Maharashtra Tragedy: మహారాష్ట్రలోని నాందేడ్ జిల్లాలో దారుణం జరిగింది. ఒకే కుటుంబానికి చెందిన నలుగురు అనుమానాస్పద స్థితిలో చనిపోయారు. పిల్లలు, తల్లిదండ్రుల మృతదేహాలు వేర్వేరు ప్రదేశాల్లో కనిపించాయి. పిల్లల మృతదేహాలు రైలు పట్టాలపై కనిపించగా.. తల్లిదండ్రులు ఇంట్లో ఉరి వేసుకుని కనిపించారు.
మహారాష్ట్రలోని నాందేడ్ జిల్లా ఒక్కసారిగా ఉలిక్కిపడింది. ఒకే కుటుంబానికి చెందిన నలుగురి మృతదేహాలు లభించాయి. ఇది ఆత్మహత్య కేసు అయి ఉంటుందని పోలీసులు అనుమానిస్తున్నారు. అయితే కొన్ని కీలక ప్రశ్నలకు ఇంకా సమాధానాలు లభించలేదు. మృతులలో దంపతులు, వారి ఇద్దరు పిల్లలు ఉన్నారు. ఈ ఘటన వేర్వేరు పోలీసు స్టేషన్ల పరిధిలోకి వచ్చే రెండు వేర్వేరు ప్రదేశాల్లో జరిగింది.
వేర్వేరు ప్రదేశాలలో ఒకే కుటుంబానికి చెందిన నలుగురు మృతదేహాలు లభ్యం..
నాందేడ్లోని సీనియర్ పోలీసు వర్గాల ప్రకారం, ఈ ఘటన బరాడ్, ముద్ఖేడ్ పోలీస్ స్టేషన్ల పరిధిలో జరిగింది. లఖ్ కుటుంబానికి చెందిన ఇద్దరు పిల్లల మృతదేహాలు సమీపంలోని రైల్వే ట్రాక్లపై లభించగా, వారి తల్లిదండ్రులు తమ ఇంట్లో ఉరి వేసుకుని వేలాడుతూ కనిపించారు. ఈ ఘటన స్థానికంగా సంచలనం రేపింది. వారిని భయాందోళనకు గురి చేసింది. కేసు నమోదు చేసిన పోలీసులు.. మరణాలకు దారితీసిన పరిస్థితులపై సమగ్ర దర్యాప్తు చేపట్టారు. అన్ని కోణాల్లో విచారణ చేస్తున్నారు.
గురువారం తెల్లవారుజామున రైలు పట్టాలపై ఇద్దరు పిల్లల మృతదేహాలు లభించాయని పోలీసులు తెలిపారు. ప్రాథమిక సమాచారం ప్రకారం, వారు కదులుతున్న రైలు కింద పడి ఉండొచ్చని తెలుస్తోంది, అయితే ఇది ఆత్మహత్యా లేక దురదృష్టవశాత్తు జరిగిన ప్రమాదమా అనేది దర్యాప్తు అధికారులు ఇంకా నిర్ధారించాల్సి ఉంది. “ఆ పిల్లలు రైలు ముందు దూకారా లేక ప్రమాదవశాత్తు రైలు ఢీకొనడంతో మరణించారా అనేది ఇంకా స్పష్టంగా తెలియదు,” అని ఒక పోలీసు అధికారి తెలిపారు. సంఘటనల క్రమాన్ని నిర్ధారించడంలో పోస్టుమార్టం నివేదికలు, రైల్వే సీసీటీవీ ఫుటేజ్ కీలకం కానున్నాయి.
పిల్లల తల్లిదండ్రులు వారి ఇంట్లో ఉరి వేసుకుని ఉన్నట్లు పోలీసులు కనుగొన్నారు. ప్రాథమిక దర్యాఫ్తులో సామూహిక ఆత్మహత్యలు అని తెలిసినా.. పోలీసులు ఇంకా తుది నిర్ధారణకు రాలేకపోతున్నారు.
పోలీసు బృందాలు ఆత్మహత్య లేఖలు, పెనుగులాట ఆనవాళ్లు లేదా మరణాలకు దారితీసిన కారణాలను వివరించగల ఇతర ఆధారాల కోసం ఇంటిని క్షుణ్ణంగా పరిశీలిస్తున్నాయి. దర్యాప్తు అధికారులు ఇప్పుడు సంఘటనల క్రమాన్ని క్రోడీకరించి, ఈ మరణాలన్నింటికీ ఒకే కారణం ఏదైనా ఉందా అని తెలుసుకునే పనిలో ఉన్నారు. అధికారులు ఇరుగుపొరుగు వారిని, బంధువులను విచారిస్తున్నారు. కుటుంబంపై ప్రభావం చూపి ఉండొచ్చని భావిస్తున్న ఆర్థిక ఇబ్బందులు, కుటుంబ కలహాలు లేదా ఇతర ఒత్తిళ్ల గురించి ఆరా తీస్తున్నారు. ఈ కేసును అత్యంత సున్నితంగా పరిగణిస్తున్నామని, అన్ని కోణాల్లో దర్యాప్తు చేస్తామని పోలీసు ఉన్నతాధికారులు తెలిపారు.
Also Read: నిద్రలో పదో అంతస్తు నుంచి పడిపోయిన వ్యక్తి.. కాలు 8వ అంతస్తు గ్రిల్లో ఇరుక్కుపోవడంతో..
