Chandrababu-Vijay Meeting: చంద్రబాబు-విజయ్ భేటీ.. చెన్నై తాగునీటి సమస్యపై కీలక నిర్ణయం.. తెలుగు గంగ నీటి పెంపునకు ఏపీ సానుకూలత!

Chandrababu naidu meets cm vijay telugu ganga water godavari cauvery link

Chandrababu-Vijay Meeting: ఆంధ్రప్రదేశ్ ముఖ్యమంత్రి నారా చంద్రబాబు నాయుడు, తమిళనాడు ముఖ్యమంత్రి విజయ్ మధ్య అమరావతిలో జరిగిన కీలక భేటీ ముగిసింది. సుమారు గంటా 10 నిమిషాల పాటు సాగిన ఈ ద్వైపాక్షిక సమావేశంలో ఇరు రాష్ట్రాలకు సంబంధించి అత్యంత ప్రాధాన్యత కలిగిన పలు అంతర్రాష్ట్ర జల వివాదాలు, తాగునీటి సరఫరా, బృహత్తర నదుల అనుసంధాన ప్రాజెక్టులపై విస్తృతంగా చర్చించారు. భేటీ అనంతరం ఇరువురు ముఖ్యమంత్రులు, ఏపీ రాష్ట్ర మంత్రి నారా లోకేష్‌తో కలిసి విజయవాడలో వైభవంగా జరుగుతున్న ‘విజయవాడ ఉత్సవ్’ వేడుకలకు ప్రత్యేక ఆకర్షణగా హాజరయ్యారు.

RTO New Rules: ఇకపై డ్రైవింగ్ లైసెన్స్ పొందటం అంతా ఈజీ కాదు.. ‘ఫేస్ రికగ్నైజేషన్’ టెస్ట్ తప్పనిసరి.. RTO కొత్త రూల్స్ ఇవే

తెలుగు గంగ నీటి సరఫరా పెంపు.. మానవీయ కోణంలో ఏపీ సానుకూలత:

చెన్నై నగర తాగునీటి అవసరాల నిమిత్తం తెలుగు గంగ ప్రాజెక్టు ద్వారా తమిళనాడుకు నీటిని అందిస్తున్న తీరుపై ఈ భేటీలో ప్రధానంగా చర్చించారు. ఈ ఏడాది ఇప్పటికే ఏపీ ప్రభుత్వం 4.08 టీఎంసీల నీటిని అందించగా, పెరుగుతున్న నగర అవసరాల రీత్యా ఈ విడుదలను మరింత పెంచాలని తమిళనాడు సీఎం విజయ్(Chandrababu-Vijay Meeting) విజ్ఞప్తి చేశారు. మానవీయ దృక్పథంతో చెన్నై ప్రజల దాహార్తిని తీర్చేందుకు ఏపీ సిద్ధంగా ఉందని స్పష్టం చేసిన చంద్రబాబు, జలాశయాల్లో నీటి లభ్యత, వర్షపాతం, రాష్ట్ర సొంత అవసరాలను పరిగణనలోకి తీసుకుని నీటి విడుదలను సమీక్షిస్తామని హామీ ఇచ్చారు.

గోదావరి-కావేరీ అనుసంధానం.. గోదావరి-బనకచర్ల ప్రతిపాదనపై కసరత్తు:

దక్షిణాది రాష్ట్రాల జల భద్రత కోసం గోదావరి–కావేరీ నదుల అనుసంధానం అత్యంత కీలకమని, దీని ద్వారా వృథాగా సముద్రంలో కలిసే నీటిని సమర్థవంతంగా వినియోగించుకోవచ్చని చంద్రబాబు వివరించారు. ఇందులో భాగంగా గోదావరి జలాలను కృష్ణా బేసిన్, బొల్లాపల్లి రిజర్వాయర్, బనకచర్ల క్రాస్ రెగ్యులేటర్ ద్వారా కండలేరు మీదుగా కావేరీ వ్యవస్థకు తరలించే ‘గోదావరి-బనకచర్ల’ మార్గాన్ని ఏపీ ప్రతిపాదించింది. కేంద్ర ప్రభుత్వ భాగస్వామ్యం, ఆర్థిక వ్యయం, పర్యావరణ అనుమతులపై ఉమ్మడిగా ముందుకు సాగాలని నిర్ణయించిన ఈ భేటీ రెండు రాష్ట్రాల భవిష్యత్ బంధానికి కొత్త దిశ చూపింది.