Imran Khan: ఆట మార్చేశాడు.. సెకండ్ ఇన్నింగ్స్ కోసం ఇమ్రాన్ తంటాలు

Imran Khan (1)

Imran Khan: పాకిస్తాన్ ప్రధానిగా అవిశ్వాస తీర్మానంలో ఓడిపోయాడు ఇమ్రాన్ ఖాన్‌. కొత్త ప్రభుత్వం ఏర్పాటు చేసి మరోసారి అధికారం చేజిక్కించుకోవాలని ప్లాన్ చేస్తున్న ఇమ్రాన్.. విదేశాల్లో సెటిలైన పాకిస్తానీల నుంచి విరాళాలు అడగటం మొదలుపెట్టారు. ఇప్పటి వరకు తనని గద్దె దింపడానికి విదేశీ శక్తులు కుట్రపన్నాయని ఆరోపించారు. కానీ, తాజాగా ఆయా దేశాల పట్ల కాస్త పాజిటివ్ యాంగిల్ కనబరుస్తున్నారు. తనకు భారత్‌ సహా ఏ దేశంపై ద్వేషం లేదని చెబుతున్నారు.

ఇమ్రాన్‌ఖాన్‌ తన సపోర్టర్లతో కలిసి కరాచీలో శనివారం భారీ ర్యాలీ నిర్వహించారు. దీన్ని బలప్రదర్శనగా చూపించాలనుకున్న ఇమ్రాన్.. జనసమూహాన్ని ఉద్దేశిస్తూ ప్రసంగించారు. ‘‘నేనే దేశానికీ వ్యతిరేకం కాదు. భారత్‌, ఐరోపా, అమెరికా.. దేన్నీ ద్వేషించడం లేదు. ఏ వర్గానికీ వ్యతిరేకం కాదు’’ అని వ్యాఖ్యానించారు.

వాస్తవానికి గతంలో పలు వేదికలపై ప్రసంగించిన ఇమ్రాన్‌.. భారత్‌, అమెరికా సహా కొన్ని ఐరోపా దేశాలపై తీవ్ర స్థాయిలో ఆరోపణలు చేశారు. పదవి కోల్పోవడానికి కొద్ది రోజుల ముందు కూడా తనపై విదేశీ కుట్రలు జరుగుతున్నాయని, వాటికి వ్యతిరేకంగా నిరసన ప్రదర్శనలు నిర్వహించాలని తన పార్టీవర్గాలకు పిలుపునిచ్చారు.

Read Also: విదేశీయుల నుంచి విరాళాలు అడుగుతున్న ఇమ్రాన్ ఖాన్

రష్యా పర్యటనకు తాను వెళ్లడం ఇష్టంలేని అమెరికాయే ఈ కుట్రకు కారణమంటూ అగ్రరాజ్యంపై ధ్వజమెత్తారు. మరోవైపు ఉక్రెయిన్‌పై దండెత్తిన రష్యాకు వ్యతిరేకంగా ఐరాసలో ఓటేయాలని ఐరోపా సమాఖ్య కోరగా.. ‘‘మీరెలా చెబితే అలా వినడానికి మేమేమైనా మీ బానిసలమా?’’ అని విరుచుకుపడ్డారు. తాను పదవికి దూరమవడానికి కొద్దిరోజుల ముందు నుంచి భారత్‌పై ఇమ్రాన్‌ తన వైఖరికి భిన్నంగా వ్యవహరించారు. పలు సందర్భాల్లో భారత విధానాలపై ప్రశంసలు కురిపించారు.