Eng Vs SA: వన్డే క్రికెట్ చరిత్రలోనే పరమ చెత్త రికార్డ్ ను నమోదు చేసుకుంది సౌతాఫ్రికా. ఇంగ్లండ్ తో జరిగిన మూడో వన్డేలో సౌతాఫ్రికా ఘోర పరాజయం పాలైంది. 415 పరుగుల భారీ టార్గెట్ తో బరిలోకి సౌతాఫ్రికా.. 72 పరుగులకే ఆలౌట్ అయ్యింది. ఏకంగా 342 రన్స్ తేడాతో భారీ ఓటమిని చవిచూసింది. ఆ జట్టులో టాప్ స్కోరర్ బాష్. అతడు 20 పరుగులు చేశాడు. ఇంగ్లాండ్ బౌలర్లలో ఆర్చర్ అదరగొట్టాడు. 4 వికెట్లు తీసి సౌతాఫ్రికాను దెబ్బకొట్టాడు. వన్డే క్రికెట్ చరిత్రలో అత్యధిక పరుగుల తేడాతో ఓటమి ఇదే.
గతంలో శ్రీలంక 317 పరుగుల తేడాతో భారత్ చేతిలో ఓటమి పాలైంది. ఇప్పటి వరకు వన్డే క్రికెట్ లో పరుగుల పరంగా ఇదే అతిపెద్ద ఓటమి. తాజాగా ఈ రికార్డ్ను సౌతాఫ్రికా బ్రేక్ చేసింది.
మూడు వన్డేల సిరీస్లో భాగంగా ఆదివారం సౌతాంప్టన్ వేదికగా మూడో వన్డే జరిగింది. టాస్ నెగ్గిన సౌతాఫ్రికా బౌలింగ్ ఎంచుకుంది. ఫస్ట్ బ్యాటింగ్ చేసిన ఆతిథ్య ఇంగ్లాండ్ జట్టు భారీ స్కోర్ చేసింది. 50 ఓవర్లలో 5 వికెట్ల నష్టానికి 414 పరుగుల భారీ స్కోర్ చేసింది.
ఇంగ్లండ్ బ్యాటర్లలో జో రూట్, జాకోబ్ బేతెల్ సెంచరీలతో కదం తొక్కారు. రూట్ 96 బంతుల్లో 100 పరుగులు చేశాడు. 6 ఫోర్లు కొట్టాడు. బేతెల్ 82 బంతుల్లోనే 110 పరుగులు చేశాడు. 13 ఫోర్లు, 3 సిక్సులు బాదాడు. జేమీ స్మిత్ హాఫ్ సెంచరీతో మెరిశాడు. చివరలో జోస్ బట్లర్ (62), విల్ జాక్స్ (19) మెరుపులు మెరిపించారు. దీంతో ఇంగ్లండ్ 414 పరుగుల భారీ స్కోర్ చేసింది.
415 పరుగుల భారీ లక్ష్యంతో బరిలోకి దిగిన సౌతాఫ్రికా చతికిలపడింది. ఆ జట్టులో ఇద్దరు బ్యాటర్లు డకౌట్ అయ్యారు. ఒకరు ఆబ్సెంట్ హర్ట్. ముగ్గురు మాత్రమే రెండంకెల స్కోర్ చేశారు. సపారీ బ్యాటర్లలో అత్యధిక స్కోర్ 20 పరుగులే. ఇంగ్లండ్ బౌలర్లు ఆర్చర్ నిప్పులు చెరిగాడు. 4 వికెట్లు తీసి ప్రత్యర్థి వెన్ను విరిచాడు. ఆదిల్ రషీద్ 3 వికెట్లతో సౌతాఫ్రికా పతానాన్ని శాసించాడు. వీరిద్దరి ధాటికి సౌతాఫ్రికా కేవలం 72 పరుగులకే ఆలౌట్ అయ్యింది.
