Cyclone Ditwah
Cyclone Ditwah : ఏపీ ప్రజలను ‘దిత్వాహ్’ తుపాను హడలెత్తిస్తోంది. నైరుతి బంగాళాఖాతంలో తుపాను కొనసాగుతున్న నేపథ్యంలో వాతావరణ శాఖ అప్రమత్తమైంది. ఏపీలోని శ్రీపొట్టి శ్రీరాములు, నెల్లూరు, చిత్తూరు, తిరుపతి జిల్లాలకు రెడ్ అలెర్ట్ జారీ చేసింది.
నవంబర్ నెల ప్రారంభంలో మొంథా తుపాను ఏపీ ప్రజలను అతలాకుతలం చేయగా.. మళ్లీ ‘దిత్వాహ్’ తుపాను హడలెత్తిస్తోంది. ఈ తుపాను ఏపీ వైపునకు దూసుకొస్తుండటంతో ఎలాంటి ప్రళయం సృష్టిందోనని ఏపీ ప్రజలు ఆందోళన చెందుతున్నారు. వాతావరణ శాఖ విభాగం తెలిపిన వివరాల ప్రకారం.. నైరుతి బంగాళాఖాతంలో దిత్వాహ్ తుపాను తమిళనాడు పక్క నుంచి, ఏపీ వైపు వచ్చేలా కనిపిస్తోంది. ప్రస్తుతం అది ఉత్తరం దిశగా కదులుతూ ఉంది. దాని సుడి వేగం 55 కిలోమీటర్లుగా ఉంది.
తుపాను ఉత్తర – వాయవ్య దిశగా కదిలే క్రమంలో ఆదివారం ఉదయం తమిళనాడు – పుదుచ్చేరి తీరానికి 60కిలోమీటర్లు, సాయంత్రానికి 25కిలోమీటర్లు సమీపానికి రానుంది. తుపాను తీరందాటే అవకాశం లేదని, తీరం వెంబడి కదులుతూ సముద్రంలోనే బలహీనపడుతుందని వాతావరణ నిపుణులు అంచనా వేస్తున్నారు. ఇవాళ సాయంత్రం వరకు తుపాను తీవ్రత కొనసాగి.. ఆ తరువాత వాయుగుండంగా బలహీనపడుతుందని వాతావరణ విభాగం పేర్కొంది.
అమరావతి వాతావరణ కేంద్రం తెలిపిన వివరాల ప్రకారం.. ఇవాళ (ఆదివారం) శ్రీపొట్టిశ్రీరాములు నెల్లూరు, చిత్తూరు, తిరుపతి జిల్లాల్లో భారీ నుంచి అత్యంత భారీ వర్షాలు కురుస్తాయని తెలిపింది. ప్రకాశం, అన్నమయ్య, వైఎస్ఆర్ కడప జిల్లాల్లో భారీ నుంచి అతిభారీ వర్షాలు, అనంతపురం, శ్రీసత్యసాయి, కర్నూలు, నంద్యాల, పల్నాడు, బాపట్ల, గుంటూరు జిల్లాల్లో భారీ వర్షాలు కురిసే అవకాశం ఉందని వాతావరణ శాఖ విభాగం పేర్కొంది.
రేపు (సోమవారం) ప్రకాశం, నెల్లూరు జిల్లాల్లో భారీ నుంచి అతిభారీ వర్షాలు.. డా.బీఆర్ అంబేద్కర్ కోనసీమ, తూర్పుగోదావరి, పశ్చిమ గోదావరి, ఏలూరు, ఎన్టీఆర్, కృష్ణా, గుంటూరు, పల్నాడు, బాపట్ల, తిరుపతి, అన్నమయ్య, వైఎస్ఆర్ కడప జిల్లాల్లో భారీ వర్షాలు కురిసే చాన్స్ ఉందని వాతావరణ శాఖ పేర్కొంది.
మంగళవారం.. నెల్లూరు, బాపట్ల, ప్రకాశం జిల్లాల్లో భారీ నుంచి అతిభారీ వర్షాలు కురిసే చాన్స్ ఉందని వాతావరణ శాఖ పేర్కొంది. మిగిలిన ప్రాంతాల్లో తేలికపాటి నుంచి ఓ మోస్తరు వర్షాలు పడొచ్చని తెలిపింది.
తుపాను ప్రభావంతో తీరంవెంబడి గరిష్ఠంగా గంటకు 80కిలోమీటర్ల వేగంతో ఈదురుగాలులు వీయొచ్చునని వాతావరణ శాఖ తెలిపింది. సముద్రం అలజడిగా మారిన నేపథ్యంలో సోమవారం వరకు మత్స్యకారులు వేటకు వెళ్లరాదని హెచ్చరికలు జారీ చేసింది. మరోవైపు.. కృష్ణపట్నం పోర్టుకు మూడో హెచ్చరిక, మిగిలిన పోర్టులకు రెండో నంబరు హెచ్చరికలు జారీ అయ్యాయి.
