KCR
BRS: పార్టీ ఆవిర్భావం (2001లో) తర్వాత కొద్దినెలలకే వచ్చిన స్థానిక ఎన్నికలతో సత్తా చాటుకుని రాజకీయంగా గట్టి పునాది వేసుకున్న బీఆర్ఎస్ పార్టీకి.. ఈసారి స్థానిక ఎన్నికలు సవాల్ గా మారే పరిస్థితి కన్పిస్తోంది. పదేళ్ల అధికారం చేజారింది. ప్రతిపక్షంలోకి వచ్చిన వెంటనే..ఓటమి నుంచి కాస్త తెరుకుని మళ్లీ రేసు మొదలు పెట్టింది కారు పార్టీ. ఇప్పటినుంచే సీరియస్గా పనిచేసుకుంటూ వెళ్తున్నారు గులాబీ నేతలు. అయితే రాష్ట్రస్థాయిలో దూకుడు బానే ఉన్నా..రూరల్ పాలిటిక్స్‌ను మాత్రం పట్టించుకోవడం లేదన్న చర్చ జరుగుతోంది.
ఎంతసేపు రాష్ట్రస్థాయిలో కాకుండా..గ్రామాల్లో పార్టీ క్యాడర్, లీడర్లకు భరోసా కల్పించేలా ఏ ఒక్క కార్యక్రమాన్ని గట్టిగా చేపట్టలేకపోయారనే విమర్శలు వస్తున్నాయి. గత అసెంబ్లీ ఎన్నికల్లో బీఆర్ఎస్ 39 సీట్లు గెలుచుకుంటే అందులో పది మంది కాంగ్రెస్‌లోకి జంప్ అయ్యారు. ఇంకో ఇద్దరు శాసనసభ్యుల అకాల మరణంతో బైపోల్స్ వస్తే అవి కాంగ్రెస్ ఖాతాలోకే వెళ్లాయి. ఇక బీఆర్ఎస్‌కు మిగిలింది 27 మంది ఎమ్మెల్యేలు. ఆ నియోజకవర్గాల్లో మాత్రమే ఎమ్మెల్యేల చొరవతో పంచాయతీ ఎన్నికల్లో గట్టి పోటీ ఇచ్చే అవకాశాలు కన్పిస్తున్నాయట. (BRS)
ఇక ఎమ్మెల్యేలు లేని చోట.. కాంగ్రెస్, బీజేపీ, బీఆర్ఎస్ జంపింగ్ ఎమ్మెల్యేలు ఉన్నచోట కారు క్యాడర్‌కు దిశానిర్దేశం చేసే దిక్కే కరువైందనే టాక్ నడుస్తోంది. నియోజకవర్గ ఇంచార్జ్‌లలో చాలామంది యాక్టీవ్‌గా లేకపోవడం..నియోజకవర్గాన్ని పూర్తిగా వదిలేసి బీఆర్ఎస్ ముఖ్యనేతలతోనే తిరుగుతుండటంతో అక్కడ గులాబీదళానికి దిశానిర్దేశం చేసేవారే కరువయ్యారు.
Also Read: AP Students: ఏపీలో స్టూడెంట్లకు కిట్స్.. అందులో ఉండేవి ఇవే..
దీంతో పాటు..జంపింగ్ ఎమ్మెల్యేల నియోజకవర్గాల్లో ఎవరికీ బాధ్యతలు అప్పగించకపోవడంతో ఈ ఎఫెక్ట్ కూడా సర్పంచ్ ఎన్నికలపై పడుతుందని క్యాడర్ ఆందోళన వ్యక్తం చేస్తోంది. 2017లో అప్పటి బీఆర్ఎస్ మహాసభల్లో ప్రకటించిన రాష్ట్ర కార్యవర్గమే ఇప్పటికీ కొనసాగుతోంది. మూడున్నరేళ్ల క్రితం 2022 జనవరిలో బీఆర్ఎస్ అధిష్టానం 33 జిల్లాలకు జిల్లా అధ్యక్షులను ప్రకటించింది. కానీ జిల్లా, పార్టీ అనుబంధ సంఘాలకు పూర్తి స్థాయి కార్యవర్గాలను మాత్రం నియమించలేదు.
