సునామీ లాంటి క్రేజ్‌తో మూడు రోజుల ముందు నుంచే ప్రపంచాన్నిషేక్ చేస్తున్న ఎవెంజర్స్ : ఎండ్ గేమ్, అంచనాలను అందుకునే రేంజ్‌లోనే నిలిచింది..
అవెంజర్స్.. ప్రపంచవ్యాప్తంగా అసాధారణ క్రేజ్ దక్కించుకుని ప్రతీ పార్ట్‌లోనూ క్రేజ్‌కు పదింతల వసూళ్లు రాబట్టిన అవెంజర్స్ ఫ్రాంచైజ్ నుంచి చివరి పార్ట్‌గా రిలీజ్ అయ్యింది.. ఎవెంజర్స్ ఎండ్ గేమ్ . అకాశాన్ని తాకే అంచనాలతో, ప్రపంచవ్యాప్తంగా భారీ రెవిన్యూ టార్గెట్‌తో థియేటర్లలోకి దూసుకొచ్చిన ఎవెంజర్స్.. అలరించారా లేదా జస్ట్ ఓకే అనిపించారా? అనేది ఇప్పుడు చూద్దాం.
కథ విషయానికొస్తే.. తన కుమార్తెను కూడా చంపి, 6 మణులను దక్కించుకున్న థానోస్ ఒక్క చిటికెలో సగం ప్రపంచాన్ని అంతం చేస్తాడు. అయితే ఈలోగా అతని ఆచూకీ తెలుసుకున్న అవెంజర్స్ మెరుపుదాడి చేసి థానోస్‌ను అంతమొందిస్తారు. కానీ అతని దగ్గర ఉండాల్సిన మణులు మాత్రం కనిపించవు. 5 సంవత్సరాల తర్వాత టైమ్ మెషీన్‌ను తయారు చేసిన అవెంజర్స్ , కాలంలో వెనక్కి పయనించి 6 మణులను ఎలా సొంతం చేసుకున్నారు..? బతికొచ్చిన థానోస్‌ని ఎలా అంతం చేశారు..? చనిపోయిన మనుషులందరినీ మళ్లీ ఎలా తిరిగి కాపాడారు? అన్నది సిల్వర్ స్క్రీన్‌పై చూసి తెలుసుకోవాల్సిందే.
నటీనటుల విషయానికొస్తే, ఐరన్ మ్యాన్‌గా అన్ని పార్టు‌ల్లో ఆకట్టుకున్న రాబర్ట్ డోనీ జూనియర్.. ఈ పార్ట్‌లో కూడా ఎక్కువ స్క్రీన్ స్పేస్ దక్కించుకున్నాడు. దానికి తగ్గట్టుగానే ప్రేక్షకులను నవ్విస్తూ చివరికి ఏడిపించాడు కూడా. అతని ఎమోషనల్ కనెక్ట్ సినిమాకి మంచి వెయిట్ తీసుకొచ్చింది. కెప్టెన్ అమెరికాగా అలరిస్తూ వస్తున్న క్రిస్ ఎలెన్స్ కూడా ఎండ్ గేమ్‌కి ప్రధాన బలంగా నిలిచాడు. కెప్టెన్ అమెరికా, ఐరన్ మ్యాన్‌ల మధ్య వచ్చే సన్నివేశాలు ,వాళ్లు మణిని దక్కించుకునే సన్నివేశాలు ఉత్కంఠగా నడిచాయి. హల్క్‌‌గా విపరీతమైన క్రేజ్ తెచ్చుకున్న మార్క్ రాఫెల్లో పేల్చిన పంచెస్ బావున్నాయి. క్రిస్ హేమ్స్‌వర్త్ పోషించిన థోర్ క్యారెక్టర్ కూడా ఎంటర్టైనింగ్గా సాగింది. అతని సామ్రాజ్యమైన అస్గర్డ్‌లో సన్నివేశాలు చాలా ఎంటర్టైనింగ్గా ఉంటాయి. బ్లాక్ విడో, యాంట్ మ్యాన్, నెబ్యులా, వొంగ్ రాకెట్‌లు గత పార్ట్‌లో మాదిరిగానే ఎండ్ గేమ్‌లో ప్రేక్షకులను ఉర్రూత లూగించాయి. దగ్గుబాటి రానా వాయిస్ ఓవర్ అందించిన థానోస్ క్యారెక్టర్ తన ప్రత్యేకతను నిలబెట్టుకుంది. రానా వాయిస్ వలన ఆ క్యారెక్టర్ తెలుగు ఆడియన్స్‌కి బాగా కనెక్ట్ అవుతుంది.
