Cyber Fraud In Hyderabad
Cyber Fraud In Hyderabad : సైబర్ నేరగాళ్ల మోసాలు రోజురోజుకు పెరిగిపోతున్నాయి. ఫేస్‌బుక్, సోషల్ మీడియా ప్లాట్‌ఫాంలలో కొందరిని టార్గెట్ చేసి వారితో పరిచయం పెంచుకొని.. వారికి మాయమాటలు చెప్పి కోట్లు కొట్టేస్తున్న ఘటనలు వెలుగులోకి వస్తున్నాయి. ఇదే తరహాలో హైదరాబాద్‌లో భారీ మోసం జరిగింది. ఫేస్‌బుక్‌లో పరిచయమైన మహిళ హైదరాబాద్‌లోని ఓ డాక్టర్‌కు మాయమాటలు చెప్పి.. సీఎంసీ ట్రేడ్ మార్కెట్లో ఇన్వెస్ట్ చేసేలా‌చేసి ఏకంగా రూ.14కోట్లు కొట్టేసింది. చివరకు మహిళ మోసం చేసిందని గుర్తించిన డాక్టర్.. సైబర్ క్రైం పోలీసులను ఆశ్రయించాడు. పూర్తి వివరాల్లోకి వెళితే..
హైదరాబాద్ ఎర్రగడ్డ ప్రేమ్‌నగర్ ప్రాంతానికి చెందిన ఓ వ్యక్తి ప్రైవేట్ ఆస్పత్రిలో డాక్టర్ గా పనిచేస్తున్నాడు. ఆగస్టు 27న ఫేస్‌బుక్ మెసెంజర్‌లో ఆయనకు మోనికా మాధవన్ పేరుతో రిక్వెస్ట్ వచ్చింది. దానిని యాక్సెప్ట్ చేసిన సదరు డాక్టర్.. ఆ మహిళతో చాట్ చేయడం ప్రారంభించాడు. కొద్దికాలం ఇద్దరి మధ్య చాటింగ్ నడిచింది. కొన్నాళ్ల తరువాత వీరి మధ్య చనువు ఏర్పడటంతో పర్సనల్ విషయాలు చెప్పుకోవడం ప్రారంభించారు. ఈ క్రమంలో సదరు మహిళ.. తనకు పెళ్లి అయిందని, అయితే, నా భర్తతో విడిపోయి ఒంటరిగా ఉంటున్నానని.. విడాకుల కేసు కోర్టులో పెండింగ్ లో ఉందని చెప్పింది.
వీరి పరిచయం కాస్త వాట్సాప్, టెలిగ్రామ్‌లలో చాటింగ్స్ వరకు వెళ్లింది. ఇద్దరు వారివారి పర్సనల్ ఫొటోలను కూడా షేర్ చేసుకున్నారు. డాక్టర్ తన మాటలను నమ్మాడని భావించిన సదరు మహిళ తాను సీఎంసీ మార్కెట్స్ ట్రేడింగ్ ఇన్వెస్ట్ చేస్తూ రోజుకు రూ.4లక్షల నుంచి రూ.5లక్షలు సంపాదిస్తున్నానని చెప్పింది. తనతో కలిసి జాయింట్ ఇన్వెస్ట్ చేయాలని కోరింది. వెబ్ లింక్ కూడా పంపించింది. ఆమె మాటలు నమ్మిన వైద్యుడు.. సీఎంసీ ట్రేడ్ మార్కెట్లో ఇన్వెస్ట్ చేయడం ప్రారంభించాడు.
సెప్టెంబర్ 3న మొదటి విడతగా రూ.30లక్షలు పెట్టుబడి పెట్టాడు. ఇందుకుగాను మొదటి ట్రేడింగ్ లో రూ.8.6లక్షల లాభం వచ్చినట్లు చూపించింది. ఆ తరువాత క్యాపిటల్ ఇన్వెస్ట్ మెంట్ గా ఒక్కొక్కరు రూ.5కోట్ల చొప్పున రూ.10కోట్లు ఇన్వెస్ట్ చేయాలని ఒత్తిడి చేసింది. తన తరపున కూడా నువ్వే ఇన్వెస్ట్ చేయాలని, ఆ డబ్బులను తన తండ్రి ఫండ్స్ నుంచి తిరిగి ఇస్తానని సదరు మహిళ డాక్టర్ ను నమ్మించింది. అంతేకాకుండా.. ఈ మొత్తం అమౌంట్ లో రూ.85వేలు విత్ డ్రా చేసుకునే చాన్స్ ఇచ్చింది. మాయలేడి మాటలు నమ్మిన డాక్టర్ బ్యాంకుల నుంచి లోన్లు తీసుకొచ్చి మొత్తం రూ.10కోట్లు సీఎంసీలో ఇన్వెస్ట్ చేశాడు.
డాక్టర్ పెట్టుబడి రూ.10కోట్లతో ఆగలేదు.. మాయలేడి మాయమాటలు నమ్మి.. విడతల వారీగా మరికొంత డబ్బులు అందులో పెట్టబడి పెట్టాడు. ఇలా ఈనెల26వ తేదీ వరకు మొత్తం రూ.14.61కోట్లు ఆ డాక్టర్ ఇన్వెస్ట్ చేశాడు. చివరికి సైబర్ నేరగాళ్ల ఉచ్చులోపడి మోసపోయానని గుర్తించి.. సైబర్ సెక్యూరిటీ బ్యూరోను ఆశ్రయించాడు. చాటింగ్‌లకు సంబంధించి స్ర్కీన్ షాట్స్, బ్యాంక్ ట్రాన్సాక్షన్స్, ఆన్‌లైన్ ట్రేడింగ్ ప్లాట్ ఫామ్ వివరాలు అందించాడు. సైబర్ సెక్యూరిటీ సిబ్బంది కేసు నమోదు చేసి దర్యాప్తు చేపట్టారు.
