Software Engineer Commits Suicide
Nizamabad District : నిజామాబాద్ జిల్లాలో విషాద ఘటన చోటు చేసుకుంది. జిల్లాలోని ఏర్గట్ల మండలం దోంచంద గ్రామానికి చెందిన నాగిరెడ్డి రాజారెడ్డి, రాజవ్వ దంపతులకు ఇద్దరు కుమారులు. చిన్న కుమారుడు శ్రీకాంత్ (29) లండన్ లో సాప్ట్‌వేర్ ఉద్యోగం చేస్తున్నాడు. అయితే, శ్రీకాంత్ గత ఆరేళ్లుగా అదే గ్రామానికి చెందిన ఓ యువతిని ప్రేమిస్తున్నాడు. ఆ యువతికి ఇంట్లో పెళ్లి సంబంధాలు చూస్తున్నారు. దీంతో తనకు ఇంట్లో పెళ్లి సంబంధాలు చూస్తున్నారని.. నువ్వు స్వదేశానికి రావాలని యువతి శ్రీకాంత్‌కు ఫోన్‌చేసి చెప్పింది. దీంతో అతను ఐదు నెలల క్రితం ఇండియా వచ్చాడు.
శ్రీకాంత్ తో పెళ్లికి యువతి తల్లిదండ్రులు అంగీకరించలేదు. ఈనెల 7వ తేదీన మరో వ్యక్తితో వివాహానికి ముహూర్తం నిర్ణయించారు. ప్రేమించిన యువతి మరో వ్యక్తిని పెళ్లి చేసుకునేందుకు సిద్ధమవ్వడంతో శ్రీకాంత్ జీర్ణించుకోలేకపోయాడు. మనస్తాపానికి గురైన ఆయన.. ఈనెల 6వ తేదీన పురుగుల మందు తాగాడు. కుటుంబ సభ్యులు అతన్ని హైదరాబాద్‌లోని ఓ ప్రైవేట్ ఆస్పత్రికి తరలించి చికిత్స అందించారు. అయితే, చికిత్స పొందుతూ ఈనెల 27న శ్రీకాంత్ కన్నుమూశాడు. కోపోద్రిక్తులైన మృతుడి కుటుంబ సభ్యులు, గ్రామస్తులు గురువారం రాత్రి యువతి ఇంటిపై దాడిచేశారు.
ఘటనపై ఫిర్యాదు చేసినా బాధ్యులపై ఎలాంటి చర్యలు తీసుకోలేదంటూ మృతుడి తరపునవారు పోలీసులపై ఆగ్రహం వ్యక్తం చేశారు. మృతదేహంతో పోలీస్ స్టేషన్ ను ముట్టడించే ప్రయత్నం చేశారు. విషయం తెలుసుకున్న పోలీసులు తాళ్లరాంపూర్ శివారులో వాహనాలు పెట్టి అడ్డుకున్నారు. దీంతో శ్రీకాంత్ మృతదేహం ఉన్న ఫ్రీజర్ ను పోలీసుల వాహనంపై పెట్టి.. పోలీసులకు వ్యతిరేకంగా నినాదాలు చేస్తూ కాలినడకన మండల కేంద్రంలో తెలంగాణ తల్లి చౌరస్తా వద్ద రోడ్డుపై బైఠాయించారు. న్యాయం చేస్తామని పోలీసులు హామీ ఇవ్వడంతో బాధితులు నిరసన విరమించారు. దోంచంద గ్రామంలో శ్రీకాంత్ అంత్యక్రియలు పూర్తయ్యే వరకు గ్రామంలో పోలీసులను మోహరించారు.
