Maharashtra: కులం పేరుతో పెద్దలు తన ప్రియుడిని చంపినా తన ప్రేమను సజీవం చేసుకోవాలని ప్రయత్నించింది ఓ యువతి. తాను ప్రేమించిన యువకుడి మృతదేహాన్ని పెళ్లి చేసుకుని, తన ప్రేమ ఎల్లకాలం సజీవంగా ఉంటుందని చెప్పింది. అంత్యక్రియల సమయంలో తన నుదిటిపై కుంకుమ రాసుకుని, అతని ఇంట్లో కోడలిగా జీవిస్తానని ప్రమాణం చేసింది.
మహారాష్ట్రలోని నాందేడ్‌లో ఈ ఘటన చోటుచేసుకుంది. ఆంచల్‌ అనే అమ్మాయి, సాక్షం టేట్ (20) అనే యువకుడు ప్రేమించుకున్నారు. ఆంచల్‌కు సాక్షం టేట్ ఆమె సోదరుల ద్వారానే పరిచయం అయ్యాడు.
అతని ఇంటికి సోదరులతో ఆమె తరచూ వెళ్లడంతో ఇద్దరూ దగ్గరయ్యారు. ఆంచల్‌, సాక్షం టేట్ మూడేళ్లుగా ప్రేమించుకుంటున్నారని ఇటీవల ఆమె కుటుంబానికి తెలిసింది. ఇద్దరి కులాలు ఒకటికాకపోవడంతో ఆ ప్రేమ జంటను బెదిరించింది.
Also Read: ఈ కాలం అమ్మాయిలు మామూలోళ్లు కాదు.. చిన్న సైజు మంగళసూత్రం.. ఇప్పుడిదే ట్రెండ్‌
బెదిరింపులు వచ్చినా ఆంచల్‌ లెక్కచేయలేదు. పెద్దలను ఎదిరించి పెళ్లి చేసుకోవాలని భావించింది. వారు పెళ్లి ఏర్పాట్లు చేసుకుంటున్నారని ఆంచల్‌ సోదరులు, ఆమె తండ్రికి తెలిసింది. దీంతో టేట్‌ను వారు ఘోరంగా చంపేశారు. ఆ యువకుడి (20) తలపై రాయితో బాది ఘోరంగా చంపారు.
అతని అంత్యక్రియలు జరుగుతుండగా ఆంచల్‌ అక్కడకు చేరుకుంది. అతని మృతదేహానికి పసుపు రాసి, తన నుదిటిపై కుంకుమ రాసుకుని, మృతదేహాన్ని పెళ్లి చేసుకుంది. తర్వాత జీవితాంతం అతని భార్యగా అతని ఇంట్లోనే ఉండాలని నిర్ణయించింది.
“అతడు చనిపోయినా మా ప్రేమ గెలిచింది. నా తండ్రి, సోదరులు ఓడిపోయారు” అని ఆమె చెప్పింది. తన భర్తను చంపిన వారిని ఉరితీయాలని డిమాండ్‌ చేసింది. టేట్ చనిపోయినా తమ ప్రేమ బ్రతికే ఉందని ఆమె చెప్పింది. పోలీసులు ఆరుగురిపై పలు సెక్షన్ల కింద కేసు నమోదు చేసి అరెస్ట్‌ చేశారు.
