YS Jagan: చంద్రబాబు అభివృద్ధి ప్రచారంపై జగన్ ఫైర్.. కాగ్, APERC గణాంకాలతో విమర్శలు

ys jagan criticizes chandrababu government over ap economic slowdown

YS Jagan: ఆంధ్రప్రదేశ్‌లోని చంద్రబాబు నాయుడు నేతృత్వంలోని కూటమి ప్రభుత్వం చేస్తున్న అభివృద్ధి ప్రచారానికి, రాష్ట్రంలోని వాస్తవ ఆర్థిక పరిస్థితులకు ఎక్కడా పొంతన లేదని వైఎస్సార్‌సీపీ అధినేత వైఎస్ జగన్ మోహన్ రెడ్డి(YS Jagan) తీవ్రస్థాయిలో విమర్శించారు. రాష్ట్రంలో శాంతిభద్రతలు క్షీణించాయని, అవినీతి పెరిగిపోయిందని ఆరోపించిన ఆయన.. ప్రభుత్వ వైఫల్యాలను కప్పిపుచ్చుకునేందుకే ఆర్థిక వ్యవస్థ వేగంగా అభివృద్ధి చెందుతోందంటూ తప్పుడు ప్రచారం చేస్తున్నారని మండిపడ్డారు. రాష్ట్ర ఆర్థిక వ్యవస్థ తీవ్ర మందగమనంలో ఉందనడానికి ఏపీఈఆర్‌సీ (APERC), కాగ్ (CAG) గణాంకాలే స్పష్టమైన నిదర్శనమని జగన్ పేర్కొన్నారు.

Drunk And Drive: మందుబాబులకు బిగ్ అలర్ట్.. ఇకపై డ్రంక్ అండ్ డ్రైవ్ చేస్తే జైలుకే.. కోర్టు సంచలన తీర్పు!

విద్యుత్ డిమాండ్ తగ్గుదల.. కుంటుపడిన ప్రభుత్వ పన్నుల ఆదాయం:

ఏపీఈఆర్‌సీ గణాంకాల ప్రకారం 2023-24తో పోలిస్తే 2025-26 నాటికి డిస్కంల విద్యుత్ విక్రయాలు, పంపిణీ తగ్గిపోవడం రాష్ట్రంలోని పారిశ్రామిక, ఆర్థిక మందగమనానికి అద్దం పడుతోందని వైఎస్ జగన్ వివరించారు. అలాగే 2023-24లో రూ.85,922 కోట్లుగా ఉన్న రాష్ట్ర సొంత పన్నుల ఆదాయం, 2025-26 నాటికి కేవలం రూ.86,552 కోట్లకు మాత్రమే చేరిందని కాగ్ నివేదికలను ఉదహరిస్తూ ఎత్తిచూపారు. రెండేళ్ల కాలంలో వార్షిక వృద్ధిరేటు కేవలం 0.15 శాతానికి పరిమితం కావడం రాష్ట్రంలో పెట్టుబడులు పడిపోయాయనేందుకు నిదర్శనమని ఆయన ఆరోపించారు.

నిరుద్యోగంలో ఏపీ రెండో స్థానం.. ఉద్యోగాల కల్పనపై తప్పుడు లెక్కలు:

రాష్ట్ర ఆర్థిక మందగమనం ఉపాధి రంగంపై తీవ్ర ప్రభావం చూపుతోందని జగన్ ఆందోళన వ్యక్తం చేశారు. 2026-27 తొలి త్రైమాసికంలో దేశంలో నాలుగో స్థానంలో ఉన్న నిరుద్యోగం, రెండో త్రైమాసికం నాటికి రెండో స్థానానికి ఎగబాకిందని తెలిపారు. వాస్తవ పరిస్థితి ఇలా ఉంటే, ప్రభుత్వం మాత్రం ఎలాంటి ఆధారాలు లేకుండా 23 లక్షల ఉద్యోగాలు కల్పించామని చెబుతూ ప్రజలను తప్పుదోవ పట్టిస్తోందని వైఎస్ జగన్ విమర్శించారు.