AP Investments: ఏపీకి రూ.32 లక్షల కోట్ల పెట్టుబడులు.. 303 ఒప్పందాలతో కొత్త చరిత్ర.. విశాఖ CII సదస్సులో సీఎం చంద్రబాబు సంచలన ప్రకటన

Cm chandrababu naidu announces 32 lakh crore investments in ap at visakhapatnam cii partnership summit

CII Partnership Summit 2026: ఆంధ్రప్రదేశ్ పారిశ్రామిక ముఖచిత్రాన్ని పూర్తిగా మార్చేసేలా విశాఖపట్నం వేదికగా జరుగుతున్న ప్రతిష్టాత్మక సీఐఐ (CII) భాగస్వామ్య సదస్సులో ముఖ్యమంత్రి నారా చంద్రబాబు నాయుడు చారిత్రాత్మక ప్రకటన చేశారు. ఈ సదస్సులో కుదిరిన 303 ఒప్పందాల ద్వారా రూ.9.89 లక్షల కోట్ల భారీ పెట్టుబడులు రాష్ట్రానికి తరలివస్తున్నాయని, వీటితో కలుపుకొని ఇప్పటివరకు ఏపీ మొత్తం రూ.32 లక్షల కోట్ల పెట్టుబడులను ఆకర్షించిందని సీఎం వెల్లడించారు. వివిధ దేశాల నుంచి విచ్చేసిన పారిశ్రామిక దిగ్గజాలు, విదేశీ రాయబారులకు గిరిజన సంప్రదాయ ‘థింసా’ నృత్య ఆతిథ్యంతో స్వాగతం పలికిన ఆయన, దేశంలోనే అత్యంత పరిశుభ్రమైన నగరంగా విశాఖకు గుర్తింపు రావడం గర్వకారణమని పేర్కొన్నారు.

Read Also – Arvind Kejriwal: రూ.7 కోట్లు ఇవ్వకపోతే చంపేస్తామ్.. అరవింద్ కేజ్రీవాల్‌కు బిష్ణోయ్ గ్యాంగ్ బెదిరింపులు

భవిష్యత్ సాంకేతిక రంగాల హబ్‌గా ఏపీ.. అమరావతిలో క్వాంటం, తిరుపతిలో సెమీకండక్టర్ క్యాపిటల్:

రాష్ట్రంలో క్రిటికల్ మినరల్ మిషన్, గ్రీన్ హైడ్రోజన్, సోలార్, స్టీల్, మారిటైమ్ రంగాలకు అత్యంత ప్రాధాన్యత ఇస్తున్నట్లు చంద్రబాబు తెలిపారు. ముఖ్యంగా అమరావతిని అత్యాధునిక సాంకేతికతతో ‘బ్లూ గ్రీన్ సిటీ’గా నిర్మిస్తున్నామని, ‘మేడ్ ఇన్ అమరావతి’ ముద్రతో క్వాంటం కంప్యూటర్లు, క్వాంటం పరికరాలను తయారు చేస్తామని స్పష్టం చేశారు. రక్షణ, పౌర అవసరాల కోసం ప్రత్యేకంగా డ్రోన్ సిటీని ఏర్పాటు చేస్తున్నామని, అలాగే తిరుపతిని గ్లోబల్ సెమీకండక్టర్ చిప్ డిజైన్ క్యాపిటల్‌గా తీర్చిదిద్దుతామని వివరించారు. ఫుడ్ ప్రాసెసింగ్ రంగాన్ని ప్రోత్సహించడం ద్వారా రాష్ట్రాన్ని ప్రపంచ హార్టీకల్చర్ హబ్‌గా మారుస్తామని పారిశ్రామికవేత్తలకు భరోసా ఇచ్చారు.

‘స్పీడ్ ఆఫ్ డూయింగ్ బిజినెస్’ రికార్డు.. 36 రోజుల్లోనే డిఫెన్స్ ప్రాజెక్టుకు అనుమతులు:

కేవలం ‘ఈజ్ ఆఫ్ డూయింగ్ బిజినెస్’కే పరిమితం కాకుండా, 12 రెట్లు వేగంగా అనుమతులిచ్చే ‘స్పీడ్ ఆఫ్ డూయింగ్ బిజినెస్’ విధానాన్ని ఏపీలో అమలు చేస్తున్నామని సీఎం ఉదాహరణలతో సహా వివరించారు. గతంలో కియా మోటార్స్ తరహాలోనే, తాజాగా ఆమ్కా డిఫెన్స్ ప్రాజెక్టుకు కేవలం 36 రోజుల్లోనే అనుమతులు ఇచ్చి భూకేటాయింపులు పూర్తి చేశామని, ఎల్జీ ఎలక్ట్రానిక్స్ 19 నెలల్లోనే ఉత్పత్తి ప్రారంభించేందుకు సిద్ధంగా ఉందని తెలిపారు. రాష్ట్రంలోని 6 ఆపరేషనల్ పోర్టులు, విమానాశ్రయాలు, 25 సెక్టోరల్ పార్కులతో పాటు గోదావరి-కావేరీ నదుల అనుసంధానం (వాటర్ గ్రిడ్) ద్వారా పరిశ్రమలకు నిరంతర నీటి సరఫరా అందిస్తామని హామీ ఇచ్చారు.

పెట్టుబడిదారులకు చట్టపరమైన రక్షణ.. దేశంలోనే తొలిసారిగా ‘ఇన్వెస్ట్‌మెంట్ ప్రొటెక్షన్ యాక్ట్’:

రాజకీయ వైరుధ్యాల కారణంగా పెట్టుబడిదారులు ఎట్టి పరిస్థితుల్లోనూ నష్టపోకూడదనే ఉద్దేశంతో దేశంలోనే తొలిసారిగా ఆంధ్రప్రదేశ్ నుంచి ‘ఇన్వెస్ట్‌మెంట్ ప్రొటెక్షన్ యాక్ట్’ను తీసుకొస్తున్నామని సీఎం చంద్రబాబు ప్రకటించారు. పారిశ్రామిక ప్రోత్సాహకాలను నేరుగా అందించేందుకు ప్రత్యేక ఎస్క్రో (Escrow) ఖాతాను నేటి నుంచే ప్రారంభిస్తున్నామని వెల్లడించారు. ‘యాక్సెస్ టూ ఈక్వాలిటీ ఇండెక్స్‌’లో ఏపీ రెండో స్థానంలో నిలవడం రాష్ట్ర సామాజిక, ఆర్థిక భద్రతకు నిదర్శనమని, పారిశ్రామికవేత్తలు అమరావతిని తమ రెండో నివాసంగా మార్చుకొని రాష్ట్ర అభివృద్ధిలో భాగస్వాములు కావాలని ముఖ్యమంత్రి పిలుపునిచ్చారు.