Svsn Varma To Contest On Pawan Kalyan
Svsn Varma : కాకినాడ జిల్లా పిఠాపురంలో రాజకీయ సమీరణాలు వేగంగా మారుతున్నాయి. టికెట్ రాలేదని అసంతృప్తితో ఉన్న మాజీ ఎమ్మెల్యే ఎస్ వీఎస్ ఎన్ వర్మ.. కార్యకర్తలు, అనుచరులతో సమావేశం కానున్నారు. పిఠాపురం నుంచి ఇండిపెండెంట్ గా బరిలోకి దిగేందుకు ప్లాన్ చేస్తున్నట్లుగా తెలుస్తోంది. కార్యకర్తల నిర్ణయంతో బరిలోకి దిగే అవకాశం ఉందని వర్మ వర్గీయులు అంటున్నారు. ఒకవేళ పిఠాపురం నుంచి వర్మ స్వతంత్ర అభ్యర్థిగా బరిలోకి దిగితే.. త్రిముఖ పోటీ ఉండే ఛాన్స్ ఉంది.
నిన్న టీడీపీ విడుదల చేసిన రెండో జాబితా పిఠాపురంలో అసమ్మతిని రాజేసింది. పిఠాపురం నుంచి పోటీ చేస్తున్నానని జనసేన అధినేత పవన్ కల్యాణ్.. ప్రకటించడంతో టీడీపీ కార్యకర్తలు రోడ్డెక్కారు. పార్టీ జెండాలు, ఫ్లెక్సీలకు నిప్పుపెట్టి రచ్చ రచ్చ చేశారు. వర్మకు సీటు ఇవ్వకపోవడంతో తమ అసంతృప్తిని బాహాటంగా వ్యక్తం చేశారు. మూకుమ్మడిగా రాజీనామాలు చేసేందుకు కూడా సిద్ధమవుతున్నారు.
పిఠాపురంలో కాపు సామాజిక ఓట్లు అత్యధికంగా ఉంటాయి. 2014లో వర్మ ఇండిపెండెంట్ గా పోటీ చేసి గెలిచారు. ఈసారి కచ్చితంగా పిఠాపురం టీడీపీ టికెట్ వర్మకే వస్తుందని అంతా భావించారు. కానీ, పొత్తులో భాగంగా పిఠాపురం నుంచి తాను పోటీ చేస్తున్నట్లుగా స్వయంగా పవన్ కల్యాణ్ ప్రకటించారు. ఈ క్రమంలో వర్మ నిర్ణయం ఏంటి? పవన్ కు వర్మ సపోర్ట్ చేస్తారా? లేక స్వతంత్ర అభ్యర్థిగా బరిలోకి దిగుతారా? వర్మ తదుపరి కార్యాచరణ ఏ విధంగా ఉండనుంది? అనేది హాట్ టాపిక్ గా మారింది.
పిఠాపురం టీడీపీ టికెట్ ఆశించి భంగపడ్డ మాజీ ఎమ్మెల్యే వర్మ.. కార్యకర్తలు, అనుచరులతో సమావేశం కానున్నారు. భవిష్యత్ కార్యాచరణపై చర్చించనున్నారు. ఈ భేటీ తర్వాత వర్మ తన కార్యచరణ ప్రకటించే అవకాశం ఉంది. వర్మ గత కొన్నేళ్లుగా పిఠాపురంలో సేవలు అందిస్తున్నారు. 6 నెలల నుంచి చూస్తే.. వర్మ గ్రాఫ్ పెరుగుతూ వచ్చింది. వర్మ కచ్చితంగా బరిలో ఉంటారని కార్యకర్తలు బలంగా నమ్మారు. అందుకు అనుగుణంగా ప్రచారం చేసుకుంటూ వర్మ ముందుకు సాగుతున్నారు. ఇదే సమయంలో పిఠాపురం నుంచి తాను పోటీ చేస్తున్నట్లు పవన్ కల్యాణ్ ప్రకటించడంతో ఒక్కసారిగా రాజకీయ పరిణామాలు వేడెక్కాయి.
వర్మ కచ్చితంగా స్వతంత్ర అభ్యర్థిగా బరిలోకి దిగాలని ఆయన వర్గీయులు సూచిస్తున్నారు. గత 18ఏళ్లుగా పిఠాపురం నియోజకవర్గంలో స్థానికుడిగా ఉన్నాను, సేవలు అందిస్తున్నాను, పిఠాపురం నుంచి బరిలో ఉంటాను అని వర్మ చెబుతూ వస్తున్నారు. ఒకవేళ వర్మ పోటీలోకి దిగితే.. పిఠాపురంలో త్రిముఖ పోరు ఉండనుంది. మరి అధిష్టానం పిలిచి వర్మను సముదాయిస్తుందా? లేదా? అన్నది ఉత్కంఠగా మారింది. పిఠాపురం నియోజకవర్గంలో ఇటు టీడీపీ, అటు జనసేన శ్రేణుల్లో తీవ్ర గందరగోళం నెలకొంది.
Also Read : పవన్ కల్యాణ్‌ను ఓడించడమే లక్ష్యంగా వైసీపీ ప్లాన్.. హాట్ హాట్‌గా పిఠాపురం పాలిటిక్స్
