GT vs MI
IPL 2023, GT vs MI: ఐపీఎల్ 2023లో భాగంగా మ‌రో ఆస‌క్తిక‌ర స‌మ‌రానికి రంగం సిద్ధ‌మైంది. అహ్మ‌దాబాద్‌లోని నరేంద్ర మోడీ స్టేడియం వేదిక‌గా ఢిపెండింగ్ ఛాంపియ‌న్ గుజరాత్ టైటాన్స్(Gujarat Titans) తో ఐదు సార్లు క‌ప్పును ముద్దాడిన ముంబై ఇండియన్స్(Mumbai Indians) జ‌ట్టు త‌ల‌ప‌డ‌నుంది. ఈ సీజ‌న్‌లో ఇరు జ‌ట్లు చెరో ఆరు మ్యాచుల‌ను ఆడాయి. నాలుగు మ్యాచుల్లో విజ‌యం సాధించిన గుజరాత్ టైటాన్స్ పాయింట్ల ప‌ట్టిక‌లో నాలుగో స్థానంలో కొన‌సాగుతుండ‌గా మూడు మ్యాచుల్లో గెలుపొందిన ముంబై ఏడో స్థానంలో ఉంది. గుజరాత్ టైటాన్స్ జ‌ట్టు త‌మ చివ‌రి మ్యాచ్‌లో ల‌క్నో సూప‌ర్ జెయింట్స్‌పై 135 ప‌రుగుల స్వ‌ల్ప లక్ష్యాన్ని కాపాడుకోగా పంజాబ్ కింగ్స్ పై భారీ లక్ష్యాన్ని దాదాపు ఛేజింగ్ చేసినంత ప‌ని చేసింది ముంబై. ఈ నేప‌థ్యంలో నేడు జ‌ర‌గ‌నున్న పోరు హోరాహోరీగా జ‌రిగే అవ‌కాశం ఉంది.
స్వ‌ల్ప లక్ష్యాన్ని కాపాడుకోవ‌డం గుజరాత్ ఆత్మ‌విశ్వాసాన్ని పెంచుతుంది అన‌డంలో ఎటువంటి సందేహం లేదు. ఓపెన‌ర్లు వృద్ధిమాన్ సాహా, శుభ్‌మ‌న్ గిల్‌ల‌తో కెప్టెన్ హార్ధిక్ పాండ్య ఫామ్‌లో ఉన్నారు. వీరితో పాటు విజయ్ శంకర్, డేవిడ్ మిల్లర్, రాహుల్ తెవాటియాలు బ్యాటింగ్‌లో రాణిస్తే భారీ స్కోరు సాధించ‌వ‌చ్చు. గుజరాత్ బౌలింగ్ విభాగం చాలా ప‌టిష్టంగా ఉంది. మహ్మద్ షమీ, మోహిత్ శ‌ర్మ‌లు ల‌క్నోతో మ్యాచ్‌లో ఓడిపోతుంద‌నుకున్న స‌మ‌యంలో అద్భుత‌మే చేశారు. ఈ ఇద్ద‌రితో పాటు రషీద్ ఖాన్, నూర్ అహ్మద్, జ‌యంత్ యాద‌వ్‌లు రాణిస్తే ముంబై కి క‌ష్టాలు త‌ప్ప‌క‌పోవ‌చ్చు. ఢిపెండింగ్ ఛాంపియ‌న్ హోదాలో ఈ సీజ‌న్‌లో అడుగుపెట్టిన గుజరాత్ నేటి మ్యాచ్‌లో విజ‌యం సాధించి స్థానాన్ని మెరుగుప‌ర‌చుకోవాల‌ని చూస్తోంది.
వ‌రుస ఓట‌ముల‌తో ఈ సీజ‌న్‌ను ఆరంభించిన ముంబై ఇప్పుడిప్పుడే గెలుపు బాట‌ప‌డుతోంది. పంజాబ్‌తో మ్యాచ్‌లో 215 ప‌రుగుల లక్ష్యాన్ని దాదాపుగా చేజింగ్ చేసినంత ప‌ని చేసింది. కెప్టెన్ రోహిత్ శ‌ర్మ‌తో పాటు సూర్యకుమార్ యాదవ్, కామెరూన్ గ్రీన్‌లు ఫామ్ అందుకోవ‌డం శుభ‌ప‌రిణామం. వీరిలో ఏ ఇద్ద‌రు నిల‌బ‌డినా ముంబై అవ‌లీల‌గా భారీ స్కోరు సాధిస్తుంది. అయితే.. బౌలింగ్ ముంబైని క‌ల‌వ‌ర‌పెడుతోంది. జోఫ్రా ఆర్చ‌ర్ కోలుకుని వ‌చ్చినా.. మున‌ప‌టి వాడిని కొన‌సాగించ‌లేక‌పోతున్నాడు. పీయూష్ చావ్లా ఒక్క‌డే రాణిస్తున్నాడు. మిగిలిన వారు కూడా రాణించాల‌ని ముంబై మేనేజ్‌మెంట్ కోరుకుంటోంది.
పిచ్ రిపోర్ట్
నరేంద్ర మోదీ స్టేడియంలోని పిచ్ సమతుల్యంగా ఉంది. మొదట్లో పేసర్లకు అనుకూలంగా ఉంటుందని భావిస్తున్నారు, అయితే ఆట సాగుతున్న కొద్దీ స్పిన్నర్లకు అనుకూలంగా ఉండొచ్చు. 175 ప‌రుగుల కంటే ఎక్కువ స్కోరు సాధించిన జ‌ట్టుకు గెలిచే అవ‌కాశం ఉంటుంది.
తుది జ‌ట్ల (అంచ‌నా)
గుజరాత్ టైటాన్స్ : వృద్ధిమాన్ సాహా (వికెట్ కీప‌ర్‌), శుభమాన్ గిల్, హార్దిక్ పాండ్యా (కెప్టెన్), విజయ్ శంకర్, అభినవ్ మనోహర్, డేవిడ్ మిల్లర్, రాహుల్ తెవాటియా, రషీద్ ఖాన్, మహ్మద్ షమీ, నూర్ అహ్మద్, మోహిత్ శర్మ
ముంబై ఇండియన్స్ : రోహిత్ శర్మ (కెప్టెన్), ఇషాన్ కిషన్ (వికెట్ కీప‌ర్‌), తిలక్ వర్మ, సూర్యకుమార్ యాదవ్, టిమ్ డేవిడ్, కామెరాన్ గ్రీన్, నెహాల్ వధేరా, అర్జున్ టెండూల్కర్, పీయూష్ చావ్లా, జాసన్ బెహ్రెండోర్ఫ్, హృతిక్ షోకీన్
