Pragstamitha Shukra Moudyami: నవంబర్ 30వ తేదీ నుంచి ప్రాగస్తమిత శుక్రమౌఢ్యమి ప్రారంభం అవుతుంది. ఏ గ్రహమైనా సరే సూర్యుడికి దగ్గరగా వచ్చినప్పుడు సహజంగా ఆ గ్రహానికి ఉండే శక్తి మొత్తం సూర్యుడి శక్తి వల్ల క్షీణించిపోతుంది. ఆ గ్రహం తన శక్తిని కోల్పోతుంది. దీన్నే మౌఢ్యమి లేదా మూఢం అని పిలుస్తారు. అలా ఆ గ్రహం తన శక్తిని కోల్పోయినప్పుడు కొన్ని ప్రత్యేక పనులు చేయకూడదని జ్యోతిష్య శాస్త్రంలో చెప్పారు.
నవంబర్ 30వ తేదీ నుంచి ప్రాగస్తమిత శుక్రమౌఢ్యమి ప్రారంభం అవుతుంది. అంటే శుక్రుడు సూర్యుడికి దగ్గరగా వస్తున్నాడు. శుక్ర మౌఢ్యమి ప్రారంభం అవుతుంది. మరి దీన్ని ప్రాగస్తమిత శుక్రమౌఢ్యమి అని ఎందుకు అన్నారంటే.. ఏ గ్రహమైనా సూర్యుడికి బాగా దగ్గరగా వస్తే.. దాన్ని ప్రాగస్తమిత మౌఢ్యమి అని పిలుస్తారు. నవంబర్ 30న ఖగోళంలో శుక్రుడు సూర్యుడికి బాగా దగ్గరగా వస్తున్నాడు. అందుకే దీన్ని ప్రాగస్తమిత శుక్రమౌఢ్యమి అనే పేరుతో పిలుస్తారు.
నవంబర్ 30వ తేదీన ప్రారంభమయ్యే ప్రాగస్తమిత శుక్రమౌఢ్యమి ఫిబ్రవరి 13వ తేదీ వరకు ఉంటుంది. అంటే 76 రోజుల పాటు ఉంటుంది. మాఘ ఏకాదశి వరకు ఉంటుంది. ఈ 76 రోజులు.. జ్యోతిష్యశాస్త్ర పరంగా కొన్ని పనులు చేసుకోవచ్చు. అవేంటో తెలుసుకుందాం..
ప్రాగస్తమిత శుక్రమౌఢ్యమిలో ఈ పనులు చేసుకోవచ్చు..
* సీమంతం చేసుకోవచ్చు.
* నామకరణం చేసుకోవచ్చు.
* పిల్లలకు అన్నప్రాసన చేసుకోవచ్చు.
* ప్రత్యేకమైన పూజలు చేసుకోవచ్చు.
* గ్రహ దోష నివార కోసం పూజలు, జపాలు, హోమాలు చేసుకోవచ్చు.
* జాతకాలు రాయించుకోవచ్చు, చెప్పించుకోవచ్చు. శుక్రమౌఢ్యమిలో రాయించుకున్నా ఎటువంటి దోషం ఉండదు.
* ఇంటికి చిన్న చిన్న మరమ్మతులు చేయించుకోవచ్చు.
* కొత్త దుస్తులు కొనుక్కోవచ్చు.
* రిజిస్ట్రేషన్లు, అగ్రిమెంట్లు చేసుకోవచ్చు.
* అత్యవసరం ఉంటే భూములు కొనటం, అమ్మటం చేసుకోవచ్చు. కానీ, మనకు బాగా కలిసి రావాలంటే శుక్రమౌఢ్యమి పూర్తయ్యాక కొనుగోలు చేయటం ఎక్కువ ఫలితాలను కలిగిస్తుంది.
* శుక్రమౌఢ్యమిలో ల్యాండ్ రిజిస్ట్రేషన్లు దోషం కాదు. కానీ, వీలైతే శుక్రమౌఢ్యమి తర్వాత చేసుకుంటే ఎక్కువ ఫలితం కలుగుతుంది. అన్నదానం చేస్తే మంచిది.
శుక్రమౌఢ్యమి సందర్భంగా శుక్రుడి శక్తి తగ్గిపోయిన సమయం కాబట్టి ఈ సమయంలో శుక్రుడి బలాన్ని పెంచుకోవటానికి ద్వాదశి రాశుల వారు ప్రతి రోజు ఓం ఘం శుక్రాయ నమ: అనే మంత్రాన్ని చదువుకోవాలి. అలాగే శుక్రుడి ధ్యాన శ్లోకం రోజూ 20సార్లు చదువుకోవటం, శుక్రుడికి అధిష్టాన దేవత రాజరాజేశ్వరి దేవి కాబట్టి ప్రతిరోజు రాజరాజేశ్వరి అష్టకాన్ని చదవటం లేదా వినటం చేస్తే మంచిది. ఇలా చేయడం వల్ల శుక్రమౌఢ్యమి పూర్తయ్యాక శుక్రుడు ఇంకా తొందరగా తన అనుగ్రహాన్ని కలిగింపజేస్తాడు.
