విజయవాడ : సినీ నటి భానుప్రియను విజయవాడ పోలీసులు అరెస్టు చేస్తారా ? అనే అనుమానాలు వ్యక్తమౌతున్నాయి. రీల్ లైఫ్‌లో జబర్ధస్త్ డైలాగ్స్‌తో అదరగొట్టిన భానుప్రియ రియల్ లైఫ్‌లో మాత్రం ఓ వివాదంలో చిక్కుకున్నారు. ఇంకా వివాదం సమిసిపోలేదు. పనిమనిషి వేధింపుల కేసును ఆమె ఎదుర్కొంటున్న సంగతి తెలిసిందే. తాజాగా ఈ కేసుకు సంబంధించిన దానిపై జనవరి 30వ తేదీ బుధవారం బాలల హక్కుల సంఘం ఏపీ డీజీపీకి ఫిర్యాదు చేసింది. ఆమెను వెంటనే అరెస్టు చేయాలని డిమాండ్ చేశారు. విచారణ అనంతరం వాస్తవాలు వెలుగులోకి వస్తాయని..వేధింపులు చేస్తే మాత్రం భానుప్రియపై కఠిన చర్యలు తీసుకుంటామని డీజీపీ హామీనిచ్చారు.
భానుప్రియ నివాసంలో తన కూతురు వేధింపులకు గురవుతోందని…తల్లి సామర్లకోటలో కొద్ది రోజుల కిందట పోలీసులకు ఫిర్యాదు చేసింది. తూర్పుగోదావరి జిల్లా సామర్లకోట పోలీసులకు.. బాధిత కుటుంబం ఫిర్యాదు చేసింది. ఇంట్లో పని కోసం 14 ఏళ్ల తమ కూతురు సంధ్యని భానుప్రియ తీసుకెళ్లిందని..ఏడాది కాలంగా కనీసం మాట్లాడనీయటం లేదని తల్లి ప్రభావతి ఆరోపించింది.
దీనిపై భానుప్రియ కూడా స్పందించారు. ఇంట్లో దొంగిలించిన వస్తువులు తిరిగి అడిగినందుకే కేసు పెట్టారని..ఏడాది నుండి బాలిక పద్మ పనిచేస్తోందని…డబ్బు..ఇతర వస్తువులు కనిపించకపోవడంతో బాలికను నిలదీయడం జరిగిందని…పోలీసులకు చెబుతామని హెచ్చరించడం జరిగిందన్నారు. చివరకు బాలిక తన తప్పును ఒప్పుకుందని చెప్పిన భానుప్రియ…తల్లిని కూడా ప్రశ్నించినట్లు తెలిపారు. దొంగిలించిన కొన్ని వస్తువులను ఆమె తిరిగి తీసుకొచ్చిందని భానుప్రియ చెప్పారు. మిగిలిన వస్తువులను తీసుకొస్తామని ఇంటికి వెళ్లిన బాలిక తల్లి చివరికి తమ పైనే కేసు పెట్టిందని…చెప్పారు. దీనిపై బాలిక కూడా మీడియతో కూడా మాట్లాడింది. భానుప్రియ ఇంట్లో తనకు ఎలాంటి ఇబ్బంది లేదని…డబ్బు..నగలు దొంగిలించిన తానే తన తల్లికి ఇచ్చినట్లు వెల్లడించినట్లు సమాచారం. మరి..ఈ కేసు ఇంకా ఎలాంటి టర్న్‌లు తీసుకొంటుంది ? భానుప్రియను అరెస్టు చేస్తారా ? అనేది చూడాలి.
