నవంబరులో జరగనున్న అమెరికా ఎన్నికల్లో అధ్యక్ష పదవికి డెమొక్రాట్ అభ్యర్థిగా జో బిడెన్ నామినేట్ అయ్యారు. దీంతో అధికారికంగా ఆయన నామినేట్ అయినట్టయింది. ఇక ప్రస్తుత ప్రెసిడెంట్ డొనాల్డ్ ట్రంప్ ని ఆయన ఎదుర్కోనున్నారు.
ఈ నామినేషన్ తన జీవితానికే గౌరవప్రదమని బిడెన్ ట్వీట్ చేశారు. డెమొక్రటిక్ నేషనల్ కన్వెన్షన్ జరిగిన రెండో రోజే ఈ నామినేషన్ ప్రక్రియను నిర్వహించారు. కన్వెన్షన్ తొలి రోజున ఇదివరకటి, ప్రస్తుత డెమొక్రటిక్ నేతలు బిడెన్ అభ్యర్థిత్వానికి మద్దతునిస్తూ ప్రసంగాలు చేశారు. ఓటింగ్ పూర్తి అయిన అనంతరం మాట్లాడిన బిడెన్.. తనను నామినీగా ఎన్నుకున్నందుకు అందరికీ కృతజ్ఞతలు తెలిపారు.
‘డెమోక్రాటిక్ పార్టీ తరఫున అమెరికా అధ్యక్ష పదవికి నన్ను నామినేట్ చేయడం నా జీవితానికి లభించిన అత్యంత అరుదైన గౌరవంగా భావిస్తున్నాను’అంటూ బిడెన్ ట్వీట్ చేశారు. ‘మీ అందరికి ధన్యవాదాలు. ఈ ప్రపంచం నాకు, నా కుటుంబానికి మద్దతుగా ఉందని విశ్వసిస్తున్నాను’ అని తెలిపారు.
ఇక బిడెన్ అభ్యర్థిత్వాన్ని సమర్థించిన వారిలో గత, ప్రస్తుత డెమోక్రాటిక్ నాయకులు, పార్టీ అధికార ప్రతినిధులు ఉన్నారు. ‘లీడర్‌షిప్‌ మ్యాటర్స్’ థీమ్‌తో జరిగిన ఈ కార్యక్రమానికి మాజీ అధ్యక్షుడు బిల్ క్లింటన్‌, మాజీ రిపబ్లికన్ స్టేట్ సెక్రటరీ కోలిన్ పావెల్, మాజీ అధ్యక్షుడు జిమ్మీ కార్టర్‌(95)లు హాజరయ్యారు. అధ్యక్ష ఎన్నికలకు కేవలం 77 రోజుల సమయం మాత్రమే ఉంది. ఈ రెండున్నర నెలల కాలం బిడెన్ భవిష్యత్తుని నిర్ణయించనుంది.
It is the honor of my life to accept the Democratic Party’s nomination for President of the United States of America. #DemConvention
— Joe Biden (@JoeBiden) August 19, 2020