జిల్లాల్లో అన్ని రాజకీయ పార్టీలకు సంస్థాగతంగా కమిటీలున్నాయి. ఏడేళ్ల క్రితం బీఆర్ఎస్అధిష్టానం జిల్లా కమిటీలను రద్దు చేసి..పార్లమెంటు నియోజకవర్గ స్థాయిలో రాష్ట్ర కార్యదర్శులకు పార్టీ బాధ్యతలను అప్పగించింది. నియోజకవర్గాల్లో పార్టీ పరంగా తీసుకునే కీలక నిర్ణయాలపై అన్ని అధికారాలు స్థానిక ఎమ్మెల్యేలకు అప్పగించింది. ఈ ఏడాది ఏప్రిల్లో జరిగిన పార్టీ సిల్వర్ జూబ్లీ వేడుకల సందర్భంగా సంస్థాగతంగా జిల్లా, నియోజకవర్గ, మండల, గ్రామ కమిటీలు వేస్తామని అధినేత కేసీఆర్ ప్రకటించారు.
సభ్యత్వ నమోదు ఇంకెప్పుడు?
ఆ తర్వాత పలు సందర్భాల్లోనూ వెంటనే పార్టీ సభ్యత్వ నమోదు ప్రారంభిస్తామని కేటీఆర్ చెప్పినా ఇప్పటికీ ఆ ప్రక్రియ మొదలు కాలేదు. జిల్లా కార్యవర్గాన్ని పూర్తిస్థాయిలో నియమించాలని, లేకపోతే పార్టీ అనుబంధ జిల్లా అధ్యక్షులను ప్రకటించాలని పలువురు అధినేత కేసీఆర్, వర్కింగ్ ప్రెసిడెంట్ కేటీఆర్‌ను కోరినా వాయిదా వేస్తూ వస్తున్నారట. దీంతో జిల్లా స్థాయి నుంచి గ్రామ స్థాయి వరకు పదవులు పొందలేక ఇంతకాలం పార్టీలో ఉన్న నేతలు తీవ్ర అసంతృప్తిలో ఉన్నారట.
సంస్థాగత నిర్మాణంపై ఫోకస్ పెట్టకపోవడంతో.. సర్పంచ్ ఎన్నికల ఫలితాలు ఎలా ఉంటాయోనని ఆందోళన పడుతున్నారట. ఐదారేళ్లుగా పార్టీని నడిపించేవారు లేకపోవడంతో ఇప్పుడు స్థానిక సంస్థల ఎన్నికల్లో గెలుపు ఎలా సాధ్యమవుతుందని వాపోతున్న వారు ఉన్నారట. లోకల్ బాడీ ఎన్నికల్లో అధికార పార్టీకి ఎలాగూ అప్పర్ హ్యాండ్ ఉంటుంది. రాష్ట్రంలో అధికారంలో లేకపోవడంతో ఇప్పటికే చాలా మంది బీఆర్ఎస్ నేతలు, కార్యకర్తలు పార్టీకి దూరంగా ఉంటున్నారు.
కార్యవర్గాలు, పదవులు లేకపోవడంతో ఉన్నవారిలోనూ అసంతృప్తి కనిపిస్తోందన్న చర్చ జరుగుతోంది. ఈ ఎఫెక్ట్ బీఆర్ఎస్ బలపరిచిన సర్పంచ్ అభ్యర్థులపై పడుతుందని అంటున్నారు. గ్రామస్థాయిలో పార్టీ బలంగా ఉంటేనా వచ్చే అసెంబ్లీ ఎన్నికల్లో మళ్లీ సత్తా చాటి అధికారంలోకి వస్తామని, అందుకే ఇప్పటికైనా పార్టీ సంస్థాగత నిర్మాణంపై దృష్టి పెట్టాలని గ్రామ స్థాయి నుంచి జిల్లా దాకా కార్యవర్గాలను నియమించాలన్న అభిప్రాయాలు వ్యక్తం అవుతున్నాయట. మరి జడ్పీటీసీ, ఎంపీటీసీ ఎన్నికల వరకైనా బీఆర్ఎస్ అధిష్టానం గ్రామ, మండల కమిటీలను ఏర్పాటు చేస్తుందో లేదో చూడాలి మరి.
