ad about infertility becomes viral: కొన్ని యాడ్స్(ప్రకటనలు) కేవలం వ్యాపార కోణంలోనే ఉంటాయి. సందేశాలతో వాటికి పని లేదు. కానీ, కొన్ని యాడ్స్ సందేశాన్ని చాటుతాయి. మనుషులను, మనసులను కదిలించేలా ఉంటాయి. మనిషి ఆలోచనలో మార్పు తీసుకొస్తాయి. అలాంటి వాటిలో ఈ యాడ్ ఒకటి. అంతర్జాతీయ మహిళా దినోత్సవాన్ని పురస్కరించుకుని ఓ సంస్థ రూపొందించిన ఈ ప్రకటన.. అందరినీ కదిలిస్తోంది. కన్నీళ్లు పెట్టిస్తోంది. గుండెను తాకేలా మంచి సందేశంతో ఉన్న ఈ యాడ్ వీడియోని మీరూ ఓసారి చూడండి మరి..
అంతర్జాతీయ మహిళా దినోత్సవాన్ని(మార్చి 8) పురస్కరించుకుని ఓ సంస్థ రూపొందించిన ప్రత్యేక యాడ్ వైరల్ గా మారింది. మహిళ అంటే మాతృత్వం మాత్రమే కాదు అని చెప్పే విధంగా తీసిన ఈ యాడ్.. హార్ట్ ను టచ్ చేస్తోంది. అందరి కళ్లలో నీళ్లు తెప్పిస్తోంది. సభ్య సమాజానికి గొప్ప సందేశాన్ని ఇస్తోంది.
ప్రముఖ నటి మోనా సింగ్‌ ఇందులో లత పాత్రలో నటించారు. ఇంటికి పెద్దకోడలు అయిన ఆమె ఉపాధ్యాయురాలిగా పనిచేస్తున్నారు. తనకంటే చిన్నదైన తోటికోడలు త్వరలోనే బిడ్డకు జన్మనివ్వబోతోంది. పిల్లలు లేని లత ఆ బాధను గుండెల్లోనే దాచుకుని కుటుంబంతో ఆనందంగా గడుపుతుంటారు. ఒక రోజు పుట్టబోయే బిడ్డకు ఏ పేరు పెట్టాలని కుటుంబసభ్యులు ఆమెను అడిగేసరికి మరింత ఉద్వేగానికి గురవుతారు.
తన కన్నీళ్లు బయటపడకుండా లత అక్కడి నుంచి లేచివెళ్లిపోతుంటే తోటికోడలు లేచి.. ‘‘నా బిడ్డకు అక్క పేరే పెట్టుకుంటాను. ఇంటికి పెద్ద కోడలిగా.. ఉపాధ్యాయురాలిగా.. ఎన్నో బాధ్యతలు చేపడుతున్నావు. కష్ట సమయంలో కుటుంబానికి అండగా ఉన్నావు. నీ చుట్టూ ఉన్నవాళ్లందరికీ ఆనందాన్ని పంచుతావు. అందుకే నా కూతురికి నీ పేరే పెడతాను’’ అనడంతో లత ఆనందంతో కన్నీళ్లు పెట్టుకుంటుంది.
సంతానలేమి కారణంగా మహిళ సామాజికంగా, మానసికంగా, శారీరకంగా ఎన్నో ఇబ్బందులు ఎదుర్కొంటోంది. అయితే వాటిని మౌనంగా భరించాల్సి వస్తోంది. ఇప్పటికైనా సమాజంలో మహిళ అంటే పిల్లలు మాత్రమే అనే ఆలోచన మారాలనే ఉద్దేశంతో సదరు సంస్థ ఈ యాడ్‌ను రూపొందించింది. SheIsCompleteInHerself హ్యాష్‌ట్యాగ్‌తో రూపొందించిన ఈ యాడ్.. నెటిజన్ల హృదయాలను హత్తుకుంది. ఇప్పటికే 18లక్షల మందికి పైగా ఈ వీడియోను వీక్షించారు.
పిల్లలు లేకపోతే ఆమె పరిపూర్ణం కాదనే భావన చాలామందిలో ఉంది. సంతానలేమి కారణంగా మహిళ అనుభవిస్తున్న మౌనవేదన ఆమెను మానసికంగా కుంగదీస్తోంది. ఇకనైనా ఆ ధోరణి మారాలి.. మహిళ అంటే పిల్లలను కనడం మించి అనే ఆలోచన రావాలి. మహిళగా ఆమె ఎప్పటికీ పరిపూర్ణమే.. అనే గొప్ప సందేశాన్ని ఇచ్చిందీ వీడియో.
