MAA: చిత్ర పరిశ్రమపై ఎమ్మెల్యే అనిరుధ్ రెడ్డి వ్యాఖ్యలు.. ఖండించిన మూవీ ఆర్టిస్ట్ అసోసియేషన్

MLA Anirudh Reddy shocking comments on Film Industry Movie Artists Association Condemns

MAA: తెలంగాణ ఎమ్మెల్యే జె. అనిరుధ్ రెడ్డి సినీ ప్రముఖులపై చేసిన వివాదాస్పద వ్యాఖ్యలు రాజకీయ, సినీ వర్గాల్లో తీవ్ర దుమారం రేపుతున్నాయి. ఎమ్మెల్యే వ్యాఖ్యలపై మూవీ ఆర్టిస్ట్ అసోసియేషన్ (MAA) అధ్యక్షుడు విష్ణు మంచు సోషల్ మీడియా వేదికగా వ్యంగ్యంగా స్పందించారు. ఎమ్మెల్యే సూచన బాగుందని పేర్కొంటూనే, ఎన్నికల్లో నామినేషన్ వేసే రాజకీయ నాయకులకు కూడా ఇలాంటి పరీక్షలే ఉంటే బాగుంటుందని ఆయన చమత్కరించారు. ప్రజలు మరియు ఓటర్లు అటు రాజకీయ నాయకులకు, ఇటు సినీ ప్రముఖులకు సమానమైన నిబంధనలు ఉండాలని కోరుకుంటారని విష్ణు మంచు గుర్తు చేస్తూ, ఎమ్మెల్యేతో కలిసి ఈ అంశంపై పనిచేయడానికి సిద్ధమని ప్రకటించారు.

Fauzi: ప్రభాస్ ‘ఫౌజీ’ సెట్స్ నుండి ఫోటోలు లీక్.. మేకర్స్ సీరియస్ వార్నింగ్.. ఎవరైనా ఇక జైలుకే

‘మా’ ఉపాధ్యక్షుడు మాదాల రవి ఈ వ్యాఖ్యలను తీవ్రంగా ఖండించారు. తెలుగు చిత్ర పరిశ్రమ ఎంతో క్రమశిక్షణతో కూడుకున్నదని, ఆధారం లేని ఆరోపణలు చేయడం సరికాదని ఆయన హితవు పలికారు. చిత్ర పరిశ్రమలో ఎంతోమంది విద్యావంతులు, పద్మ పురస్కార గ్రహీతలు ఉన్నారని, సమాజ శ్రేయస్సు కోసం సినీ రంగం నిరంతరం కృషి చేస్తోందని తెలిపారు. ఎన్టీఆర్, ఏఎన్ఆర్, చిరంజీవి వంటి దిగ్గజాలు సినిమాల ద్వారా సామాజిక చైతన్యాన్ని కలిగించారని, ప్రస్తుత తరం నటులు అంతర్జాతీయ స్థాయిలో గుర్తింపు తెచ్చుకుంటూనే బాధ్యతగా వ్యవహరిస్తున్నారని ఆయన స్పష్టం చేశారు.

ముఖ్యంగా మాదకద్రవ్యాల నిర్మూలన విషయంలో మూవీ ఆర్టిస్ట్ అసోసియేషన్ అత్యంత క్రియాశీలకంగా వ్యవహరిస్తోందని మాదాల రవి వివరించారు. తెలంగాణ యాంటీ నార్కోటిక్స్ బ్యూరోతో కలిసి తాము పని చేస్తున్నామని, చిరంజీవి, రామ్ చరణ్, విజయ్ దేవరకొండ వంటి అగ్ర నటులు యువతను మేల్కొలిపేందుకు స్వచ్ఛందంగా ప్రచారంలో పాల్గొంటున్నారని గుర్తుచేశారు. డ్రగ్స్ మహమ్మారిని అంతం చేసే వరకు తమ పోరాటం కొనసాగుతుందని, చిత్ర పరిశ్రమ తన సామాజిక బాధ్యతను ఎప్పటికీ విస్మరించదని ఆయన ఈ సందర్భంగా గట్టిగా నొక్కి చెప్పారు.