హైదరాబాద్‌లో గణేశ్ శోభాయాత్ర, నిమజ్జనానికి రూట్ మ్యాప్.. వాహనదారులకు ముఖ్య గమనిక..

గణేశ్ నిమజ్జనం, శోభాయాత్ర నేపథ్యంలో హైదరాబాద్ సిటీ పోలీసులు కీలక నిబంధనలు ప్రకటించారు. గణేశ్ ఉత్సవ కమిటీ సభ్యులు విగ్రహాలను తీసుకెళ్లడానికి అవసరమైన వాహనాలను ముందుగానే ఏర్పాటు చేసుకోవాలని సూచించారు.

Ganesh Immersion Route Map : గణేశ్ నవరాత్రి ఉత్సవాలు తుదిదశకు చేరుకున్నాయి. వినాయక చవితి వేడుకల్లో చివరి ఘట్టమైన నిమజ్జనం వేడుకలకు మండపాల్లోని గణనాథులు సిద్ధమవుతున్నారు. ఇప్పటికే అనేక వినాయక విగ్రహాలు గంగమ్మ ఒడికి చేరాయి. ఈ నెల 17న ఖైరతాబాద్ మహా గణపతితో పాటు పెద్ద సంఖ్యలో గణేశ్ విగ్రహాల నిమజ్జనాలు జరగనున్నాయి. ఇందుకోసం రాష్ట్ర పోలీసు శాఖ కట్టుదిట్టమైన ఏర్పాట్లు చేసింది. ఎటువంటి అవాంఛనీయ ఘటనలు జరక్కుండా పటిష్ట భద్రతా ఏర్పాట్లు చేసింది.

సమస్యాత్మక ప్రాంతాల్లో అదనపు బందోబస్తును ఏర్పాటు చేయనున్నారు. ఖైరతాబాద్, బాలాపూర్ సహా నగరంలోని పలు విగ్రహాల శోభాయాత్ర, ప్రధాన ఊరేగింపు, నిమజ్జనం కోసం రూట్ మ్యాప్ ను సిద్ధం చేశారు. ఖైరతాబాద్ గణేశుడి నిమజ్జనం మధ్యాహ్నం 1 గంట లోపు పూర్తి చేసేలా ప్రణాళిక సిద్ధం చేశామన్నారు సీపీ సీవీ ఆనంద్. ఈ ఏడాది అదనంగా 10శాతం వినాయక విగ్రహాలు ఏర్పాటయ్యాయన్నారు.

అన్ని రకాల విగ్రహాలు కలిపి దాదాపు లక్ష వరకు ఉండొచ్చన్నారు. నాలుగు రోజులుగా హుస్సేన్ సాగర్ లో వినాయక నిమజ్జనాలు జరుగుతున్నాయి. హైదరాబాద్, సైబరాబాద్, రాచకొండ పోలీస్ కమిషనరేట్ల పరిధిలో 30వేల మంది పోలీసులు బందోబస్తు విధుల్లో ఉండనున్నారు. ఒక్క హైదరాబాద్ కమిషనరేట్ పరిధిలోనే 25వేల మంది పోలీసులతో బందోబస్తు ఏర్పాటు చేశారు.

గణేశ్ నిమజ్జనం, శోభాయాత్ర నేపథ్యంలో హైదరాబాద్ సిటీ పోలీసులు కీలక నిబంధనలు ప్రకటించారు. గణేశ్ ఉత్సవ కమిటీ సభ్యులు విగ్రహాలను తీసుకెళ్లడానికి అవసరమైన వాహనాలను ముందుగానే ఏర్పాటు చేసుకోవాలని సూచించారు. నిమజ్జనం రోజున సౌత్ జోన్ పరిధిలోంచి విగ్రహాలను తీసుకెళ్లే వారు ముందుగానే బయలుదేరాలని, వాహనానికి ఏసీపీ కేటాయించిన నెంబర్ ను ప్రదర్శించాలని చెప్పారు. ఊరేగింపులో ఎలాంటి రాజకీయపరమైన నినాదాలు చేయడం కానీ బ్యానర్లు ప్రదర్శించడం కానీ చేయకూడదని హెచ్చరించారు. పోలీసులు, రెవెన్యూ, జీహెచ్ఎంసీ అధికారులు సమన్వయంతో కలిసి పని చేస్తూ వినాయక నిమజ్జనం సజావుగా పూర్తయ్యేలా చర్యలు చేపట్టారు.

గణేశ్ నిమజ్జనం సందర్భంగా సెప్టెంబర్ 17న ఉదయం 6 గంటల నుంచి మరుసటి రోజు ఉదయం 10 గంటల వరకు ట్రాఫిక్ ఆంక్షలు అమల్లో ఉండనున్నాయి. ఆర్టీసీ బస్సులకు ప్రత్యామ్నాయ మార్గాలు సూచించగా, కొన్ని జంక్షన్లలో బస్సులకు అనుమతి లేదని స్పష్టం చేశారు అధికారులు. వాహనాదారులు ప్రత్యామ్నాయ మార్గాల్లో గమ్య స్థానాలకు చేరుకోవాలని సూచించారు. గణేశ్ నిమజ్జనాల్లో భక్తులకు ఎలాంటి ఇబ్బందులు కలగకుండా పటిష్ట చర్యలు తీసున్నట్లు జీహెచ్ఎంసీ కమిషనర్ తెలిపారు. శోభాయాత్ర నుంచి నిమజ్జనం చేసే ప్రదేశం వరకు ఎలాంటి ఇబ్బందులు కలగకుండా అన్ని సౌకర్యాలు కల్పించేలా చర్యలు చేపట్టమన్నారు.

