Skoda Kushaq
Skoda Kushaq : ప్రముఖ వాహన తయారీ సంస్థ స్కోడా ఆటో ఇండియా అమ్మకాలు భారీగా పెరిగాయి. జూలైలో నెలలో 3వేల 80 యూనిట్లు సేల్ చేసింది. క్రితం ఏడాది ఇదే కాలంతో పోలిస్తే అమ్మకాల్లో 234 శాతం వృద్ధి నమోదు చేసింది. 2021 జూన్‌తో పోలిస్తే 320 శాతం వృద్ధి సాధించింది. జూలై 2020లో స్కోడా ఆటో కేవలం 922 కార్లను మాత్రమే విక్రయిస్తే, గడచిన జులై 2021లో దేశీయ మార్కెట్ లో 3,080 యూనిట్లను విక్రయించి 234 శాతం వృద్ధిని సాధించింది. ఈ ఏడాది జూన్‌లో కొత్తగా 734 కార్లు రోడ్డెక్కాయి.
కాగా, జూలై అమ్మకాల జోరుకు కుషాక్ మోడల్‌ కీలకమని కంపెనీ బ్రాండ్‌ డైరెక్టర్‌ జాక్‌ హోలిస్‌ తెలిపారు. ఆవిష్కరించిన నెల రోజుల్లోనే సుమారు 6వేల బుకింగ్స్‌ను కుషాక్ సొంతం చేసుకుందని చెప్పారు. కొత్తగా డీలర్‌షిప్‌ కేంద్రాల ఏర్పాటుకు 200 పైచిలుకు దరఖాస్తులు వచ్చాయని వివరించారు. గత నెలలో నెట్‌వర్క్‌ 15 శాతం విస్తరించినట్టు పేర్కొన్నారు.
స్కోడా తన కొత్త మోడల్‌ కుషాక్ ఎస్‌యూవీని ఆవిష్కరించిన విషయం తెలిసిందే. ఇండియా 2.0 ప్రాజెక్ట్‌లో భాగంగా తయారయ్యే తొలి ఉత్పత్తిగా కుషాక్ విడుదలై ఎస్‌యూవీ విభాగంలోని హ్యుందాయ్‌ క్రెటా, కియా సెల్టోస్‌ మోడళ్లకు సరికొత్త కుషాక్ పోటీ ఇచ్చింది. అందుకు కారణం ఆ కారు ఫీచర్లేనని మార్కెట్ నిపుణులు అభిప్రాయం వ్యక్తం చేస్తున్నారు.
స్కోడా కుషాక్ డిజైన్, ఫీచర్లు:
* రెండు పెట్రోల్ ఇంజన్ ఆప్షన్స్‌లో లభ్యం.
* బేస్‌ వేరియంట్‌లో 1.0 లీటర్ టర్బో-పెట్రోల్ ఇంజిన్‌ను జత చేసింది.
* ఇ‍క టాప్-ఆఫ్-లైన్ మోడల్‌ ఎస్‌యూవీలో 1.5-లీటర్ టర్బో పెట్రోల్ ఇంజిన్‌ను అమర్చింది.
* 1.5-లీటర్ వేరియంట్ 6,000 ఆర్‌పిఎమ్ వద్ద 147.5 బిహెచ్‌పి మరియు 3,500 ఆర్‌పిఎమ్ వద్ద 250 ఎన్‌ఎమ్‌ను టార్క్ అందిస్తుంది.
* 1.0-లీటర్ ఇంజన్ వేరియంట్ 5,500 ఆర్‌పిఎమ్ వద్ద గరిష్టంగా 114 బిహెచ్‌పి పవర్, 1,750 ఆర్‌పిఎమ్ వద్ద 175 ఎన్ఎమ్ టార్క్ అందిస్తుంది.
* హనీ ఆరెంజ్, టోర్నడో రెడ్, కాండీ వైట్, రిఫ్లెక్స్ సిల్వర్, కార్బన్ స్టీల్ అనే ఐదు కలర్ వేరియంట్లలో లభ్యం.
* నాలుగేళ్లు / 1,00,000 కిలోమీటర్ల వారంటీతో పూర్తి “పీస్ ఆఫ్ మైండ్” మీ సొంతం అంటోంది.
* దీన్ని ఆరేళ్ల వరకు లేదా 1,50,000 కిమి వరకు పొడిగించుకోవచ్చు.
* అంతేకాదు రెండేళ్ల పాటు పార్ట్స్ వారంటీ, రెండేళ్ల బ్యాటరీ వారంటీ, మూడేళ్లు పెయింట్ వారంటీ, ఆరేళ్లు తుప్పు వారంటీ, తొమ్మిదేళ్ల వరకు విస్తరించిన రోడ్‌సైడ్ అసిస్టెన్స్‌ ప్రోగ్రాం కూడా అందిస్తుంది.
* స్కోడా కుషాక్ ఎస్‌యూవీ ముందు భాగంలో ఐకానిక్ ఫ్రంట్ గ్రిల్, ఎల్ఈడి హెడ్‌ల్యాంప్‌లు, ఎల్ఈడి ఫాగ్ లాంప్స్, పెద్ద ఎయిర్ డ్యామ్ మరియు నిటారుగా ఉండే బోనెట్ వండి డిజైన్ ఎలిమెంట్స్ ఉన్నాయి.
* అలాగే, వెనుక భాగంలో సన్నటి ఎల్ఈడి టెయిల్ లైట్స్, రూఫ్ స్పాయిల్, షార్క్ ఫిన్ యాంటెన్నా, రియర్ వైపర్, పెద్ద రియర్ బంపర్, సైడ్‌లో అల్లాయ్ వీల్స్, రూఫ్ రైల్స్ మరియు పై భాగంలో సన్‌రూఫ్ వంటి డిజైన్ ఫీచర్లు ఉన్నాయి.
ఈ ఎస్‌యూవీలో లభించే ప్రధాన ఫీచర్లను గమనిస్తే, ఇందులో పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్, ఆటోమేటిక్ క్లైమేట్ కంట్రోల్, 6 ఎయిర్‌బ్యాగులు, ఈఎస్‌సి, హిల్-హోల్డ్ కంట్రోల్, రెయిన్ అండ్ లైట్ సెన్సార్, క్రూయిజ్ కంట్రోల్ మరియు టైర్ ప్రెజర్ మానిటరింగ్ సిస్టమ్ వంటి అనేక స్మార్ట్ ఫీచర్లు లభిస్తాయి. ఆసక్తిగల కస్టమర్లు కొత్త స్కోడా కుషాక్‌ను కంపెనీ అధికారిక వెబ్‌సైట్ ద్వారా లేదా అధికారిక స్కోడా డీలర్‌షిప్‌ల ద్వారా రూ.25,000 టోకెన్ అమౌంట్ చెల్లించి బుక్ చేసుకోవచ్చు.
స్కోడా ఆటో గతేడాది భారత దేశంలో కేవలం 10వేల కార్లను మాత్రమే విక్రయించింది. కాగా, ఈ ఏడాది చివరి నాటికి భారత మార్కెట్లో 30వేల కార్లను మరియు 2022 చివరి నాటికి 60వేల కార్లను విక్రయించాలని కంపెనీ లక్ష్యంగా పెట్టుకుంది. ఈ రెండేళ్లలో కంపెనీ విడుదల చేయబోయే కొత్త కార్లతో ఇది సాధ్యమవుతుందని స్కోడా ధీమా వ్యక్తం చేసింది.
