IND vs WI 5th T20 : బెంగళూరులో వర్షం.. సిరీస్ విజేతను తేల్చే మ్యాచ్‌కు వరుణుడి బ్రేక్‌.. రద్దయితే ట్రోఫీ ఎవరికి?

IND vs WI 5th T20

• సిరీస్ ఎవరిదో తేల్చే పోరు.. చిన్నస్వామి స్టేడియంలో వర్షం కలకలం!
• భారత్‌-వెస్టిండీస్ ఫైనల్ ఫైట్‌కు వాన గండం.. మ్యాచ్ రద్దయితే ఏంటి?
• 2–2తో సమం.. వర్షం పడితే ట్రోఫీ పంచుకోవాల్సిందేనా?

IND vs WI 5th T20 : ఐదు మ్యాచ్‌ల టీ20 సిరీస్.. చెరో రెండు విజయాలతో సమంగా నిలిచిన భారత్, వెస్టిండీస్.. సిరీస్ విజేతను నిర్ణయించే ఆఖరి పోరు.. అభిమానుల్లో ఉత్కంఠ పెంచాల్సిన ఈ కీలక మ్యాచ్‌కు ఇప్పుడు వరుణుడు అడ్డుపడుతున్నాడు.

బెంగళూరులోని చిన్నస్వామి స్టేడియంలో వర్షం కురుస్తుండటంతో మ్యాచ్ భవితవ్యంపై సందిగ్ధత నెలకొంది. మరి వర్షం ఇలాగే కొనసాగితే ట్రోఫీ ఎవరికి దక్కుతుంది? మ్యాచ్ ఫలితం తేలడానికి ఎన్ని ఓవర్లు ఆడాలి? పూర్తి వివరాలివే..

వర్షం తగ్గితేనే సిరీస్‌పై క్లారిటీ :
భారత్, వెస్టిండీస్ మధ్య ఇప్పటివరకు జరిగిన నాలుగు టీ20ల్లో ఇరు జట్లు రెండేసి విజయాలు సాధించాయి. దీంతో ఐదో మ్యాచ్ సిరీస్ ఫైనల్‌గా మారింది. ఇందులో గెలిచిన జట్టే ట్రోఫీని అందుకుంటుంది.

Read Also : LIC Health Shield Plan : అనారోగ్యంతో హాస్పిటల్‌లో చేరితే క్షణాల్లో చేతికి డబ్బులు.. LIC హెల్త్ షీల్డ్ పాలసీ పూర్తి వివరాలివే..

కానీ, ప్రస్తుతం వర్షం మ్యాచ్‌కు ఆటంకంగా మారడంతో అభిమానులు ఆందోళన చెందుతున్నారు. వర్షం తగ్గి మైదానం ఆటకు సిద్ధమైతే.. పరిస్థితులకు అనుగుణంగా ఓవర్లను కుదించి మ్యాచ్ నిర్వహించే అవకాశం ఉంటుంది.

మ్యాచ్ రద్దయితే ట్రోఫీ పంచుకోవాల్సిందేనా? :
ప్రస్తుతం అందరిలోనూ ఇప్పుడు ఇదే ప్రశ్న వినిపిస్తోంది.. వర్షం కారణంగా మ్యాచ్ పూర్తిగా రద్దయి ఫలితం తేలకపోతే, సిరీస్ 2–2తోనే ముగుస్తుంది. అప్పుడు భారత్, వెస్టిండీస్ జట్లు ట్రోఫీని పంచుకోవాల్సి వస్తుంది. ఏ జట్టునూ ఏకైక సిరీస్ విజేతగా ప్రకటించరు. ఈ మ్యాచ్‌కు రిజర్వ్ డే లేదని సమాచారం..

ఎన్ని ఓవర్లు ఆడాలి? :
టీ20 అంతర్జాతీయ మ్యాచ్‌లో సాధారణంగా ఫలితం తేలాలంటే ఇరు జట్లు కనీసం 5 ఓవర్ల చొప్పున బ్యాటింగ్ చేయాలి. వర్షం ఆలస్యానికి కారణమైతే ఓవర్లను తగ్గించి మ్యాచ్ ఆడించొచ్చు. అవసరమైన పరిస్థితుల్లో డక్‌వర్త్–లూయిస్–స్టెర్న్ (DLS) పద్ధతిని ఉపయోగించి ఫలితాన్ని నిర్ణయిస్తారు. కనీస ఆట కూడా సాధ్యం కాకపోతే మ్యాచ్ పూర్తిగా రద్దవుతుంది.

మొత్తానికి, భారత్‌కు సిరీస్ అందాలన్నా, వెస్టిండీస్ ట్రోఫీ ఎగరేసుకుపోవాలన్నా మైదానంలో ఆట సాగాలి. లేదంటే ఇరు జట్లు చెరో రెండు విజయాలతో సిరీస్‌ను పంచుకోవాల్సి వస్తుంది. ఇప్పుడు క్రికెట్ అభిమానుల చూపులన్నీ బెంగళూరు వాతావరణంపైనే!