టెక్నీషియన్స్ విషయానికొస్తే ఎవెంజర్స్ అనే క్రియేషన్‌తో అపరకుబేరులుగా మారిన మార్వెల్ స్టూడియో అధినేతలు ప్రేక్షకుల అంచనాలు అందుకునేలా అన్ కాంప్రమైజ్డ్‌గా, 400 మిలియన్ డాలర్లతో ఎండ్ గేమ్‌ని తెరకెక్కించారు. అయితే 3 గంటల నిడివి ఉన్న ఈ సినిమాను ఎక్కడా బోర్ కొట్టకుండా కామెడీ, ఎమోషన్‌కు, అబ్బురపరిచే విజువల్ గ్రాండియర్‌ను జోడిస్తూ తెరకెక్కించారు డైరెక్టర్ ఆంథోనీ రుస్సో, జోయ్ రుస్సో.. ఎవెంజర్స్ గత పార్ట్ చూడని వాళ్లకు ఇది కాస్త కన్‌ఫ్యూజింగ్‌గా అనిపించవచ్చు ఏమోగానీ.. అల్రెడీ ఎవెంజర్స్ ఫ్యాన్స్‌గా మారిన వాళ్లకు మాత్రం ఒక పండగలా అనిపిస్తుంది ఈ సినిమా.
ట్రెంట్ ఓపలెజ్ సినిమాటోగ్రఫీ అవెంజర్స్ ఎండ్ గేమ్‌కి కొండంత అండగా నిలిచింది. పేపర్‌పై ఉన్న అనేక అనేక లేయర్స్‌ని డిఫరెంట్ లైటింగ్ స్కీమ్స్‌తో చాలా క్లియర్‌గా తెరకెక్కించాడు. త్రీడీ ఎఫెక్ట్‌గా ఆ సిన్నివేశాలు అబ్బురపరిచేలా ఎలివేట్ అయ్యాయి. అలెన్ సిల్వెస్ట్రీ నేపథ్య సంగీతం బావుంది. అక్కడక్కడా ఇండియన్ మ్యూజిక్ టచెస్ కూడా వినిపించడం కాస్త ఆశ్చర్యంగా అనిపిస్తుంది. జెఫ్రీ ఫోర్ట్ ఎడిటింగ్ పనితనం సినిమాకు ప్లస్ అయ్యింది.
ఓవరాల్‌గా చెప్పాలంటే సునామీ లాంటి క్రేజ్‌తో మూడు రోజుల ముందు నుంచే ప్రపంచాన్నిషేక్ చేస్తున్న ఎవెంజర్స్ : ఎండ్ గేమ్ అంచనాలను అందుకునే రేంజ్‌లోనే నిలిచింది. నిడివి ఎక్కువైనా కూడా బోర్ కొట్టకుండా నడిపిన విధానం వల్ల కలెక్షన్ల టార్గెట్ అనేది ఈజీగా రీచ్ అయిపోయే అవకాశాలు ఎక్కువగా ఉన్నాయి. ప్రాంతీయ భాషల్లో రిలీజ్ చెయ్యడం అనే మార్వెల్ స్టూడియోస్ స్ట్రాటజీ, ఎవెంజర్స్ ఎండ్ గేమ్ రేంజ్‌ని మరింత పెంచింది. ఇండియన్ బాక్సాఫీస్‌లోని గత హాలీవుడ్ సినిమాల రికార్డ్స్‌ను ఎవెంజర్స్ ఎండ్ గేమ్ తిరిగ రాయడం ఖాయం.
ప్లస్
టైమ్ మెషీన్ కాన్సెప్ట్
క్లైమాక్స్, ఎమోషన్స్
థోర్, రాకెట్‌ల కామెడీ
సినిమాటోగ్రఫీ
గ్రాఫిక్స్, ప్రొడక్షన్ వాల్యూస్
……………
మైనస్
ఎక్కువైన నిడివి
ప్రీ క్లైమాక్స్ సాగతీత
