Monalisa : వైరల్ గర్ల్ మోనాలిసా సంచలన ఆరోపణలు.. ‘ఆ దర్శకుడు నన్ను అసభ్యంగా తాకాడు.. కన్నవాళ్లకు చెబితే…’

viral kumbh mela girl monalisa accuses director misbehave with her at shooting time

Monalisa : మన దేశంలో రాత్రికి రాత్రి ఫేమస్ అయిపోయిన వారిలో ముందు వరుసలో నిలుస్తుంది మోనాలిసా భోస్లే. గతేడాది ప్రయాగ్‌రాజ్‌లో జరిగిన కుంభమేళా సందర్భంగా ఒక్కసారిగా నెట్టింట పాపులర్ అయ్యింది. నేచురల్ బ్యూటీ, నీలి కళ్లు ప్రతి ఒక్కరినీ ఆకర్షించాయి. దీంతో కుంభమేళాలో పూసలమ్ముకునే యువతి కాస్త సోషల్ మీడియా సెన్సేషన్ అయ్యింది. ఆ తర్వాత ఆమెకు అనేక సినిమా, మోడలింగ్ అవకాశాలు వచ్చాయి. కొన్ని చిత్రాల్లో నటించింది కూడా. అవేవీ ఇంకా విడుదల కాలేదు. కానీ ఈలోపే మరోసారి మోనాలిసా పేరు వార్తల్లో నిలిచింది. కారణం ఆమె ప్రేమ వివాహం చేసుకోవడం. కుటుంబానికి ఇష్టం లేకుండా ప్రియుడు ఫర్మాన్ ఖాన్ ని వివాహం చేసుకుంది.

అంతేకాక కేరళ పోలీస్ స్టేషన్‌కి వెళ్లింది. ఆమె వివాహం చేసుకుంది కూడా కేరళలోనే. తిరువనంతపురంలోని ఓ ఆలయంలో హిందూ సంప్రదాయం ప్రకారం మోనాలిసా.. తన ప్రియుడు ఫర్మాన్ ఖాన్‌ను వివాహం చేసుకుంది. అయితే మోనాలిసా పెళ్లిపై డైరెక్టర్ సనోజ్ మిశ్రా సంచలన వ్యాఖ్యలు చేశారు. వీరి వివాహాన్ని లవ్ జిహాద్ అంటూ ఆరోపణలు చేశారు. ఇదిలా ఉంటే మోనాలిసా బంధువొకరు మాట్లాడుతూ.. ఆమె మైనర్ అని.. ఈ పెళ్లి చట్టబద్ధం కాదన్నారు.

తమ వివాహం గురించి వస్తున్న ఆరోపణలపై మోనాలిసా దంపతులు స్పందించారు. తమ వివాహం చట్టబద్ధమేనని.. తాను మతం మారడం లేదని.. ఎవరి మతాలను వారు అనుసరిస్తామని తెలిపారు. తాము చట్టబద్ధంగానే వివాహం చేసుకున్నామని.. ఎవరి మతాలను వారు అనుసరిస్తామని అన్నారు. ఇదే క్రమంలో దర్శకుడు సనోజ్ మిశ్రాపై మోనాలిసా సంచలన ఆరోపణలు చేసింది. నేరుగా ఆయన పేరు ప్రస్తావించకుండా.. తనకు తెలిసిన ఒక మూవీ డైరెక్టర్.. సినిమాల పేరుతో మైనర్ బాలికలతో అసభ్యంగా ప్రవర్తించాడని ఆరోపించింది.

ఇప్పుడా డైరెక్టర్ తన గురించి తప్పుడు ప్రచారాలు చేస్తున్నాడని.. ఆయన సినిమాల్లో తనకు అవకాశం ఇవ్వడం లేదని తెలిపింది. పైగా అతడి సినిమాల్లో నటించాలని తనకు లేదని.. అతను చాలా చెడ్డవాడని.. సినిమాల పేరుతో మైనర్ బాలికలతో అసభ్యంగా ప్రవర్తించే అసహ్యకరమైన వ్యక్తి అని ఆరోపించింది. అతని పేరు పలకడానికే సిగ్గుగా ఉందని.. అతడి సినిమాలో తాను నటించే సమయంలో ఆ దర్శకుడు చాలా సార్లు తనను తాకుతూ లైంగికంగా వేధించాడని తెలిపింది.

పైగా ఆ దర్శకుడి ప్రవర్తన గురించి తన కుటుంబ సభ్యులకు చెబితే.. వారు తనకు మద్దతివ్వకపోగా.. మొదటి సినిమా కదా.. సర్దుకుపోవాలని తనకే నచ్చజెప్పారని.. తన బాధను ఎవరికీ చెప్పుకోలేక మౌనంగా భరించానని ఆవేదన వ్యక్తం చేసింది. అలానే తనను, తన భర్తను చంపేస్తామని బెదిరింపులు వస్తున్నాయని ఆరోపిస్తూ కేంద్ర, కేరళ, మధ్యప్రదేశ్ రాష్ట్ర ప్రభుత్వాలు తమకు సాయం చేయాలని.. రక్షణ కల్పించాలని కోరింది.