Cheyutha Pensions: పండుగవేళ తెలంగాణ సర్కార్ గుడ్‌న్యూస్.. కొత్తగా 4.5 లక్షల మందికి చేయూత పింఛన్లు.. మంత్రి సీతక్క కీలక ప్రకటన!
దీపావళి కానుకగా తెలంగాణలో కొత్తగా 4.5 లక్షల మందికి చేయూత పింఛన్లను(Cheyutha Pensions) మంజూరు చేస్తున్నట్లు మంత్రి సీతక్క ప్రకటించారు.
- V Santhosh Kumar
- Published on- November 7, 2026 / 09:01 PM IST
Minister Seethakka announces Telangana government will distribute 4–5 lakh new Cheyutha pension.
Cheyutha Pensions: దీపావళి పండుగ వేళ తెలంగాణలోని పేద, ఎగువ దిగువ తరగతుల కుటుంబాలకు ఆర్థికంగా ఊతమిచ్చేలా ప్రజా ప్రభుత్వం మరో కీలక నిర్ణయం తీసుకుంది. రాష్ట్రవ్యాప్తంగా అర్హులైన కొత్త లబ్ధిదారులకు చేయూత పింఛన్లు(Cheyutha Pensions) మంజూరు చేయనున్నట్లు పంచాయతీ రాజ్, గ్రామీణాభివృద్ధి శాఖ మంత్రి సీతక్క అధికారికంగా ప్రకటించారు. ఈ పథకం కింద కొత్తగా 4.5 లక్షల మంది లబ్ధిదారులకు పింఛన్లు అందించి, పండుగ వేళ లక్షలాది కుటుంబాల్లో వెలుగులు నింపాలని ప్రభుత్వం నిర్ణయించిందని శనివారం విడుదల చేసిన ఒక ప్రకటనలో వెల్లడించారు.
కొడంగల్‌లో సీఎం రేవంత్‌రెడ్డి చేతుల మీదుగా ప్రారంభం.. ఈ నెల నుంచే చెల్లింపులు:
కొడంగల్ నియోజకవర్గంలో ఆదివారం జరగనున్న ప్రత్యేక కార్యక్రమంలో ముఖ్యమంత్రి ఎ.రేవంత్ రెడ్డి చేతుల మీదుగా ఈ పింఛన్ల పంపిణీ కార్యక్రమానికి శ్రీకారం చుట్టనున్నట్లు మంత్రి తెలిపారు. ఈ కార్యక్రమంలో సీఎంతో పాటు మంత్రి సీతక్క స్వయంగా పాల్గొని పలువురు లబ్ధిదారులకు మంజూరు పత్రాలను అందజేస్తారు. కొత్తగా పింఛన్లు మంజూరైన వారందరికీ ఈ నెల నుంచే నగదు చెల్లింపులు ప్రారంభమవుతాయని స్పష్టం చేశారు.
అన్ని జిల్లాల్లోనూ విస్తృత పంపిణీ.. వితంతువులు, దివ్యాంగులకు భరోసా:
కొడంగల్‌లో ప్రారంభమైన అనంతరం రాష్ట్ర వ్యాప్తంగా ఉన్న అన్ని జిల్లాల్లోనూ మంత్రులు, ప్రజాప్రతినిధులు, ఉన్నతాధికారుల చేతుల మీదుగా మంజూరు పత్రాల పంపిణీ విస్తృతంగా సాగుతుందని పేర్కొన్నారు. ఈ నూతన పింఛన్ల ద్వారా వితంతువులు, ఒంటరి మహిళలు, దివ్యాంగులు, నేత కార్మికులు, గీత కార్మికులకు ప్రభుత్వం నుండి బలమైన సామాజిక భద్రత, ఆర్థిక భరోసా లభించనుంది.