Delhi No Beds : గుండెలు పిండే విషాదం.. ఢిల్లీ ఆసుపత్రుల్లో బెడ్ల కొరత, సమయానికి వైద్యం అందక రిటైర్డ్ బ్రిగేడియర్ మృతి

Delhi No Beds : దేశవ్యాప్తంగా కరోనా కారణంగా దయనీయ పరిస్థితులు నెలకొన్నాయి. కరోనా రోగులతో ఆసుపత్రులన్నీ నిండిపోయాయి. ఆసుపత్రుల్లో బెడ్లు ఖాళీ లేవు. అటు ఆక్షిజన్ కొరత కూడా ఏర్పడింది. ఈ క్రమంలో సరైన సమయంలో వైద్యం అందక కరోనా రోగులు ప్రాణాలు కోల్పోతున్నారు. దేశ రాజధాని ఢిల్లీలో తీవ్ర విషాదం చోటు చేసుకుంది. కరోనా బారిన పడ్డ రిటైర్డ్ బ్రిగేడియర్, ఆసుపత్రుల్లో బెడ్లు దొరక్క, సరైన సమయానికి వైద్యం అందక మృతి చెందారు.

కరోనా బారినపడ్డ రిటైర్డ్ బ్రిగేడియర్ రష్ పాల్ సింగ్ ను కుటుంబసభ్యులు ఆసుపత్రికి తీసుకెళ్లారు. కానీ ఏ ఆసుపత్రిలోనూ బెడ్లు ఖాళీ లేవు. చివరికి ఆర్మీ బేస్ హాస్పిటల్, డీఆర్డీవో ఆసుపత్రుల్లోనూ బెడ్లు లేవు. దీంతో ఆయనను ఆసుపత్రిలో చేర్చుకోలేదు. ప్రైవేట్ ఆసుపత్రుల్లోనూ ఇదే పరిస్థితి. ఆయనను అడ్మిట్ చేసుకోవడానికి నిరాకరించారు. ఈ క్రమంలో మరోదారి లేక ఢిల్లీ నుంచి ఛండీఘర్ కి తీసుకుని వెళ్తుండగా మార్గం మధ్యలోనే ఆయన ప్రాణాలు విడిచారు. రష్ పాల్ సింగ్ ఢిల్లీలోని పశ్చిమ విహార్ లో నివాసం ఉంటున్నారు.

”ఆర్మీ బేస్ హాస్పిటల్ లో అడ్మిషన్ కి నిరాకరించిన తర్వాత కుటుంబసభ్యులు సింగ్ ను ఎయిర్ పోర్టు సమీపంలోని డీఆర్డీవో ఆసుపత్రికి తీసుకెళ్లాడు. అవసరమైన అన్ని డాక్యుమెంట్స్ చూపించినా అక్కడ ఆసుపత్రిలో అడ్మిట్ చేసుకోలేదు. ప్రైవేట్ ఆసుపత్రులు కూడా చేతులెత్తేశాయి” అని లెఫ్టినెంట్ కల్నల్ సోహి చెప్పారు.

ఢిల్లీలో ఎక్కడా బెడ్లు దొరక్కపోవడంతో కుటుంబసభ్యులు సింగ్ కు ఆక్సిజన్ సిలిండర్ ద్వారా ప్రాణవాయువు అందించారు. అలాగే ఛండీఘర్ లోని ప్రైవేట్ ఆసుపత్రికి తీసుకెళ్లారు. కానీ లాభం లేకపోయింది. ఆసుపత్రికి చేరేలోపే, వైద్యం అందే లోపే ఆయన మరణించారు.

”ఇది షాకింగ్ ఘటన. మాజీ ఆర్మీ అధికారికే ఆసుపత్రిలో బెడ్ దొరక్కపోవవడం, వైద్యం కోసం అటు తిటూ తిరగడం బాధాకరం. అత్యవసర పరిస్థితుల్లో ఉన్న సింగ్ ను మిలటరీ ఆసుపత్రులు కచ్చితంగా అడ్మిట్ చేసుకుని ఉండాల్సింది. సాధారణ పౌరులను చేర్చుకోవడం వారికి ట్రీట్ మెంట్ ఇవ్వడం పట్ల మాకు ఎలాంటి అభ్యంతరం లేదు. కానీ మాజీ సైనికి ఉద్యోగులను ఇలా వదిలేయండం కరెక్ట్ కాదు” అని లెఫ్టినెంట్ కల్నల్ సాహి అన్నారు.