సౌత్ టాప్ కొరియోగ్రాఫర్ హీరో, డైరెక్టర్ ఆల్ రౌండర్ రాఘవ లారెన్స్ కి జాక్ పాట్ తగిలింది. హారర్ కామెడీల స్పెషలిస్టుగా పేరున్న లారెన్స్ తన ఫార్ములాని బాలీవుడ్ కి ఎక్స్ పోర్ట్ చేస్తున్నాడు. అక్కడ అక్షయ్ కుమార్ హీరోగా `కాంచన` `ముని` చిత్రాల్ని రీమేక్ చేసేందుకు సన్నాహాలు చేస్తున్నాడు. ఇప్పటికే ఆ చర్చలు సాగుతున్నాయని తెలుస్తోంది. అయితే ఇది రీమేక్ కాదు. కాంచన ముని చిత్రాల్ని కలిపి తీసే ఓ హారర్ కామెడీ చిత్రం. అక్షయ్ కుమార్ దెయ్యం పాత్రలో నటించబోతున్నారన్నది మాత్రం స్పష్టంగా తెలుస్తోంది.
అక్షయ్ సైతం ఈ సినిమాలో నటించేందుకు ఆసక్తిని వ్యక్తం చేశారట. వాస్తవానికి దెయ్యాలు అంటే తనకు చాలా భయమని అక్షయ్ చెబుతుంటారట. అలాంటి హీరోని హారర్ సినిమాకి కమిట్ చేయించడంలో లారెన్స్ పనితనాన్ని మెచ్చుకోవాల్సిందే.
ఇక ఈ చిత్రాన్ని 2020 లోనే రిలీజ్ చేసే అవకాశం ఉంది. తొలిగా ఆర్నెళ్ల పాటు స్క్రిప్టు వర్క్ చేస్తారట. ఈ ఏడాది జూన్- జూలైలో సినిమాని ప్రారంభించి ఏడాది చివరి నాటికి పూర్తి చేయాలన్నది ప్లాన్. దానికి అనుగుణంగా అక్కీ కాల్షీట్లు కేటాయించనున్నారని తెలుస్తోంది. ద్విభాషా చిత్రాల్ని తెరకెక్కించిన సమర్ధుడు రాఘవ లారెన్స్ ఇప్పటికే తెలుగు తమిళంలో డజను పైగా సినిమాలకు దర్శకత్వం వహించాడు.
