Beach Shacks: గోవా టైప్ లో ఏపీలో ‘బీచ్ షాక్స్’.. అంటే ఏంటి? అవి ఎలా రన్ అవుతాయి?

Andhra Pradesh Cabinet has given green signal for beach shacks.

• పర్యాటక వృద్ధికి బీచ్ షాక్ పాలసీ
• విశాఖ, చీరాల తీరాల్లో పైలట్ ప్రాజెక్ట్
• స్థానిక యువతకు ఉపాధి అవకాశాల పెంపు

Beach Shacks: ఆంధ్రప్రదేశ్‌లో పర్యాటక రంగాన్ని అంతర్జాతీయ స్థాయికి తీసుకెళ్లే లక్ష్యంతో ఏపీ కేబినెట్ సరికొత్త ‘బీచ్ షాక్ ఎక్సైజ్ పాలసీ’కి ఆమోదం తెలిపింది. ఇందులో భాగంగా గోవా తరహా సంస్కృతిని రాష్ట్రానికి పరిచయం చేస్తూ విశాఖపట్నం, చీరాల సముద్ర తీరాలలో పైలట్ ప్రాజెక్ట్‌గా తాత్కాలిక కుటీరాలను (Beach Shacks) ఏర్పాటు చేయనున్నారు. పర్యావరణ నిబంధనలకు లోబడి నడిచే ఈ షాక్స్ ద్వారా పర్యాటకులకు సముద్ర ఆహారం, పానీయాలు, వినోదం అందుబాటులోకి వస్తాయి. 974 కిలోమీటర్ల సుదీర్ఘ తీరప్రాంతం ఉన్న ఏపీలో ఈ విధానం పర్యాటక ఆదాయాన్ని పెంచడమే కాకుండా స్థానిక యువతకు పెద్దపీట వేస్తూ ఉపాధి అవకాశాలను సృష్టిస్తుంది. ఈ పైలట్ ప్రాజెక్ట్ విజయవంతమైతే రాష్ట్రంలోని ఇతర బీచ్‌లకు కూడా దీనిని విస్తరించనున్నారు.

అసలు బీచ్ షాక్స్ అంటే ఏమిటి?

బీచ్ షాక్స్ (Beach Shacks) అంటే సముద్ర తీరాల్లో తాత్కాలికంగా ఏర్పాటు చేసే చెక్క లేదా వెదురు కుటీరాలు. ఇవి పర్యాటకులకు స్థానిక సముద్ర ఆహారం (Seafood), పానీయాలు, వినోదాన్ని అందిస్తాయి. గోవా వెళ్లే పర్యాటకులను ఈ సంస్కృతి విపరీతంగా ఆకర్షిస్తుంది. పర్యాటకులు సముద్ర అందాలను ఆస్వాదిస్తూ సేదతీరడానికి ఇవి ఎంతగానో ఉపయోగపడతాయి.

ఇవి ఎలా రన్ అవుతాయి? ఎక్కడ అమలులో ఉన్నాయి?

ప్రభుత్వాలు ప్రత్యేక ఎక్సైజ్, టూరిజం పాలసీల ద్వారా వీటికి లైసెన్సులు ఇస్తాయి. పర్యావరణానికి హాని కలగకుండా కేవలం పర్యాటక సీజన్ (సాధారణంగా అక్టోబర్ నుండి మే వరకు) లో మాత్రమే వీటిని నడుపుతారు. ఆ తర్వాత వీటిని తొలగిస్తారు. భారతదేశంలో గోవా బీచ్ షాక్స్ సంస్కృతికి అత్యంత ప్రసిద్ధి. దీనితో పాటు కేరళ, కర్ణాటక, మహారాష్ట్ర లోని కొన్ని తీర ప్రాంతాల్లో ఇవి విజయవంతంగా నడుస్తున్నాయి.

ఏపీలో ఎక్కడెక్కడ ఏర్పాటు? సక్సెస్ ఛాన్స్ ఎంత?

ప్రస్తుతం ఆంధ్రప్రదేశ్ ప్రభుత్వం విశాఖపట్నం, చీరాల తీర ప్రాంతాలలో పైలట్ ప్రాజెక్ట్‌గా ఈ ‘బీచ్ షాక్ ఎక్సైజ్ పాలసీ’ని ప్రవేశపెట్టింది. ఇవి సక్సెస్ అయితే భవిష్యత్తులో కాకినాడ (ఎన్టీఆర్ బీచ్), నెల్లూరు (మైపాడు బీచ్), బాపట్ల (సూర్యలంక), శ్రీకాకుళం (కలింగపట్నం) వంటి సుదీర్ఘ తీర ప్రాంతాలకు విస్తరించే అవకాశం ఉంది.

974 కిలోమీటర్ల పొడవైన సముద్ర తీరం ఉన్న ఏపీలో ఈ పాలసీ సక్సెస్ అయ్యే అవకాశాలు చాలా ఎక్కువగా ఉన్నాయి. ముఖ్యంగా వైజాగ్ లాంటి నగరాలకు వచ్చే అంతర్జాతీయ, దేశీయ పర్యాటక రంగ ఆదాయాన్ని ఇది రెట్టింపు చేస్తుంది. స్థానిక యువతకు ఉపాధి పెరగడంతో పాటు ఏపీ టూరిజం బ్రాండ్ ఇమేజ్ గ్లోబల్ లెవెల్‌కు చేరుకుంటుంది.