గ్రేటర్ హైదరాబాద్ పరిధిలో ఈ నెల 17న జరిగే వినాయక నిమజ్జనాల కోసం జీహెచ్ఎంసీ అధికారులు పటిష్ట ఏర్పాట్లు చేశారు. హుస్సేన్ సాగర్ వద్ద రద్దీని తగ్గించేందుకు నగరంలోని కీలకమైన చెరువులతో పాటు ప్రధాన ప్రాంతాల్లో పరిశుభ్రమైన నీటితో బేబీ పాండ్స్ ను సిద్ధం చేసింది. 24 గంటల పాటు సిబ్బందిని అందుబాటులో ఉంచనుంది. ఎప్పటికప్పుడు నిమజ్జనం చేసేలా భారీ క్రేన్లు, వ్యర్థాలను తొలగించేందుకు భారీ వాహనాలను సిద్ధం చేశారు.

హైదరాబాద్ లో లక్ష వరకు విగ్రహాలను నిమజ్జనం చేసే అవకాశం ఉండటంతో హుస్సేన్ సాగర్ తో పాటు జంట నగరాల పరిధిలో భారీ ఎత్తున ఏర్పాట్లు చేశారు. ట్యాంక్ బండ్ వైపు మినహా ఎన్టీఆర్ మార్గ్, పీవీర్ మార్గ్ లో ఇప్పటికే భారీ క్రేన్లను సిద్ధం చేశారు. మొత్తం 6 జోన్లలో 5 పెద్ద చెరువులతో పాటు తాత్కాలికంగా 73 కుంటలను నిమజ్జనానికి సిద్ధం చేశారు. ఎల్బీనగర్ పరిధిలో 12, చార్మినార్ జోన్ లో 10, ఖైరతాబాద్ జోన్ లో 13, శేరిలింగం పల్లి జోన్ లో 13, కూకట్ పల్లి జోన్ లో 11, సికింద్రాబాద్ జోన్ లో 12 తాత్కాలిక నిమజ్జన కుంటలను సిద్ధం చేశారు అధికారులు.

నిమజ్జన నిబంధనలు..
* బాలాపూర్ నుంచి హుస్సేన్ సాగర్ వరకు 19 కిలోమీటర్ల రూట్ మ్యాప్
* సెప్టెంబర్ 17న ఉదయం 6 గంటల నుంచి అమల్లోకి ఆంక్షలు
* బాలాపూర్ నుంచి ఎన్టీఆర్ మార్గ్ వరకు రాకపోకలు నిలిపివేత
* వాహనదారులు ప్రత్యామ్నాయ మార్గాల్లో వెళ్లాలని సూచన
* మొత్తం ఏడు మార్గాల్లో గణేశ్ విగ్రహాల తరలింపు

రూట్స్ అండ్ డైవర్షన్స్..
రూట్ నెంబర్ 1 : బాలాపూర్ గణేశ్ శోభాయాత్ర
బాలాపూర్ నుండి కేశవగిరి, చాంద్రాయణగుట్ట, ఎంబీఎన్ఆర్ ఎక్స్ రోడ్, ఫలక్ నుమా, రైల్వే బ్రిడ్జి, అలియాబాద్, నాగుల్ చింత, చార్మినార్, అఫ్జల్ గంజ్, ఎంజే మార్కెట్, బషీర్ బాగ్, లిబర్టీ, ఎన్టీఆర్ మార్క్, అంబేద్కర్ విగ్రహం, నెక్లెస్ రోడ్.

రూట్ నెంబర్ 2:
సౌత్ జోన్ – హుస్సేనీ ఆలం, బహదూర్ పురలో గణేశ్ శోభాయాత్ర

రూట్ నెంబర్ 3:
ఈస్ట్ జోన్ – రామంతాపూర్, తార్నాక, హబ్సిగూడ, చిలకలగూడ ఎక్స్ రోడ్, కాచిగూడ, ఇస్మాయిలీ బజార్ మీదుగా శోభాయాత్ర.

రూట్ నెంబర్ 4:
ధూల్ పేట, టప్పాచబుత్రా, రేతిబౌలి మీదుగా శోభాయాత్ర.

రూట్ నెంబర్ 5 :
వెస్ట్ జోన్
ఎర్రగడ్డ, బల్కంపేట, యూసుఫ్ గూడ, ఎన్టీఆర్ భవన్, అగ్రసేన్ జంక్షన్ మీదుగా హుస్సేన్ సాగర్ వైపు శోభాయాత్ర.

రూట్ నెంబర్ 6:
నార్త్ జోన్
గణేశ్ టెంపుల్, సికింద్రాబాద్, బేగంపేట

Also Read : హైదరాబాద్‌లో ఘనంగా గణనాథుల నిమజ్జనం.. ట్యాంక్‌బండ్ పరిసరాల్లో సందడి వాతావరణం