Chandrababu Naidu
Revenue Divisions: ఏపీలో జిల్లాల పునర్విభజన..కొత్త రెవెన్యూ డివిజన్ల ఏర్పాటు కొత్త చర్చకు దారితీస్తోంది. కూటమి సర్కార్ చేసిన మార్పులు, చేర్పులపై కొన్నిచోట్ల పబ్లిక్ నుంచి పాజిటివ్‌ రెస్పాన్స్ వస్తుంటే..మరి కొన్నిచోట్ల కొత్త అభ్యంతరాలు తెరమీదకు వస్తున్నాయ్. మార్చిన వాటిపైనే కాదు..మార్పులు చేయని చోట కూడా జనం అసంతృప్తితో ఉన్నట్లు తెలుస్తోంది.
చిత్తూరు జిల్లాలో కలపడంపై రొంపిచెర్ల వాసులు అసహనంతో ఉన్నారట. ప్రస్తుతం చిత్తూరు జిల్లాల్లో ఉన్న నగరి..నిండ్ర..విజయపురం మండలాల్ని తిరుపతి జిల్లాల్లో కలుపుతామని మాటిచ్చి తప్పారని..ఆ ప్రాంత ప్రజలు నిరాశ చెందారట. కొత్త జిల్లాల మార్పులు, చేర్పులపై మిక్స్‌డ్‌ రెస్పాన్స్ వస్తోంది. ప్రకాశంతో పాటు మార్కాపురం జిల్లా ఏర్పాటు చేయటంపై అక్కడి జనం హ్యాపీగా ఫీల్ అవుతుంటే..కనిగిరి డివిజన్‌లో కలపటంపై మాత్రం గిద్దలూరు ప్రజల్లో వ్యతిరేకత వ్యక్తమవుతోందట.
Also Read: స్థానిక పోరు బీఆర్ఎస్‌కు ఛాలెంజ్‌గా మారిందా? ఎమ్మెల్యేలులేని నియోజకవర్గాల్లో సీన్ రివర్స్ కానుందా?
మదనపల్లె జిల్లా ఏర్పాటుపై అంతా హ్యాపీగా ఉన్నట్లుగా తెలుస్తోంది. నెల్లూరుకు దూరంగా గూడూరు..వెంకటగిరి ఉన్నట్లుగా చెబుతున్నారు. మడకశిర డివిజన్‌పై సానుకూలత వ్యక్తమవుతుంటే.. సిద్దవటం, ఒంటిమిట్ట మండలాల్ని అన్నమయ్య జిల్లాలో చేర్చి కొత్త వివాదానికి తెరదీశారన్న టాక్ వినిపిస్తోంది. గన్నవరం..పెనమలూరు నియోజకవర్గాల్ని ఎన్టీఆర్ జిల్లాలో కలపాలన్న డిమాండ్ తెరమీదకు వచ్చింది.
గూడురు నియోజకవర్గాన్ని నెల్లూరు జిల్లాలో విలీనం చేస్తామని ఎన్నికల టైమ్‌లో చంద్రబాబు.. లోకేశ్ హామీ ఇచ్చారు. ఇప్పుడు ఆ హామీ అమలుకాకపోవటాన్ని ప్రశ్నిస్తున్నారు. నెల్లూరు పరిధిలోని మూడు మండలాలను తిరుపతి జిల్లాలోని గూడూరు రెవెన్యూ డివిజన్ పరిధిలో చేర్చారు. ఈ నిర్ణయాన్ని ఆ మూడు మండలాల ప్రజలు తీవ్రంగా వ్యతిరేకిస్తున్నారు. ఇక కృష్ణా జిల్లా పరిధిలోని గన్నవరం..పెనమలూరు నియోజకవర్గాల్ని ఎన్టీఆర్ జిల్లాలో విలీనం చేయకపోవటంపై ప్రజల్లో అసంతృప్తి వ్యక్తమవుతోంది.
చర్చకు దారితీసిన పాశం సునీల్ కుమార్ ప్రకటన
అయితే కొత్త జిల్లాల ఏర్పాటు, సర్దుబాట్ల నేపథ్యంలో టీడీపీ ఎమ్మెల్యే పాశం సునీల్ కుమార్ చేసిన ప్రకటన చర్చకు దారితీస్తోంది. గూడూరును నెల్లూరు జిల్లాలో కలపకుంటే తాను రాజకీయాల నుంచి తప్పుకుంటానని సంచలన వ్యాఖ్యలు చేశారు. గూడూరును తిరుపతి జిల్లా నుంచి తిరిగి నెల్లూరులో కలపకపోతే..ప్రజల తరఫున పోరాడుతానని స్టేట్‌మెంట్‌ ఇచ్చారు. గూడూరును నెల్లూరు జిల్లాలో కలుపుతానని సీఎం చంద్రబాబు, లోకేశ్ హామీ ఇచ్చారని గుర్తు చేసిన ఎమ్మెల్యే సునీల్..తాను అసెంబ్లీలో రెండుసార్లు ఈ విషయాన్ని ప్రస్తావించానని చెప్పుకొచ్చారు.
మూడు కొత్త జిల్లాల ఏర్పాటు, సర్దుబాటుపై ప్రజల నుంచే కాదు..కూటమి నేతల నుంచి కూడా అసంతృప్తి వ్యక్తం అవుతుంది. వైసీపీ హయాంలో ఇష్టారీతినా జిల్లాల పునర్విభజన చేశారని..జిల్లా కేంద్రాలు, దూరం, పేర్లు అంటూ ఎన్నో వివాదాలు ఉన్నాయని ఎప్పటి నుంచో చర్చ జరుగుతోంది. వాటిన్నింటి కూటమి సర్కార్ చెక్ పెడుతుందని అనుకుంటే..కొత్త సమస్యలు తెరమీదకు వస్తున్నాయన్న గుసగుసలు మొదలయ్యాయి. జిల్లాల పునర్విభజనతో వస్తున్న ఈ కొత్త సమస్యలకు కూటమి సర్కార్ ఎలాంటి పరిష్కారం వెతుకుతుందో చూడాలి మరి.
