Rapido Ownly: రాపిడో ‘ఓన్లీ’ ఫుడ్ డెలివరీ యాప్ లాంచ్.. ఇకపై ఎలాంటి ఛార్జీలు లేకుండానే.. ఈవెంట్ లో సందడి చేసిన నాని
రాపిడో తన ప్రత్యేక ఫుడ్ డెలివరీ వేదిక ‘ఓన్లీ’ (Rapido Ownly) యాప్ను శనివారం భాగ్యనగరంలో అధికారికంగా ప్రారంభించింది.
- V Santhosh Kumar
- Published on- September 26, 2026 / 03:15 PM IST
Rapido launches food delivery app ownly in hyderabad with zero commission model
Rapido Ownly: రైడ్ షేరింగ్ రంగంలో ప్రముఖ సంస్థగా పేరుపొందిన రాపిడో, తన ప్రత్యేక ఫుడ్ డెలివరీ వేదిక ‘ఓన్లీ’ (Rapido Ownly) యాప్ను శనివారం భాగ్యనగరంలో అధికారికంగా ప్రారంభించింది. మార్చి నెలలో బెంగళూరులో పైలట్ ప్రాజెక్ట్గా మొదలైన ఈ సేవలకు విశేష ఆదరణ లభించడంతో, హైదరాబాద్ను తమ రెండో ప్రధాన మార్కెట్గా ఎంచుకున్నట్లు సంస్థ ప్రకటించింది. బిర్యానీలు, ఇరానీ కేఫ్లు, రాత్రిపూట దొరికే రుచికరమైన ఆహారానికి కేరాఫ్ అడ్రస్గా నిలిచే హైదరాబాద్లో విస్తరించడం తమ డెలివరీ నెట్వర్క్కు ఎంతో దోహదపడుతుందని రాపిడో ప్రతినిధులు వెల్లడించారు.
జీరో కమీషన్ మోడల్ – రెస్టారెంట్లు, కస్టమర్లకు భారీ ప్రయోజనం:
ఈ యాప్ యొక్క ముఖ్య ప్రత్యేకత జీరో కమీషన్ మోడల్. దీనివల్ల రెస్టారెంట్ల నుంచి ఎటువంటి అదనపు కమీషన్ వసూలు చేయరు. ఫలితంగా ఆహారం ధరలు పెరగకుండా, కస్టమర్లు కేవలం ఆహార అసలు ధర, డెలివరీ ఛార్జీలు మాత్రమే చెల్లిస్తే సరిపోతుంది. మధ్యలో ఎటువంటి దాగుడుమూతల రుసుములు ఉండవని సంస్థ కో-ఫౌండర్ అరవింద్ సంక స్పష్టం చేశారు. రెస్టారెంట్లు తాము సంపాదించిన పూర్తి ఆదాయాన్ని తమ వద్దే ఉంచుకోవచ్చని, ఇది ఆహార ప్రియులకు, హోటల్ నిర్వాహకులకు ఇద్దరికీ లాభదాయకమైన విధానమని ఆయన తెలిపారు.
రాపిడో క్యాప్టెన్లకు అదనపు ఆదాయం – లాంచ్ ఈవెంట్లో మెరిసిన హీరో నాని:
రాపిడో నెట్వర్క్కు వెన్నుముకగా ఉన్న ‘రాపిడో క్యాప్టెన్లు’ ఇకపై ఫుడ్ డెలివరీలు కూడా చేస్తారు. దీని ద్వారా వారికి అదనపు ఉపాధి అవకాశాలు లభిస్తాయి. ఈ యాప్ ప్రారంభోత్సవాన్ని పురస్కరించుకుని హైదరాబాద్లో క్యాప్టెన్ల కోసం ప్రత్యేకంగా బిర్యానీ పార్టీ ఏర్పాటు చేశారు. ఈ కార్యక్రమంలో టాలీవుడ్ ప్రముఖ నటుడు నాని ముఖ్య అతిథిగా హాజరై, నగరం నలుమూలల నుంచి వచ్చిన క్యాప్టెన్లతో ముచ్చటించి వారిలో ఉత్సాహాన్ని నింపారు. ఈ యాప్ ఆండ్రాయిడ్, ఐఓఎస్ స్టోర్లలో స్వతంత్రంగానే కాకుండా, ప్రధాన రాపిడో యాప్ ద్వారా కూడా వినియోగదారులకు అందుబాటులో ఉంటుంది.