Amazon
ఈ-కామర్స్‌ దిగ్గజం అమెజాన్‌, స్టార్టప్‌ కంపెనీ అఫిర్మ్‌ సంస్థలు సంయుక్తంగా కొత్త ఆఫర్‌ను ప్రకటించాయి. పైలట్‌ ప్రాజెక్టుగా ప్రస్తుతం అమెరికాలో కొద్ది మందికే ఈ ఆఫర్‌ను వర్తింప చేస్తున్నారు. అక్కడ వచ్చే ఫలితాలను బట్టి ప్రపంచంలోని ఇతర దేశాలకు ఈ ఆఫర్‌ను వర్తింప చేసే అవకాశాలు కనిపిస్తున్నాయి.
‘ఇప్పుడు కొనండి, తర్వాత చెల్లించండి’ అనే పాలసీని ఇప్పుడు అన్ని కంపెనీలు అమలు చేసేందుకు ఆసక్తి చూపిస్తున్నాయి. ఇప్పటికే యాపిల్‌ సంస్థ ఈ తరహా ఆఫర్‌ను అమల్లోకి తీసుకొచ్చింది. అయితే తాజాగా అమెజాన్‌ సైతం అదే బాట పట్టింది. దీని కోసం అమెరికాకే చెందిన అఫిర్మ్‌ సంస్థతో జత కట్టింది. ఎంపిక చేసిన కస్టమర్లకు మాత్రమే ఈ ఆఫర్‌ను ప్రయోగాత్మకంగా అందుబాటులోకి తీసుకురానున్నారు.
పిల్లల నుంచి పెద్దల వరకు అన్ని వర్గాల వారు అమెజాన్‌ కస్టమర్‌ బేస్‌లో ఉన్నారు. అయితే వీరిలో యూత్‌, పార్ట్‌టైం జాబ్‌ చేసే వాళ్లు లక్ష్యంగా ఈ బయ్‌ నౌ పే లేటర్‌ ఆప్షన్‌ను అందుబాటులోకి తీసుకురానున్నారు. ఖరీదైన వస్తువులు కొనాల్సిన అవసరం, ఆసక్తి ఉన్నా.. ఒకేసారి కొనేందుకు డబ్బులు చాలక, క్రెడిక్‌ కార్డులు లేక ఇబ్బందులు పడే వారికి ఈ ఆఫర్‌లో ప్రాధాన్యత ఇవ్వనున్నారు.
ఈ పథకానికి సంబంధించి షాపింగ్‌ చేసేది అమెజాన్‌ సైట్‌లో అయినా సొమ్ము చెల్లింపు వ్యవహారం సజావుగా జరిగేలా చూసుకునే బాధ్యత అఫిర్మ్‌ స్టార్టప్‌దే. బాధ్యతగా ఉండే యూత్‌కి ఈ ఆఫర్ అందివ్వడం ద్వారా బలమైన కస్టమర్‌ బేస్‌ను ఏర్పాటు చేసుకునే లక్ష్యంతో ఆఫిర్మ్‌ సంస్థ ఈ కాన్సెప్టును అందుబాటులోకి తీసుకొచ్చింది.
ప్రస్తుతం ఈ-కామర్స్‌ సైట్లలో రకరకాల ఆఫర్లు అందుబాటులో ఉన్నా అందులో వందకు తొంభైశాతం ఆఫర్లు ప్రత్యేకంగా ఏ ప్రొడక్టుకు ఆ ప్రొడక్టు అన్నట్లుగానే ఉంటాయి. అయితే ఈ కొత్త ఆఫర్‌లో వివిధ కేటగిరీలకు చెందిన వస్తువులను కొనుగోలు చేసిన తర్వాత వచ్చిన మొత్తం బిల్లును తర్వాత చెల్లించే వెసులుబాటు కూడా కల్పించింది. తర్వాత చెల్లింపుల పేరుతో అధిక వడ్డీలు, హిడ్డెన్‌ ఛార్జీలు ఏమీ విధించమని ఆ సంస్థ చెబుతోంది. ఈ ఆప్షన్‌ ద్వారా 50 డాలర్ల వరకు విలువైన వివిధ వస్తువులను ఒకేసారి కొనుగోలు చేసి ఆ తర్వాత చెల్లింపులు చేయవచ్చు.
‘ఇప్పుడు కొనండి, తర్వాత చెల్లించండి’ ఆఫర్ ను ప్రస్తుతం అమెరికాలోనే అందిస్తున్నారు. అది కూడా అమెజాన్‌ కస్టమర్‌ బేస్‌లో ట్రాక్‌ రికార్డు బాగున్న వారికే మాత్రమే అందుబాటులోకి తీసుకొచ్చారు. అక్కడ వచ్చే ఫలితాలను బట్టే ఈ పథకం భారత్ కు వచ్చే అవకాశం ఉంది. ప్రస్తుతం మన దగ్గర క్రెడిట్ కార్డు ఈఎంఐలే అందుబాటులో ఉన్నాయి.
