Ys Sharmila
YS Sharmila : హైదరాబాద్ లోటస్ పాండ్ లోని వైఎస్ షర్మిల ఇంటి దగ్గర ఉద్రిక్తత చోటు చేసుకుంది. తెలంగాణకు అనుకూలంగా రాయలసీమకు అన్యాయం చేసేలా షర్మిల ట్వీట్ చేశారంటూ ఆంధ్రప్రదేశ్ పరిరక్షణ సమితి షర్మిల నివాసాన్ని ముట్టడించే యత్నం చేశారు. షర్మిల అనుచరులతో ఏపీ పరిరక్షణ సమితి సభ్యులు వాగ్వాదానికి దిగారు. అమరావతి పరిరక్షణ సభ్యుడు కొలికమూడి శ్రీనివాస్ పై షర్మిల అనుచరులు దాడికి పాల్పడ్డారు. పరస్పరం గొడవకు దిగడంతో ఉద్రిక్త పరిస్థితులకు దారి తీసింది. అమరావతి పరిరక్షణ సమితికి వ్యతిరేకంగా షర్మిల అనుచరులు నినాదాలు చేశారు.
షర్మిల ఇంటి ముందు ఏపీ పరిరక్షణ సమితి సభ్యులు ధర్నాకు దిగారు. కృష్ణా జలాల విషయంలో వైఖరేంటో చెప్పాలని డిమాండ్ చేస్తూ షర్మిల ఇంటిని ముట్టడించే ప్రయత్నం చేశారు. దీంతో షర్మిల నివాసం దగ్గర కాసేపు స్వల్ప ఉద్రిక్తత నెలకొంది.
తెలంగాణకు దక్కాల్సిన నీటిలో ఒక్క చుక్కనూ వదులుకోబోమని రెండ్రోజుల క్రితం వైఎస్ షర్మిల అన్న సంగతి తెలిసిందే. దాని కోసం ఎవరినైనా ఎదిరిస్తానని ఆమె చెప్పారు. ఆ వ్యాఖ్యలపై అమరావతి పరిరక్షణ సమితి మండిపడింది. షర్మిల ఇంటిని ముట్టడించేందుకు యత్నించగా.. షర్మిల మద్దతుదారులు అడ్డుకున్నారు.
కృష్ణా నీళ్ల విషయంలో షర్మిల తన వైఖరేంటో స్పష్టంగా చెప్పాలని ఏపీ పరిరక్షణ సమితి డిమాండ్ చేసింది. షర్మిల వ్యాఖ్యలు రాయలసీమ రైతులకు నష్టం చేసేలా ఉన్నాయన్నారు. అమరావతి పరిరక్షణ సమితి కన్వీనర్ కొలికపూడి శ్రీనివాస్ ఆధ్వర్యంలో నిరసనకు దిగిన వారిని పోలీసులు అదుపులోకి తీసుకుని బంజారాహిల్స్ పోలీస్ స్టేషన్ కు తరలించారు.
