ఆరోపించారు. అయినా, కిషన్ రెడ్డి ఎందుకు ప్రశ్నించడం లేదు..? కేటీఆర్‌తో కిషన్ రెడ్డి సోపతి మానుకోలేకపోతున్నారని రేవంత్ అన్నారు.
60వేలకుపైగా నిరుద్యోగులకు ఉద్యోగాలు మా ప్రభుత్వం ఇచ్చింది. నాడు మెట్రోను బ్లాక్ మెయిల్ చేసింది కేసీఆర్ కాదా..? ఫ్యూచర్ సిటీ నిర్మాణానికి మా ప్రభుత్వం తలపెట్టింది . మాది గ్రోత్ ఇంజన్.. మోదీ, కేసీఆర్ విలాసవంతమైన జీవితం, పాలన చేశారు. ఓఆర్ఆర్‌ను అమ్ముకున్నది కేసీఆర్ ప్రభుత్వం కాదా..? కేటీఆర్, హరీశ్‌లది పైశాచిక ఆనందం. కేటీఆర్‌కు అంత అసహనం ఎందుకు..? హరీశ్, కేటీఆర్ విషం నింపుకొని అసెంబ్లీలో కూర్చుంటున్నారని రేవంత్ రెడ్డి అన్నారు.
ఫేక్ సర్వేలను నమ్మొద్దు..
జూబ్లీహిల్స్ ఉప ఎన్నికల్లో ఫేక్ సర్వేలను నమ్మొద్దని రేవంత్ రెడ్డి నియోజకవర్గ ప్రజలకు సూచించారు. మాది ప్రజాపాలన.. విడతల వారిగా ప్రతి సమస్యను పరిష్కరిస్తాం. ఎవరిది అగ్రికల్చర్.. ఎవరిది డ్రగ్ కల్చర్‌నో ప్రజలు ఆలోచించాలి. ఎవరు ప్రజలతో ఉన్నారో.. ఎవరు సినీ తారలతో ఉన్నారో ఆలోచించండి అని రేవంత్ రెడ్డి అన్నారు. గ్రేటర్‌లో మా ఎమ్మెల్యేలు లేరు.. జూబ్లీహిల్స్ లో గెలిపించండి.. అభివృద్ధి వేగంగా జరుగుతుందని రేవంత్ రెడ్డి కోరారు. బీఆర్ఎస్ ఎమ్మెల్యేలు ఎవరూ అభివృద్ధికి సహకరించడం లేదు. నాడు.. పీజేఆర్ సతీమణిని అవమానించిది కేసీఆర్.. ఉప ఎన్నికల్లో విషబీజం నాటింది కేసీఆర్ అంటూ రేవంత్ రెడ్డి విమర్శించారు. నేను జూబ్లీహిల్స్ గెలవాల్సిందే.. అభివృద్ధి చేయాల్సిందే.. ఫేక్ సర్వేలను నమ్మొద్దు అంటూ రేవంత్ రెడ్డి పేర్కొన్నారు.
2034 వరకు కాంగ్రెస్‌దే అధికారం..
జమిలి ఎన్నికలు వస్తాయి. 2028లో ఎన్నికలు రావు.. 2029 జూన్ నెలలో ఎన్నికలు జరుగుతాయి. 2034 జూన్ వరకు తెలంగాణలో కాంగ్రెస్ పార్టీ అధికారంలో ఉంటుందని సీఎం రేవంత్ రెడ్డి అన్నారు. మా పదేళ్ల పాలనలో వందేళ్ల అభివృద్ధి చేసి చూపిస్తామని రేవంత్ చెప్పారు.
నన్ను బెదిరించడానికి ప్రైవేట్ కాలేజీలు బంద్ చేశారు. ఆరు నెలలు బంద్ చేస్తే పిల్లల భవిష్యత్ ఏం కావాలి..? విద్య వ్యాపారం కాదు.. సేవ. ఫీజులు ఇస్తారా.. లేదా అని బంద్ చేయించి బెదిరిస్తారా..? పంతాలు, పట్టింపులకు పోతే సమస్య పరిష్కారం కాదు. రూల్స్ ప్రకారం వెళ్దామంటే చెప్పండి సిద్ధంగా ఉన్నా. 100శాతం రూల్స్ పాటించే కాలేజీలకు తక్షణమే బకాయిలు ఇస్తా అంటూ సీఎం రేవంత్ రెడ్డి వ్యాఖ్యానించారు.
